فقاعة هواء

بطولة وحيدة

2011-09-24T15:40:00.000-09:00

الحب زمان كان ليه طعم ، كان ممكن البنت والولد يفضلوا يحبوا بعض بالسنين ويقاتلوا ويقفوا ادام ظروفهم ومشاكلهم ويحاربوها لحد ما يتجوزوا فى الاخر ، كل الافلام القديمة بتقول كده ، لازم البطل والبطلة يتجوزوا فى الاخر ، حتى مساعدين البطل والبطلة لازم يتجوزوا ، بصراحة المخرج مكنش بيحب يزعل حد لما بقت احلام الحب الوردية هى اللى واكلة دماغ الشباب فى الوقت ده.

دلوقتى بقى السيناريو اتغير وطبيعة الافلام كلها اتغيرت بقى فى فيلم البطل الواحد والبطلة او البطل مبقوش محتاجين حد يقف معاهم فى الفيلم

لا ده كمان وصلنا لمرحلة افلام مش محتاجين فيها غير ممثل واحد لا غير ولا كومبارس ولا بطل ولا ديكور ولا اى حاجة من دى كمان بقى فى مصطلحات جديدة زى عنوسة ودراسات عليا ولازم اكون مستقبلى الاول واصلا الرجالة بقت مفضوحة وكله على الفيسبوك وعلى عينك يا تاجر فبقت البنات بايعة .. وبغض النظر عن ان منظومة التعليم فاشلة بس منظومة الكمبيوتر والانترنت وجيل الثورة اثبتلنا ان مش كل حاجة عند البنت الفستان الابيض والطرحة وتربية العيال والخناق مع الحموات ونشر الغسيل والرغى مع الجارات ، ده احنا لقينا ان فى حاجة اثبها آدمية وانسانية وشغل وصداقة ومستقبل ونجاح .

لا والجديد الشبكة غليت ما تطلبوش شبكة يابنات والشباب يقولولنا الصداقة حلوة وجميلة يابنات الفيسبوك ياكرام احنا مش عايزين بنات ذكية تقرفنا فى عيشتنا احنا عايزين بنات هبلة نشغلها فى شغل البيت والعيال ونخرج احنا نشوف حياتنا بلا وش حريم وزن ستات.

ومن مكانى هذا احب اقولكوا انى مش بفكر فى جواز ولا اى نوع من انواع الارتباط واللى عايز ييجى يشترى الجهاز يتفضل يشترى كاش. دى الافلام اتغيرت والمفاهيم اتغيرت وانا هكون بطلة فيلمى وحيدة من غير كومبارس.

دوى الهروب العظيم

2011-07-13T02:42:00.000-09:00

زاد القلق والتوتر بعدما سمع سكان القاهرة والجيزة كلها دوى انفجارات ضخمة الا انا لم اسمع سوى صوت شخص زنان من زوار المجلة

وزادت الشائعات والتساؤلات واتضح ماهو آت:

ذكر التليفزيون المصرى ان هناك طائرة اخترقت حاجز الصوت فاحدثت هذا الدوى الرهيب الذى اصم اذان الناس الا انا فى نفس توقيت انهيار جسر الجزيرة بالمعادى الذى اصم اذان سكان المعادى وحلوان الا انا برضه مع ذكر خبر على لسان مدير مستشفى المعادى بان سبب هذا الدوى العظيم هو انهيار اعمدة بالمستشفى تحت الانشاء مع ذكر انباء اخرى عن انفجار فى منجم بالمعادى ادى الى هذا الصمم المصرى العظيم

بعد التفحيص والتمحيص وتقمصى لشخصية كرومبو جئت بحقيقة الحدث

لقد هرب الرئيس الذى سبق خلعه محمد حسنى مبارك على متن طائرة كانت مطلعها من على كوبرى الجزيرة بالمعادى

مما ادى الى انهيار الكوبرى ، وعندما احس قائد الطيارة بهذه الكارئة التى ستؤدى لكشفه ضرب مارشدير وداس بنزين وطار على سرعة 140 ممى ادى الى خرق كل قواعد الطيران وسلامة الامن القومى وادى الى سماع هذا الدوى الرهيب المذكور اعلاه

وتتضارب الاقوال حول الجهة المقصودة بالطائرة اهى المريخ ام كوكو الزهرة . هذا وقد اتضح ان انهيار اعمدة مستشفى المعادى وانفجار المنجم ما هم الا تمويه للشعب المصرى عن هذا الفرار المريب

وشكرا

سارة الاسكافى

7-8-2011

زينــــــــــب

2011-04-24T04:28:00.000-09:00

زينــــــــــب
هذه الفتاة التى كانت تثير استغرابى فى مدرستى الابتدائية، كانت دائمة الابتسام والضحك، لا تعرف شئ عن المذاكرة وكانت اكثر ما تعتمد عليه هو الغش كى تنجح على "الحركرك" لم نكن نعرف عنها سوى انها بنت "بائعة الفاكهة"
انتظر!!لا تظن ان بائعة الفاكهة هنا نوعا من انواع المعايرة
بل على العكس
لقد كانت هذه البائعة تتميز بيديها المليئة بغوائش الذهب
وصدرها المغطى بالسبائك الذهب
واذنها التى تتدلى منها الاقراط الذهب

لكنها كانت تترك ابنائها التسعة بدون اى اهتمام او ملابس نظيفة او حتى تهتم بنظافتهم الشخصية
لم نعلم شئ عن ابيها اهو ميت ام لا لكنه كان عديم الوجود

بحكم سذاجة سنى فى هذا العهد(جيل الثمانينات كان ساذج وعبيط وهو فى هذا السن عكس الجيل الحالى) كنت لا اهتم بهذه الفروق بل كنت اتخاصم مع من تعاير زينب بعمل امها

انتهت المرحلة الابتدائية ولم ارى زينب بعدها سوى مرة واحدة تجلس بجانب امها تبتسم لى
فبادلتها الابتسامة ومضيت فى طريقى

اليوم ذهبت لشراء كيلو جوافة لافاجأ ان من تبيع الفاكهة هى زينب
عرفتنى ولم اعرفها
لقد تغيرت تماما
حجمها تعدى ال120 كيلو
شكلها كبر عن سنها ب30 سنة
لم استطع النطق بكلمة من هول المفاجأة

تملقتنى وكانها تبحث عن شئ ثم قالت بصوت جهور"انتى لسة ما اتجوتزتيش"
قلت لها "لا"
مصمصت شفايفها فى حسرة وكاننى صعبت عليها فسالتها "وانتٍ يازينب اخبارك ايه؟"
ردت
"انا اتجوزت من زمان وعندى 6 عيال دلوقتى .. تعالى يا عيلاء . تعالى يا فتحى.. تعالى يا صفاء.. يابت يا سهير اندهى على احمد ومحمد اخواتك من فوق خليهم يسلموا على ابلتهم سارة"

