١.١٩.٢٠٠٧

للى عايزين يتجوزوا وبس

الصيف ده الحمد لله كان كتير من صحباتى بيتجوزوا غير قرايبى وجيرانى

طول عمرى اعرف ان كل حاجة بتعدى الا مشاكل الافراح ولو انها ممكن الليلة تعدى على خير

بس بتبقى باقية طول العمر مع الناس ايه السبب...مش عارفة؟

مصر من البلاد المتميزة جدا بافراحها (ده طبعا لحد وقت قريب جدا قبل ما يظهر المطرب الكبير عماد بعرور وشركاه).بس الممتع انك بتلاقى ان تقاليد الافراح بتختلف من بلد لبلد مش كده وبس ده من قرية لقرية كمان

وطبعا عمر الفرح ما المصريين بيحتفلوا بيه فى يوم وليله , ده لازم ليلة لقراية الفاتحة وليلة للخطوبة والشبكة وليلة تالتة لكتب الكتاب وليلة لنقل العفش من بيت العروسة لعش الزوجية السعيد وليلة غيرها للحنة وبعدين ليلة الدخلة او الفرح .

طبعا المفروض ان لحد هنا وخلاص لا طبعا ده فى الصباحية ويوم السبوع كمان والفرح بيتنقل من بت اهل العروسة ومن قاعة الافراح لبيت العروسين نفسهم .

نيجى بقى لنقطة تانية وهى نقطة العفش اللى المفروض ييجى اموت واعرف ايه لازمة النيش

انا بحس ان الناس بتجيبه عشان يبقى متحف موجود فى البيت عشان يحطوا فيه الكوبايات والكاسات والصوانى وطقم الصينى و...الخ الخ الخ. ولازم من كل نوع ييجى طقمين تلاتة على اساس انهم ممكن يعزموا فى يوم الامم المتحدة كلها علشان تاكل عندهم . وغير كل ده ان 3\4 الحاجات اللى بتبقى موجودة فيه بيبقى ممنوع استعمالها دول محطوطين للفرجة بس وبيبقى ناقص جهاز انذار ولافتة ممنوع الاقتراب او التصوير. مع انهم المفروض اتنين لسة بيبتدوا حياتهم وبيشقوا طريقهم بس لازم تلاقى النيش جواه حاجات لو حسبوا تمنها ممكن يلاقوه قرب على تمن الاثاثات اللى فى الشقة .

طيب وايه لازمة كل المصاريف دى فى حاجات مش هتبقى عملية مع اى واحدة وممكن ماتقربيش منها عشان خايفة عليها وممكن المصاريف دى يستغلوها فى اى حاجة تانية عشان يقدروا يعيشوا حياتهم.

ولا كله كوم ولما الناس كلها لازم تيجى تتفرج على شقة العريس والعروسة ده كوم تانى مفيش سبب لحد دلوقتى للعادة دى غيريفتخروا باللى جايبينه مع ان المفروض ان الشقة دى من خصوصيات العروسين ومن حرمة البيوت كمان يعنى فى ناس كتير مش بنحب كده بس ازاى بقى ولازم الاهل والناس ييجوا يتفرجوا( انتوا عايزين الناس تقول علينا ايه مجبناش حاجة واحنا جايبين الدنيا كلها)

مع ان كل اللى بيحصل ان الناس بتيجى تبارك وبعد ما يتفرجوا ع الشقة ويحيوا الاتنين على ذوقهم الجميل والرائع اول ما يخرجوا من باب الشقة مش بيبقى وراهم حاجة غير انهم يعيبوا على كل حاجة فى البيت ومش بيسيبوا ابرة غير لما يعيبوا عليها.

فى حاجة مهمة جدا وان دايما كل ما ببقى فى فرح بحس ان القاعة شبه الاستاد والعيلتين شبه فريقين الاهلى والزمالك كل عيلة واخدالها جنب بالناس اللى هى عازماهم مع ان فى بينهم نسب والنسب علاقة قوية بتجمع الناس ببعضها ايه بقى اللى يخليهم متفرقين بالشكل ده وكل عيلة مستنية للعيلة التانية على غلطة.ده غير بقى ان كل ام لازم تورى للناس كلها ان بنتها او ابنها جايب احسن من الى العريس جايبه او اللى العروسة جايباه.

لامتى هنفضل نضيع حياتنا فى حاجات ابسط حاجة فيها اننا نقرب من بعض ؟

فيها ايه لو بطلنا نؤمن بالمظاهر الكدابة اللى الناس عايشة فيها؟

لامتى هنفضل معيشين الشباب فى رعب من اقل حاجة ربنا نعم علينا بيها وهى الجواز علشان شقة 4 اوض وشبكة ب25 الف وعفش مالوش لازمة؟

فيها ايه لو بنوا حياتهم سوا من غير ما نزود همومهم وحمولهم فى زمن الناس بتعيش فيه بالعافية؟

بعد كل الكلام ده ومع عرض اقل السلبيات اللى بنشوفها فى حالة من حالات المجتمع الا انى واثقة ان مفيش حاجة من اللى انا بهدف ليها هتتحقق

سارة الاسكافى

هناك تعليق واحد:

Sarah el eskafy يقول...

ايوة طبعا لازم العائلات ماتظهرش على حقيقتها غير وقت التدبيس عشان محدش يقدر يرجع فى كلامه
مع انها بتظهر من قبلها بشوية وهو وقت القايمة وتقوم خناقة لرب السما واول ما ربنا يهديهم ويبطلوا خناق او يفركشوا الجوازة خالص تفضل القايمة دى عاملة عداوة بينهم طول العمر وممكن يتوارثوها كمان

فعلا
ربنا يشفى
ميرسى يا تهامى لردك