تمت:(

سارة الاسكافى
23-4-2011

بلاها عيد الام

2010-04-13T00:24:00.002-09:00

عيد الام ..هذا العيد الذى لا يخلو من الهدايا لماما وطنط وتيتة وابلة وطنط ام محمد جارتنا بالمرة ومن مارس لمارس نفضل نخطط ونفكر هنجيب ايه ومنين وبكام وهنحوش فلوس الهدايا دى كلها منين واحنا فى ايام ما يعلم بيها الا ربنا كلها غلاء وازمات وحرايق وماس كهربائى وحوادث قطارات. وتلاقى من اول يناير بدل ما الناس تسمع كلام شعبولا وتروح تشيل حديد وتاخد بالها من صحتها تجرى تلف على المحلات هنجيب لماما ايه السنة دى ياترى. الحمد لله ماما عندها كل حاجة يعنى نجيبلها ايه ،اصل الهدية عشان يبقى ليها فرحتها وزهوتها لازم تكون حاجة مش عندها او نفسها فيها،وانا مش من انصار انى اجيب حاجة للمطبخ واقول انها لماما وده لانها بتوقفنى معاها غصب واقتدار معاها فى المكان الملعون ده يعنى هناخد الهدية شرك ،واحتمال اضمها لجهازى كمان عشان احطها فى مستعمرتى الجديدة فى بيت الزوجية المجهول حتى الان. يبقى لازم اجيب حاجة تستعملها هى بشخصيتها بدون اى تدخل خارجى. فكرت اجيبلها حاجة دهب بما ان الستات ما بتزهقش منه باستثنائى وبالذات ان هى كمان بتلمح للموضوع ده وبتتستر خلف عبارة "انا مش عايزة الا الستر" وانا عاملة فيها عبيطة وودن من طين وودن من عجين لكن الواحد اذ فجأة بيكتشف ان كل اللى حوشه جنب اسعار الجرام دلوقتى ما يجيبش دهب صينى. حتى مقالتش الجملة المشهورة بتاعة "كفاية عليا انكوا تبقوا جنبى وحواليا" زى الافلام العربى اللى طول عمرنا بنسمعها ونشوفها وبترفعلنا الضغط والسكر واحيانا بتجيب جلطات . فكرت وفكرت وفكرت فى هدايا كتير بس كلهم موجودين عندها ،يبقى فين الـ"ساسبينس" اللى هيبقى فى الهدية.. فين الشهقة اللى هلاقيها طالعة من جوة جوة معاميقها وهى بتقول "ايييييه ده مش معقول.. انا مش مصدقة انكوا جبتولى الحاجة دى.. دى بالنسبالى اغلى من اغلى ياقوت الدنيا" ولا نلاقيها قامت من مكانها وهى مذبهلة كده وبتقولى" انتوا لقيتوها فين دى ده انا دايخة عليها وتاخدنى انا واخويا بالحضن " وبعدين اقولها "انا اللى جبتها لوحدى وبفلوسى وتعبى وشقايا" تقوم ترمى اخويا وتفضل تحضن فيا انا. مش ده برضه الاحاسيس المفروض تتواجد فى المواقف اللى زى دى، المواقف اللى بتخلى عيد الام بييجى فى اخر الشهر فى فترة "التفليسة" و "الاشفرة" الشهرية هل ده كان عن عمد ولا كان ماشى مع ظروف اللى "بدع" العيد ده،العيد اللى هو فى الاصل بدعة زى بدعة عيد الحب كده،اللى كل امهاتنا رافضينه وبيقولولنا عيد حب ايه وهبل ايه ومياصة ايه،انتوا اى حاجة تتعمل برة تعملوها هنا ،دى بدعة والبدعة ضلالة وكل ضلالة فى النار. "معنى كده بقى ان عيد الام كمان بدعة" ونظرا لاننا شعب ازدواجى المعايير وعنده شيزوفرينيا واسكيزوفرينيا وبارانويا وهبلنويا وكل الامراض النفسية فهما رافضين عيد الحب وموافقين على عيد الام ،وبما انى لسة فى فى عقلى شوية وموصلتش لكل الامراض دى ،فقررت اخد موقف ولا موقف احمد حلمى فى زمانه واقول "لا لعيد الام" البدعة الحرام اللى جاية من عند الكفرة الزناديق اللى عايزين يفلسونا ويشحورونا ويهددوا علاقتنا بامهاتنا لو اتاخرنا عن اننا نجيب الهدايا لمدة ساعة واحدة،واحتمال يغضبوا علينا والدنيا تتقفل فى وشنا كل ده بسبب الاخ اللى عملنا العيد ده. طب وليه يحصل كل ده،وليه العلاقة تتدهور سنة ورا سنة بسبب العيد ده،وليه يبقى فى عيد ام من اصله،ما كفاية علينا الاعياد القومية اللى بتيجى مرتين فى الشهر دى. ومن مكانى هذا احب اقول لامى حبيبتى انى خايفة على العلاقة اللى بيننا لتتدهور"اكتر ماهى متدهورة" واللى احتمال المرحلة اللى جاية انطرد من البيت وانام على السلم "فبلاها عيد ام".خلينا فى العلاقة الروحانية اللى ربنا خلقها فينا،هيهمك ايه فى الدنيا غير وجودى جنبك"غصب عنك برضه زى الافلام " املى عليكى دنيتك واملالك البيت رخامة ورزالة وتكسير الكوبايات فى المطبخ وحرق الرز. ويبقى كل يوم فى حياتنا عيد ام"زى ما بيقولوا الحبيبة فى الافلام". وزى ما هقولك كل يوم كل غدوة وانتى طيبة يا مامتى وكل عشوة وانتى طيبة يا مامتى .. وكل اول شهر وانتى طيبة يا مامتى،

اعتــــــــــــــــــذار

2010-03-07T17:59:00.002-09:00

لم تتخيل فى للحظة أن يتخلى عن حلمه الذى ظل يحلم به طوال حياته من اجلها، لقد فقدت الأمل فى أن يكون لها مرة أخرى بعد أيام حتى يسافر للعمل للخارج فى فرصة لا تعوض بالنسبة لشاب مثله يحلم ببناء مستقبله ويكفيه ما ضاع من سنوات عمره هنا مقابل اللاشئ.. بكت .. لم تصدق أن يوجد من يتصرف هذا التصرف .. يتمسك بها رغم كل شئ.. يضيع حلمه كى يبقى بجانبها.. كى يحافظ على وعده لها.. كى لا يكسرها أو يخدش قلبها بشبه جرح يوجعها ويؤلمها.. من اجل ألا تنزل دموعها من عينيها وقت الفراق على تحطم قلبها.. هل يوجد هذا الرجل فى هذا الزمن.. نعم يوجد... انه بجانبها ..يمسح دموعها .. يوعدها بأنه لن يتركها.. تفضحه عيناه ولهفته الشديدة عليها بحبه الشديد.. " يا ويلى.. كم أنا حمقاء .. كم أنا جافية القلب..كيف جرأت على أن يجول فى تفكيرى ضياعه منى و خذلى.. كيف كنت أفكر أن أضيع منى هذا الرجل الملاك" قلتها لنفسها وهى تبكى بين يديه..برغم أن زواجهم أصبح مستحيل إلا أنها عشقته أضعاف أضعاف المرات.. أرادت أن ترتمى فى أحضانه .. تبكى بداخلها ..تستشعر دفئه.. أرادت البكاء بين يديه حتى يغفر لها كل حماقاتها السابقة.. كل ما أثار ضيقه وغيرته .. " اعذرنى حبيبى ..بالرغم من أننى احبك حب يفوق حب العالم كله .. ولا أريد أن اسبب لك متاعب أكثر من ذلك فى حياتك .. إلا انى أريد أن أبقى بجانبك للأبد .. لن أتخلى عنك.. اعرف أنها أنانية .. لكنك أصبحت هوائى الذى أتنفسه .. ومائى الذى يروينى.. والحنان الذى لن ولم أجده مع سواك. فقط تحملنى .. فقط ابقنى لجانبك .. فقط دعنى احبك .. " أخذها بين أحضانه وربت على شعرها الأملس ومن بين دموعه قال لها " احبــــك"

كل سنة وانا طيبة ..لازم تقروه لانه يهم كل فرد فى العالم

2009-12-29T03:11:00.004-09:00

ممممممممممممم... كانت مفاجأة بالنسبالى لما دخلت النهاردة موقع الفيس بوك اللى ليا فيه 3 اكونتات وده مجاز قانونا حسب القانون الدولى للفيس بوك فرع الاقطاعيين الغلابة اللى زى حالاتى وبفتح واحد من الاكونتات دى اكتشفت ان عيد ميلادى النهاردة .. طبعا انا اذبهليت وتنحت ادام الشاشة شوية قلت الظاهر ان الواحد لسة نايم وبيحلم .. عملت مج شاى وجبت 7 سندوتشات لزوم الفوقان يعنى وقلت اقعد اشوف ايه الموضوع.. لقيت فى ناس بتهنى وناس داخلة ايدها فاضية ومشوفتش تورتاية واحدة على الوول حتى الواحد يحلى بيها بعد الفطار الخفيف ده.. بس فى حاجة غريبة .. لو النهاردة عيد ميلادى يبقى ليه فى بروفايل واحد والاتنين التانيين لا؟!!.. ولو النهاردة عيد ميلادى يبقى ليه الجو برد انا على ما اتذكر ان كان يومها الجو بيبقى حر ورطوبة وشرد؟؟!!.. طب لو النهاردة عيد ميلادى برضه يبقى ليه النهاردة مش طالعله شمس؟؟ انا فاكرة ان فى اليوم ده الشمس بتبقى طالعة مسيحة اى حد يفكر يخرج وهى موجوده.. طب بما ان النهاردة عيد ميلادى ليه التليفزيونات منفضاله وبتحتفل بالكريسماس وبابا نويل؟؟!! انا متعودة ان فى اليوم ده بيجيبوا جمال عبد الناص بافلامه بمسلسلاته بخطاباته بجنازته.. طب وبما ان النهاردة عيد ميلادى ليه الطلبة بتروح المدارس والجامعات وبيتكلموا فى الامتحانات اللى جاية والمراجعات والجو ده انا متعودة ان يوم عيد ميلادى الناس بتحتفل بنتايجها وبتروش ماهى بتبقى اجازة الصيف بقى.. يعنى احنا فى الشتاء طب ايه اللى جاب الصيف فى الشتاء؟ هل ده ليه علاقة بالاحتباس الحرارى اللى بيتكلموا عليه فى التليفزيون والصحافة والكليبات؟ .. طب ليه برضه الناس كلها نزلت شغلها ؟!!انا متعوده انه بيوم اجازة رسمى احتفالا بقدومى هذا العالم النكدى وانى سبب بهجتهم الوحيدة على سطح الارض وفى قلب السما طب انا لازم اخد موقف واتصرف واتخلى عن التفكير المنطقى واتجه للتفكير الاستدلالى واطلع دلائل تثبت ان عيد ميلادى صيفى مش شتوى فتحت البروفايلين التانيين وقلت اشوف عيد ميلادى امتى ماهو برضه الزهايمر مخلاش حاجة للجهابذة اللى زيى بصيت لقيته فى يوليو ايوة هو يوليو ده اللى عملوا فيه الثورة لما عرفوا انى هاجى انا حتى فاكرة انهم اتحايلوا عليا امسك الحكم وانا رفضت تواضعا منى يعنى فتحت البروفايل التالت اللى بيحتفل بعيد ميلادى لقيت ان التاريخ مكتوب هو هون اللى فى الاتنين اخواته.. ايه الجنان ده بقى!!.. اتصلت بواحدة صاحبتى على التليفون سالتها النهاردة ايه قالتلى 29 ديسمبر مارى كريسماس ياسوسة.. طبعا مردتش عليها وقفلت فى وشها اتصلت بخالى اللى فى الداخلية عشان اساله على اللى بيحصل ليكونوا غيروا معاد الثورة ولا حاجة قالى "الحكومة تعمل اللى هى عايزاه ما تتدخليش فى اللى مالكيش فيه احتفلى وانتى ساكتة" وبناء عليه قررت انى احتفل النهاردة بعيد ميلادى وللى هيسالنى بقى عندك كام سنة يا سوسة هرد بكل فخر واقوله انا النهاردة تميت 23 سنة و5 شهور و7 ايام وياريت محدش ييجى ايده فاضية لان واضح ان عشان خالى واصل الحكومة قررت تحتفل بعيد ميلادى مرتين فى السنة كل نص سنة وانا طيبة

مش هتنازل عنك ابدا مهما يكوووووووون

2009-04-18T01:26:00.007-09:00

هى:حبيبى ..مش هتكلم بابا بقى عشان تيجى تتقدملى ونتخطب هو : نفسى اوى ياحبيبتى ما تتخيليش انا بحلم باليوم ده ازاى..بس اليومين دول مش هقدر هى: ليه ياحبيبى هو حصل حاجة هو: فى مشكلة كده كنت محرج اقولك عليها هى: خير ..فى ايه؟ طمنى قلقتنى هو: انا..انا...مش عارف ..مش عارف اقولهالك ازاى.. هى: فى ايه وقعت قلبى..حبيبى انت عايز فلوس؟ هو : لالا طبعا ..من امتى وانا بخلى واحدة ست تصرف عليا! هى:ليه بتقول كده هو احنا فى بيننا فرق ياروحى..بس مش ده المهم المهم قولى فى ايه هو: اوعدينى انك تفهمينى ..وحياة حبنا ما تزعلى منى واعرفى انى بحبك وبموت فيكى وهفضل احبك لاخر العمر. هى: طبعا ياحبيبى انا اللى بفهمك وبقدر ظروفك..قولى طمنى حصل ايه ارجوك؟ هو:انا..انا.. متقدملى عروسة!!! هى : هههههههههه..حبيبى انت بتهزر .. حرام عليك وقعت قلبى بجد ..كده تخض حبيبتك..هههههههه هو: انا .. انا مش بهزر..انا بتكلم بجد هى (مذبهلة): بتتكلم جد ازاى يعنى؟!! هو:فى واحدة كلمت ماما عليا عشان بنتها وللاسف ظروفها المادية كويسة جدا وماما بتضغط عليا عشان اوافق. هى:.......... هو: انا عارف انك مستغربة بس هو ده اللى حصل وانا مش عارف اعمل ايه؟ هى:............ هو: انا كلمت بابا فى موضوع جوازنا وهو مش قادر يقف ادام كلمة ماما انا مش عارف اعمل ايه. هى:............ هو: انا ... هى(مذبهلة ومتنحة): انت بتقول مينا تقدم لمين؟!! هو: حبيبتى انا مقدر رد فعلك وحاسس بيكى اوى بس انا مش قادر اقف ادام ضغط ماما وبابا وغير كل ده هى مستواها المادى والاجتماعى كويس جدا جدا .بتشتغل دكتورة وبتقبض 3000 جنيه فى الشهر ومعاها عربية وعندها شقة والاجهزة والتشطيب عليهم.. هى (وعينيها مبحلقين فيه):.................. هو: انا لما كلمت ماما قاتلى هى اللى انت عايز تتجوزها دى حيلتها ايه سورى يعنى ياقلبى ولا بتقبض كام لا هى من مستواها ولا انت من مستواها انت بتقبض 600 نيه بحالهم ودرجة تانية انما هى حيالله ب200 جنيه ودرجة رابعة ولاشقة ولا عربية ولا وظيفة كبيرة...سورى يعنى ياقلبى. هى: ...................... هو: حبيبتى انتى مش بتردى ليه..انتى زعلتى؟!!! هى(باستعباط): انا مقدرة الموقف اللى انت فيه..عشان كده هسيبك تشوف حياتك..انت عندك حق انا مش معايا لا حاجة من اللى عند العروسة اللى متقدمالك..مكنتش اعرف ان العروسة اللى بتكون نفسها دلوقتى..وانا مش عايزة اعذبك معايا واعرضك لكلام الناس واوقف حالك..عشان كده انا هسيبك تروحلها يمكن تكون احسن منى وتحبها. هو: حبيبتى لا ما تقوليش كده انا مقدرش ابعد عنك ابدا.. مقدرش اعيش من غيرك. هى(بمسكنة مستعبطة): لا ياحبيبى انا مش هرضى انك تستنى 10 سنين كمان على ما اكون مستقبلى واجيب حتى طن حديد ..روح اسمع كلام مامتك خليها تنفعك..

• ملحوظة • الشخصيات فى القصة مش خيالية وتمت للواقع بكل الصلة

انا اتسرقـــــــــــــــــــــــــت

2009-03-28T04:18:00.003-09:00

شفتوا المهزلة والخيبة اللى الحرامى فيها ال ايه انا اتنشل على اخر الزمن اتنشل وفى المترو وفى عربية السيدات وفى خط المرج حلوان منها لله هتمرمطنى فى الاقسام وفى السجق المدنى رايح جاى عشان اطلع بطاقة جديدة كانت خدت الفلوس وسابت البطاقة طيب لا الفالحة راحت سرقت المحفظة اللى فيها البطاقة وسابت الفلوس كلها وموبايل n95 مستعيراه كام يوم خااااااااااااااايبة شكلها لسة داخلة الكار جديد يلا اهى امها داعية عليها تشبع بالبطاقة بقى دول حتى كانوا كاتبين الوظيفة غلط بس برضه اله يشيل ويحط عليها اله اشوفها متعلقة فى ميدان التحرير فى رمضان وصايمة وفى شمس شهر 8 ومحدش معبرها وفى وقت الفطار الناس كلها بتفطر فى كنتاكى وهارديز ادامها وهى جعانة مش لاقية عضمة تهبهب عليها ولا المترو وهى نازلة منه ب5 محافظ يشنكلها فى بابه يفرمها والمحافظ تطلع سليمة وتتعرف ان دى الحرامياية ولا هو فالح يفرم الغلابة بس محدش يعرفلى واسطة يخلصلى موضوع البطاقة دة عشان انا اعصابى مش مستحملة اقسام وخناق مع العساكر والظباط تنتهى بيومين ع البورش ويكسب فيا ثواب؟ نهايته ربنا يسامحها بقى

مع او ضد

2009-03-16T09:02:00.001-09:00

لية الأهل والمجتمع كله بينبه على البنت ما تتكلمش لما يحصلها معاكسة أو تحرش أو أى حاجة ؟؟ وهل انت مع او ضد ان البنت تتكلم لو حد اتحرش بيها ؟؟ وليه؟؟

البنات عايزة إيه ؟؟

2008-12-27T11:07:00.004-09:00

كتاب \"البنات عايزه أيه\"

لـ \"بسمه عبدالباسط وبدرية طه\"

الكتاب يضم عدد من موضوعات مدونة البنات عايزة ايه

http://www.elbanatayzaea.blogspot.com

بالأضافة الى عدد كبير من الموضوعات لم يتم نشرها

الكتاب يصدر عن دار الكاتب للنشر والتوزيع

الكتاب هيكون موجود ان شاء الله فى معرض الكتاب

مستنينكم كلكم

ويارب الكتاب يعجبكم

جروب الكتاب

http://www.facebook.com/group.php?gid=41753698964

ياريت تدخلوا وتدعوا أصحابكم ليه

هى دى مصر يا هبلة

2008-07-27T12:10:00.005-09:00

ممدوح سالم برأوه

طبعا الكل معترض ومش فاهم اللى فيها

انا بقى بعد تفحيص وتمحيص من اللى انتوا عارفينه توصلت لسر البراءة

الراجل ده يا جماعة وطنى ...اه والله وطنى

ازاى انا هقولكوا

ممدوح اسماعيل عنده منظرومة جامدة جدا فى البيزنس اصل انتوا عارفين الناس دى بتشتغل فى كل حاجة

زى ما بيهربوا فلوس لسويسرا وعشان وطنيته بتنقح عليه وانه ازاى يطير فلوسه برة وبلده جوة يسيبها محتاسة يعنى .. لا طبعا ما يصحش يقوم يعمل ايه بقى

يقوم يغرق 1400 بنى ادم من اللى هما شحم ولحمد دول وبيجروا على قوت يومهم بالعافية ولما صدقوا راحوا اتمرمطوا وشقيوا وعملوا القرشين عشان ييجوا يجيبوا لولادهم لعبة اتحرموا منها ويبنولهم بيت يلمهم بدل الشقق الايجار الجديد اللى بتبهدل خلق الله دى ويعوضوهم عن الحرمان اللى شافوه فى غياب اباهاتهم

يقولم يصدر روحهم هما كمان لعذرائيل ويبقى بكده وفر للدولة مصاريف 1400 شخص ده ان كانوا بيصرفوا عليهم اصلا

ليه بقى

قولولى ليييييييييييييييييه؟

انا اقولكوا

عشان الدولة توفر حياة كريمة لاولاده بدل ماهما كانوا متشردين كده

ويعيشوا معزعزين مكركمين فى وطنهم حبيبهم

يبقى الراجل وطنى ولا لا

غرضة شريف ولا لا

ده قلبه بفتة بيضا

بس انتوا اللى ما تعرفوهوش

بلاش ظنونكوا الوحشة دى.

***************************

سمعت عن انهم عايزين ياجلوا الدراسة لبعد العيد يعنى فى اكتوبر تقريبا

والامتحانات بتبقى نص ديسمبر

افهم من كده ان الطلبة اول حصة ليهم عنوانها مراجعة على ما لم يتم دراسته؟

رسالة استثنائية

2008-06-20T08:15:00.003-09:00

طبعا احنا عارفين الاضطهاد الفكرى الثقافى العنصرى الاجتماعى التعليمى النفسى العصبى البدنى العنيف القذر ...الخ الخ الخ

اللى بيتعرضله طلبة الثانوية العامية الله يحرقها يارب(مش عارفة بس لو مكنتش عامية كانت عملت فيهم ايه اكتر من كده) وحالة الهطل اللى اصابت وزارة التعليم واللى حطوا اللى امتحانات الهى ربنا يشيل ويحط عليهم والكوووووووووووووووووووووووووسة اللى ماشية فى اللجان وتظبيط ولاد الكبار على حساب الشعب بحالة عشان لما هما يجيبوا مجاميع عالية يدخلوا كليات القمة الحكومية لوحدهم ويتمتعوا هما بالتعليم اللى المفروض انه مجانى اصلا وبيستهبل وبيدفعنا فلوس اد كده برضه وعشان مع الوقت يشتروا الكليات الحكومية اللى مش هيبقى فيها غير 10 فى كل كلية هما اللى (تفوقوا) وجابوا المجاميع ويشتروا الكليات ويخصخصوها ونرجع لعصر الاقطاعيين تانى وفيلم رد قلبى والقاهرة 30 ... الخ الخ الخ

فرجاء

من النهاردة لحد ما يخرجوا من لجنة الجبر بكرة الساعة 12

نفضل ندعى للطلبة الغلابة دى

يمكن ربنا يكرمهم ويجاوبولهم سؤالين كده يستروهم ادام نفسهم

ويرفعوا من روحهم المعنوية اى حاجة

وندعى ربنا يهد المفترى والظالم وابن الحرام مع انى عارفة ان الدعوات كمان مبقتش بتجيب معاهم نتيجة الظاهر محجبين نفسهم بس ايا كان الموقف

لازم ندعيلهم

مش يمكن!!!!

عصر الوكسة

2008-05-12T05:41:00.007-09:00

سنة 1967 كان فى النكسة سنة 2008 فى الوكسة لا الوكاســــــــــــــــــــــــات

ونجاملكم فى الافراح ان شاء الله

تتظبط ولا تتفوتر

2008-03-31T10:09:00.002-09:00

مين اللى هيظبط ومين اللى هيتفوتر

بيقولوا طلعوا قرار بفوترة الجن والعفاريت

وعشان المبدأ والقدوة الحسنة فهما فوتروا بتاع اعلاناتهم كمان حقــــــــــهــــــــــم

بنى ادم مع وقف التنفيذ

2008-03-22T02:39:00.002-09:00

مجموعة قصص جميلة جدا جدا لمحمد التهامى صاحب مدونة بنى ادم مع وقف التنفيذ حفل التوقيع ان شاء الله هيكون يوم الجمعة 28 مارس الساعة 6 مساء فى عمر ستور وعشان الناس اللى بتحب تتحجج وتقول مش هروح عشان معرفش العنوان انا هقولك عمر ستور عنوانها فى شارع طلعت حرب فوق مطعم فلفة طبعا كلنا لفين وسط البلد دى وعارفين فين طلعت حرب وفين فلفلة كتير من البلوجرز هيحضروا وانا كمان ان شاء الله هنستناكوا تشرفونا حفلة التوقيع والف مبرووووووووووووووووك ياتهامى عقبال الكتاب ال100 ان شاء الله

فى ايه؟

2008-03-10T05:28:00.001-09:00

بيجيلى فيروسات كتيرة فى الكومنت هو فى ايه بالظبط؟؟!!

راحت عليكى ياطوابير

2008-02-23T09:09:00.008-09:00

كل المصريين اشتكوا من طوابير العيش والصحافة والاعلام ومجالس النميمة كلها ناشدت الحكومة انهم يلاقوا الحل اخيرا الحكومة اتصرفت لغت العيش خالص عشان الناس ترتاح ونــعـــــــــــــــــــــم الحكومات طب الناس تصحى من الفجر بعد كده ازاى الساعة البيولوجية بتاعتهم هتبوظ وصحتهم هتتدهور عشان هيتعودوا على الكسل بدل ما كانوا بيصحوا من 4 الفجر يقفوا ادام الفرن لحد الساعة 9 ويتأخروا على الشغل ويتخصملهم يوم ويوفروا للدولة هيتاخروا على ما يصحوا وهيروحوا اشغالهم فى معادهم وهيخلوا الدولة تدفع المرتبات كاملة طب ده يرضى ميييييييييييين بس وعلى راى الست مارى انطوانيت ربنا يفشفش الطوبة اللى تحت راسها بدل مفيش عيش كلوا بسكوت ولا اقولكوا كلوا كوسة

كل عيد حب وانتوا مفلتنين

2008-02-08T07:28:00.002-09:00

طبعا انا عارفة انى بتاخر كتير على ما اكتب فى البلوج لدرجة ان الناس اللى بيزورونى طفشوا بس معلش بقى ياجماعة انا خلاص استوظفت من اول الشهر وبقيت فيرى بيزى نسبيا يعنى بس ده ما يمنعش انى بشيك على اعمالى على الانترنت من وقت للتانى وبالنسبة لاعضاء جروب مهزلة ونقابة اللى حب ولا طالش اللى على الفيس بوك انا بعتذرلهم انى مش قادرة ادخل بس عشان الفيس بوك حلف فجأة انه ما يفتحش من جهازى خالص للاسف وانا مش لاقياله اى حل غير انى لما اعرف اسرق شوية وقت من عند حد من قرايبى كده انى ادخل اشوف ايه الاخبار واظبط الجروب على قد ما اقدر نيجى للمهم بقى طبعا عارفين يوم الخميس اللى جاى .. ايون هو اللى جاى على طول ده هو يبقى اليوم الاحمر يوم الفالرتايم(الفالنتين للى ما يعرفوش اسمه الجديد) عشان كده بقول لكل المرتبتين والحبايب والمتجوزين هانى فالرتايم داى ياجماعة وبقول لكل الغلابة اللى زيى كده اللى مش هيفلتنوا محدش يخرج من بيته يوم الخميس والا هو حر.. وقد اعذر من انذر انا عملت اللى عليا وحذورتكوا اليوم ده هيبقى كله احمر فى احمر وقلوب والكورنيش كله هتلاقوا عليه كل اتنين قاعدين يسبلوا لبعض واحنا نبقى ماشيين كده زى عوانس الفرح اى نعم الدباديب والقلوب واللون الاحمر طاغى اليومين دول اه وانا شخصيا بعمل نفسى عندى عمى الوان وبعدى عاااااااااااااااااااااااادى وبعمل نفسى مش شايفة محل الهدايا اللى تحت الشغل بتاعى ولا اللى على ناصية الشارع بتاعنا خاااااااااااااااااااااااالص بس يوم الخميس الحاجات دى هتتقلب هدايا وكل واحدة تشوف واحد ماسك هدية حمرا ومعدى جنبها كده من غير مايسال فيها اكيد اعصابها هتتعب واليوم يقلب غم ونكد عشان كده نصيحتى اللى تشوف واحد ماشى بهدية حمرا طلعى رجلك كده ادام شوية وكعبليه خليه يقع تتكسر رقبته عشان يحرم ما يراعيش شعور الناس الغلابة اللى زينا تانى ما احنا برضه بنات ناس ولا هى المحروسة اللى رايحلها دى هى الوحيدة اللى بنت ناس يعنى.. قلة ادب صحيح والشباب اللى زى الورد الغلبان السينجل اللى زى حالاتى دول برضه لو شافوا بنت ماشية عاملة شعرها كيرلى ولابسة بدى ربع كم فى عز البرد وبنطلون كراش وبوت طويل مدخلة فيه رجل البنطلون عشان محدش ياخد باله انها واخداه من بنت الجيران اللى اصغر منها ب10 سنين ..طلع رجلك 2 سم ادامها وكعبلها انت مش احسن من البقف اللى هتروح تقابله ويلهف هو الهدية انت اولى طبعا. والناس بقى اللى مش لاقية تاكل زى حالاتى برضه ونفسها يجيلها هدية انا جبتلها الحل المتين انتوا تجيبوا باكوا شمعدان الشبهح اللى لونه احمر ويلفه لفة محترمة كده من اللى بتيجى فى التى فى بشرط يكون لون اللفة احمر فى روز عشان الفالرتايم يعنى وهات كارت واكتب فيه احبك للابد وافضل اتفرج عليه طول اليوم او خدها وحطها فى شنطة شيك ولف بيها فى الشوارع عشان كرامتك اللى اتبعزقت فىا ليوم ده ترجع تانى .. وربنا يهدى اللى اتعموا دول بقى احنا مش بنشوف اليوم الاحمر ده الا كل سنة مرة..هييييييييييييييييييه(بتنهد) ياقوىىىىىىىىىى ************************** ملحوظة الفالرتايم هو الفالنتين بس للى مش مرتبتين

القدرة المصرية وتطوير الهندسة الوراثية

2008-01-18T04:09:00.000-09:00

كثيرا ما قرأنا وسمعنا وقولنا ذلك المثل الشعبي الحكيم ((اكفي القدرة على فمها .. تطلع البت لامها)) وكثيرا ما صدمتنا تلك التحريفات البذيئة في تراثنا الحكيم من قول بعضهم ((اكفي القدرة على فمها ... يدلق الفول منها )) !!! ... إذا ماذا لو كان بالقدرة حمص أو فاصوليا ؟؟؟ ((هيدلق الفول منها برضه !!! ))

عقول غريبة واستهزاء بحكمة متوارثة عبر الأجيال أثبت العلم الحديث مدى صدقها وأنها نظرية يجب أن توضع في عين الاعتبار أثناء دراسة "الهندسة النظرية"

ومن هنا وضعت دراسة تحت عنوان ((خفايا القدرة المصرية ... لتطوير الهندسة الوراثية)) اجتهد في هذه الدراسة كلا من "محمد علي كلاي " و " محمد علي باشا " و "شارع محمد علي" رغم أن هذا الأخير كان حديث العهد بالعلوم التطبيقية لاهتمامه المستمر بالفنون " التهشيكية" (1)جائت هذه الدراسة على ثلاثة محاور رئسية اعتبروها أنها اساس بحثهم العلمي البحت , كانت هذه المحاور كما يلي :-

1- الأسس التاريخية للنظرية

2- الفكرة التطبيقية للنظرية

3- تطبيق النظرية في العهد الحديث

............................................أولا :- الأسس التاريخية للنظرية :-

اتضح من خلال الكشف الأثري لبعض المواقع الفرعونية وجود آثار لقدر التدميس وعلب فول أمريكانا وفحل بصل تفوح منها رائحة وكأنها رائحة عرق عم سيد الذي يقف على نصية شارع محمد علي , ومن خلال البحث المستمر تم الوصول الى أن الفراعنة كانو يعيشون في عصر طبقي رهيب فالبعض يأكل فول أمريكانا والآخر يشتري الفول من عربات الباعة الجائلين والبعض يضطر لتدميس الفول في القدر الفخارية

.صورة احدى النقوش المكتشفة

ثم كشفوا عن رموز منقوشة في موقع يسمى " نايس نايت" (2) ... جاء في بعض هذه النقوش :--

فين القدرة يا ولية ... ده بنتي عيونها عسلية

- يا داية بسرعة هاتي القدرة ... عايزن البت لامها عنيها خضرة

- حطو في القدرة مانجة ... والبت وسطها كمنجة-

وخلاف ذلك من نقوش عريقة أثبتت ارتباط القدرة منذ قدم العصور المصرية بالتأثيرات الأيدلوجية لاختيار الصفات الوراثية .وتطورت النقوش حتى باتت في صورتها العصرية ((اكفي القدرة على فمها .. تطلع البت لامها))

ثانيا :- الفكرة التطبيقية للنظرية :-

عكف لفيف من الأساتذة والعلماء للتوصل الى الكيفية العلمية لنظرية القدرة عند قدماء المصرين حتى توصل "شارع محمد علي" الى المهية الجوهرية في العلاقة بين القدرة والهندسة الوراثية وذلك من خلال علمه الضخم بالفنون " التهشيكية" ... فقد اتضح له ومن خلال منظور خاص جدا ذلك الترابط بين شكل المرأة الخارجي ونتوءات جسدها وبين جسم القدرة الخارجي والتفافها حول نفسها

.رسوم توضيحية لما توصل اليه شارع محمد علي من العلاقة بين القدرة والمرأة

أثبتت رؤية "شارع محمد علي" صحة المقول للعالم أجمع .... وللمعاداة المستمرة من قبل الغرب لنجحاتنا المتوالية سرب الغرب الاشاعات حول النظرية من دلق الفول وخلافه

ثالثا :- تطبيق النظرية في العهد الحديث:-

أثار أحد المستشرقين الموالين للغرب سؤال ساذج جدا ليبهرنا بسؤاله الذي يقول (ماذا لو وضعت القدرة على وضعها الطبيعي ... هل ستصبح البنت لابوها ؟ .. أو اذا القيت على جمبها فهل ستموت البنت ؟؟؟ )

أثار هذا السؤال بلبلة من الضحك الهستيري لسطحية التفكير ... وبعد أن كال له "محمد علي كلاي" بعض الاجابات في صف سنانه الذي تكسر بعدها بالطبع ... كان مفيد هذه الاجابات انه ليس الفكر في جمبها وفمها ... انما الفكرة في القدرة ذاتها ... وحين سأل آخر (لماذا تنص النظرية على فمها ) ... أجابه "محمد علي باشا " ... (القافية حكمت يا سيدي وبلاش تلامة)

وأخيرا ... انتهى البحث ... وانتهت الدراسة المذكورة بالتوصل الى مدى نباهة أمثالنا وحكمنا العربية وأنها ليست مجرد كلام في الهوا الى اللقاء في حكمة جديدة ان شاء الله

ــــــــــــــــــــــــــــــــــــــــــــــــ

1) اسم الفن مأخوذ من نظرية "الهشك بشك " لمؤلفها شارع محمد علي

2) نايس نايت ... اسم كباريه أقامه الفرعون الروش عقب عودته من رحلته التعليمية في باريس

ليس منقول ... ولا ملطوش ... ومش مسروق ... باختصار من تأليف

الشاعر : محمد عبده

وجدتهاااااااااااااااااااااااااااا

2008-01-04T16:32:00.000-09:00

انا قعدت افكر اكتب فى ايه ولا ايه اصلى حسة بزحمة فى دماغى اليومين دول وياريت على حاجة عدلة

المهم قررت انى اكتب عن اخر تطورات الفراغ اللى عندى والكبت والاحباط نتيجة خنقة البيت والوظيفة اللى مش عارفة اشتغلها وعدم المذاكرة والدح واللى كانت بتشغل وقتى ودماغى طول الوقت وده لطبعا انى خلصت دراسة (للاسف الشديد) فقلت ادخل الفيس بوك كده عادى زى ما اى حد بيدخل وطقت فى دماغى اعمل جروب اسمه نقابة اللى حب ولا طالش بالظبط بنفس الموضوع اللى كنت كتبته زمان هنا فى البلوج واتنشر فى مجلة كلمتنا بنفس الاسم برضه وبعد التفحيص والتمحيص وزيارات واشتراكات الاعضاء وفضفضاتهم ورسايلهم اللى بيبعتوهالى

وباستثناء شوية الشباب اللى داخل يظبط شوية بنات والسلام فاكتشفت ان الناس كلها متعقدة حتى انا اتعقدت من تعقيد الناس وطبيعى ان اسباب التعقيد حاجتين

فيهم تانى حاجة سبب لاول حاجة

والسبب التانى اللى هو فقدان الثقة فى النفس اللى هو بيحصل نتيجة السبب الاول والرئيسى الا وهو (المشاكل) بمختلف اشكالها وانواعها ومصادرها ومقاساتها عشان المشاكل دلوقتى بقت بالمقاس فى مشكلة تافهة وفى مشكلة عبيطة وفى مشكلة كبيرة وفى مشكلة عويصة اللى بنسميها مصيبة كفانا الله شرها

وبالتالى انا خفت على نفسى وعلى حالتى النفسوية من الاحباط اللى داخل عليا بدموع التماسيح عشان يستوطن داخلى ويخلينى افقد الثقة فى نفسى وفى حياتى المستقبلية ويدمر مستقبلى وحياتى ويخلينى اشوف الدنيا سودا يعنى اتعمى وانا اعتقد ان كفاية الواحد يشوفها بيضاء مدية على رمادى شوية واهه الاهتمام بنظافة الشكل يحافظ على جمال الرونق ويمكن مع الوقت تفتح شوية

اكتشفت حاجة خطيرة جدا بما انى مكتشفة عظيمة فى النوع ده من الاكتشافات

ركزوا معايا بقى عشان هقول الحل لكل المشاكل اللى احنا فيها دى

****************

دايما الحاجة اللى بنحبها وبتبقى حلوة فى حياتنا بتضيع مننا

لييييييييييييييييييييييييه؟؟؟؟

اكيد عشان بنحبها

وعشان المشاكل لما بتيجى بتطير الحلو من حياتنا

بالظبط زى الست لما تلف على راجل كده وتاخده من مراته

طب ليه المشاكل دايما بتجرى ورانا بالمشوار

ليييييييييييييييييييييييه؟؟؟؟

اكيد عشان ش بنحبها ولا بنطيقها

وعشان تضيع الحاجة الحلوة مننا

طبعا واضح ان فى علاقة عكسية بين اللى بنتمناه وبين اللى مش بنتمناه

فبالتالى لو عكسنا العلاقة العكسية وخليناها عكسية عكسية هتبقى النتيجة فى صالحنا

يعنى لو حبينا المشاكل وسبلنالها بعنينا ورمينالها طرف الحنية مش بعيد المشاكل تخاف وتتفزع وتجرى مننا بالمشوار

واحنا نقولها تعالى ياحبى يا حياتى ده انا بدور عليكى من زمان وهى تفضل تجرى تجرى لحد ما يتقطع نفسها

ده احنا حتى ممكن نسيطر عليها لدرجة اننا نقول

مشكلة سعيدة

او صباح المشاكل وانت مبتسم كده وبتلعب حواجبك

طبعا راى عبقرى وحل اعبقر منه

يلا بقى

كل مشكلة وانتوا طيبين

جديد

2007-12-06T07:17:00.000-09:00

الحب مش بالعافية

حصريا

على

حكيم روحانى حضرتى

حبة كده على ما قسم

2007-12-04T02:50:00.000-09:00

انا على فكرة عمرى ما حبيت قعدة البيت رغم انى بيتوتية دية وبموت فى قعدة البيت عارفة انكوا هتقولوا ايه الهبل ده بس عادى انا متعودى على كده ومع انى مش بحب الوحدة بس بحب ابقى لوحدى جنان مش كده لانى بالرغم من انى كسولة جدا فانا بحب الشغل جدا جدا طبعا هتقولوا ايه العبط ده بس برضه مش هرد عليكوا عشان انا بالرغم من انى بمل بسرعة جدا وبحب التغيير مش بحب حاجة بعملها تمشى فى ترتيب او فى خطة غير اللى مرسومالها منى او من غيرى بدل مقتنعة طبعا هتقولوا ان دور البرد اللى جالها ودمرلها حنجرتها كل دماغها تفتكروا كده..؟

عود احمد وعلاء وايمان ومنى وكله ان شاء الله

2007-11-25T04:32:00.000-09:00

احم احم

اسفة للغيبة الطوييييييييييييلة دى كلها

واسفة على كل الناس اللى سابت كومنت عندى وانا ماردتش عليهم

بس انا معذورة ياجماعة

العيب كان فى الويندوز

كان حالف ما يفتح البلوجر ولا اللفيس بوك

وكان بيفتح اللى على مزاجه ويقفل اللى على مزاجه

ليه حق بقاله 7 شهور ما اتستبش غيره

وجاب اخره معايا

ما انا اصلى طلعت عينه شغل

واخويا نفضلى الحقيقة ومكنش راضى يستبلى غيره بحجة انه لسة شغال

وانا خيبة فى التستيبات دى

بس الحمد لله الويندوز القديم انتحر

واخويا حن عليا وستبلى مش اى ويندوز

ده فيستا

ادعولى ربنا يصبرنى عليه

وربنا يهديه ويصبره عليا

وان شاء الله فى عودة قوية

2007-09-17T11:37:00.000-09:00

سؤال جديد على

حكيم روحانى حضرتى

رمضان كريـــــــــــم

2007-09-17T11:28:00.000-09:00

رمضان يقلل من قدرتك على الثرثرة

2007-09-12T05:53:00.000-09:00

بيروت / في دراسة جديدة تناولت دور الصيام والتخفيف من ثرثرة النساء، أظهرت النتائج أن الجوع خلال ساعات النهار في رمضان قد يقلل من قدرة المرأة على الكلام، ويجعل من تجاذب أطراف الحديث فيما بينهن مسألة أكثر صعوبة. وتبين من نتائج الدراسة أن امتناع المرأة عن تناول الطعام والشراب لمدة طويلة تراوحت من 14-18 ساعة، أدى إلى معاناتها من إجهاد صوتي، كما تطلب الحديث بالنسبة لها بذل جهد أكبر للفظ الحروف وإخراجها بشكل جيد

***************************

سبحان الله بقالى 20 سنة مش بعرف ارغى بمزاج الا فى رمضان.

ارحموا امريكى قوم ذل

2007-09-10T13:22:00.000-09:00

موقف وحصل

خلانى احس بمليون رد فعل مع بعض

طبعا معظمهم خنقة ونرفزة وعصبية وشد شعر

مش عارفة هلاحق على الناس شعر منين

اللى حصل بقى يا جماعة الخير ان احنا لينا قرايب فى امريكا

جه اصغر واحد فيهم زيارة بقى

وكنا قاعدين ومبسوطين طبعا اننا اخيرا شوفنا قريبنا ده

لان العلاقات بيننا كانت شبه مقطوعة لحد ما دخل الانترنت ونور حياتنا

وفى قعدة من القعدات العوائلية التى تصيب بحالة التخمة الفكرية

كل الكلام اللى كان بيدور فى وجوده عن الاسعار اللى بقت نار وعن العيشة اللى بقت تزهق

وعن الدخل القومى اللى بيضيع فى المواصلات وعن فلوس المترو اللى مش عارفين بتروح فين

الخ .. الخ.. الخ

ويوم ماعينى الولد الغلبان قال انا مواطن امريكى مصرى

حسيت ان ثورة يوليو قامت من تانى

ازاى تقول انك امريكاوى

انت مواطن مصرى ابوك مصرى وامك مصرية يبقى انت كمان مصرى

وهو غلبان ياعينى اتصدم من منظر الثورة الشعبية اللى قامت عليه

قال لما اقصر المواضيع

قالهم انا مسلم امريكى مصرى

مايعرفش انه جنى على نفسه

قامت الثورة من تانى

وحسسونى كانه عايش طول عمره فى مصر وجه دلوقتى اتنكر منها

ياجماعة

يابشر

الراجل ده جنسيته الاولى امريكاوى

مكتوب فى الباسبور

امريكان سيتيزن

منين جبتوا مصراوى سيتيزن دى

وبعدين هو بعد كلامكوا عن مصر والى بيحصل فيها وكل حسدكوا عليه انه عايش امريكاوى ولا على باله اللى بيحصل هنا

دلوقتى مصر بقى حلوة

وعار اللى يدخل اويقول انه مش مصراوى يعنى

شئ غريب عجيب مريب حقيقى يعنى

ياناس ارحموا امريكى قوم ذل للمصريين

هو معترف انه مصراوى بس دى جنسيته التانية

ليه تعملوا فيه كده

عقدتوه وعقدتونى

حسبى الله ونعم الوكيل

2007-08-28T07:54:00.000-09:00

مدوناتى مغلقة للابد

وكمان الايميلات

حكيم روحانى حضرتى كلاكيت تانى مرة

2007-08-12T04:16:00.000-09:00

ادخل شوف اخر الموضوعات

ان ان انننننننننننننن تشششششششششش

انا والمترو والـ.. حسبى الله ونعم الوكيل

2007-08-05T22:40:00.000-09:00

احم احم

ربنا يستر علينا

اصل الموضوع بجد صعب

وابتدى يدخل معايا فى منحنى الخطورة الصحية والنفسية وانا واحدة وخايفة على نفسها ومش مستعدة للانتحار الاجبارى ده

طبعا فاكرين موضوع ايه حكاية المترو والعقدة اللى جاتلى بمجرد ماعرفت موضوع التهديدات مع دخولى فى يوميات احتفالى بعيد ميلادى اللى مالهوش ملامح ده

ونظرا لحالة الرعب اللى انتابتنى فى الوقت ده انا قررت ااجل سفرى حبتين لحد ما يفجروا المترو او يولعوا فيه

ما انا اصلى ياجماعة مش عايزة اقاطعهم فى اكل عيشهم واشيلهم ذنبى

اصلى بت جدعة وقلبى على الناس كلها

واللى هيفجروا المترو دول اكيد اصحاب عيال

مايرضينيش انهم يتيتموا بسببى يعنى

بس بعد شوية تفكير عميق انا قلت الاعمار بيد الله والواحد لما يموت شهيد احسن مايموت من الخوف وانا نفسى اموت شهيدة وادخل الجنة

وطز فى اللى هيفجروا المترو وعيالهم هو انا كنت خلفتهم ونسيتهم يعنى

ولا انا ولية امرهم

خدت بعضى ولميت حاجاتى ومحتاجاتى ونطيت فى اول عربية نازلة القاهرة طبعا مع بابا لتفتكروا ان الشجاعة خدت حقها معايا

بس هووووووووووووووووب استنوا

بابا جه عند المترو ولسة هننزل محطة احمد عرابى وقالى استنى ياحلوة

(اول مرة يقولهالى فى حياته على فكرة)

قالى خدى حق التذكرة وطريقك اخضر اصلى مستعجل وهاخد تاكسى

قمت غمزتله غمزاية حلوة كده وقلتله المترو اقربلك

قالى لا اصل لسة عندى كام مشوار

قلت بس بابا شكله متفق مع اللى هيفجروا المترو عليا عشان يهرب من هدية عيد ميلادى اللى مجابهاش

باهباهات اخر زمن

بس الحمد لله جت سليمة

ودعت بابا ونزلت وانا عمالة اقرا قران وادعى ربنا انى اروح سالمة غانمة

(وحصل الحمد لله بالذات موضوع غانمة ده:))

لقيت الناس بتتفتش

قلت يابت كرامتك حاسبى عليها محدش يخطى برجله عليها خدت شنطتى على كتفى واتعنتظت ومشيت شبه الديك الرومى النافش ريشه ولا عبرت لا عسكرى ولا ظابط ونزلت نطيت فى اول مترو قابلنى فى عربية السيدات

ما انا اصلى اخاف اركب فى العربيات المشتركة ليحصل فتنة بين الشباب اللى فى المترو ويحصل مشادات كلامية ومناوشات تؤدى الى فتح الدماغ بالشوز اللى فى رجلى

بس صراحة لقيت المترو شكله يفرح ومنور وفاضى وهواه يرد الروح

وصورته للذكرى الخالدة اصلى مش هشوفه كتير

طبعت روحت البيت حلوة ومزأططة وعشت حياتى

****

تانى يوم كان بابتى عاملى رحلة متروهية تاكساجية لمستشفى العيون

اصل بعيد عنكوا العبقرية خدت حقها معايا شوية وطلعت عينى

فروحت عشان ارجعها تانى

خدت المترو وكان حلو وتمام وقضيت اليوم مع بابتى فى الهوسبيتال وبعد معاناة البحث عن العلاج

مالقتهوش ورجعت

خدت المترو من محطة محمد نجيب كان المترو حلو وايزى وزى الفل زى الصورة اللى فاتت كده قلت حلو كده يابت ده النهاردة كمان هتروحى مزأططة

طلعت عشان ابدل من محطة سى انور بيه السادات فضلت مستنية ييجى تلت ساعة كده

ان ييجى امترو.. ابدااااااااااااااا

استنيت 5 كمان

ان ييجى المترو.. بتاتاااااااااااا

فجأة وبعد انتظار طويل جه سيادة المترو وطبعا كانت مصر كلها راكبة وانا مش عايزة اقول للسادة الرجال الافاضل ان عربية السيدات بتبقى بعيد عنكوا العن مليون مرة من العربيات المشتركة

ونظرا لان الساعة بقت 11 ونص وانا لسة فى الشارع فانا مركبتش المترو ده وقلت تاخير بتاخير استنى اركب واحد نضيف ده مكنش فيه خرم ابرة تطريز ينفع ادخل فيها

استنيت

واستنيت

10 دقايق والمترو التانى جه سبحااااااااان الله الناس مكنتش كتير ساعتها

قمت هووووووووووب نطيت فى اول عربية ووقفت جنب الباب عشان المترو ده الحمد لله لغوا منه التكييفات والمراوح فكان لازم يبقى فى عندى متنفس للهوا ماهو انا مش بطلة سباق نفس ياجماعة

محطة بعد محطة

بصيت لقيت العربية بقت بالشكل ده

طبعا ده قبل ما الموقف يتطور وابقى ان وباب المترو عبارة عن كيان واحد

طبعا مش ده كل اللى حصل

كله كوووووووووووووم واللى الستات بيعملوه كوووووووووووووووووووم

ده الواحدة تبقى داخلة حلوة وعايقة ومتضايقة ومتزوقة ومتبرفنة ومستحمية

بتخرج شكلها زى اللى دايس عليها قطر

من كتر الزحمة وريحة العرق اللى مالية العربية ياسااااااااااااااااااتر بجد كان هيغمن عليا من الريحة وتلاقى الست من دول جاية تلزق فيا

من جمال ريحتها يعنى 11 محطة اغمن عليا فيهم 11 مرة

حراااااااااااااااااااااااااام

طب اعلانات مزيلات العرق اللى مالية الشوارع والارصفة والتى فيهات دى بيعملوها ايه

تعمل ايه شركات التعطير القومية اكتر من كده

مش هاين عليكوا حتى تشتروا ازازة برفان من الراجل اللى بيقف على محطة المترو ب2 جنيه ونص

والله ليهم حق الرجالة يطفشوا مننا

سوأتوا سمعتنا منكوا لله

هى العنوسة جت من شوية

ماهو من اهمال الستات ولا هما عشان اتجوزوا يعنى خلاص ييجوا على البناتيت القطاقيط الغلابة اللى زينا يعنى

يووووووووه خرجونى عن الموضوع

المهم

فى نوع ستات تانى بقى فى عز الزحمة وعز الحاجة للتعاون بين الناس تلاقيهم دخلوا قلعوا الشوزات والشباشب بتاعتهم وقعدوا ومددوا على الاض

وكل اللى فى العربية يخبطوا دماغهم فى اكبر حيطة فى اكبر محطة

ولو قولت لواحدة لو سمحتى بس وسعى شوية مش عارفة اقف تحسسنى انى جيت على حاجة من املاكها

هفففففففففففففففففففففففففففففف

ستات تخنق بصحيح

والله الواحد مبقاش عارف يعمل ايه عشان يعرف يركب مترو

معلش طولت عليكوا

والله اختصرتلكوا ده الرحلة من انور بيه السادات للمطرية طوييييييييييييييييلة

والحمد لله انى كنت جنب الباب

حكيم روحانى حضرتى

2007-07-30T12:17:00.001-09:00

حكيم روحانى حضرتى

اسم المدونة الجديدة اللى انا عملتها

هى جديدة اوى

زوروها وشوفوها

ولو مش حلوة قولوا مش حلوة

مفاجأة عيد ميلادى

2007-07-22T12:10:00.000-09:00

انا اسعد واحدة فى الدنيا دلوقتى حالا

اول هدية تجيلى فى حياتى بالشكل ده

واول هدية تجيلى فى عيد ميلادى ده

بجد احلى واجمل هدية جاتلى

(مجاليش غيرها بس باعتبار ما سيكون يعنى)

الهدية

محمد حمدى

رنا

اسماء

مختار

مصطفى فتحى

تهامى

بجد مفيش كلام يتقال بعد المفاجأة دى

ربنا يخليكوا للغلابة اللى محدش بيعبرهم فى عيد ميلادهم زيى كده

محمد حمدى

بجد تسلم ايدك الديزاين حلو جدا

كمان الف مبروك ليك على نجاحك

خلاص ياسيدى خدت البكالريوس وهتقعد تبيع درة وجرايد وورد فى اشارات المرور

يلا اهه حال الدنيا

بقيت عاطل بالاوراق الرسمية انت كمان

بجد ربنا يخليكوا ليا

وكفاية كده عشان مش لاقية كلام وحسة انى ههبل

ايه حكاية المترو

2007-07-22T06:30:00.000-09:00

هو ايه اللى ممكن يحصل فى مترو الانفاق وانهى خط فيهم بالظبط انا عايزة اطمن على نفسويتى يعنى ماهو ماينفعش ما انزلش القاهرة بكرة او بعده بالكتير المفروض كنت انزل النهاردة وقلت خافى على نفسك يابت بيقولوا فى تفجيرات وبكرة عيد الثورة اللى هو عيد ميلادى ومش عارفة الارهابيين هيحتفلوا بعيد ميلادى السنة دى ازاى المرة اللى فاتت كانت فى شرم المرة دى هتبقى فين بالظبط ياخووووووووووووووفى يابدران يعملوها وانا فى المترو الواحد مقلق مش معقول يعنى احتفل بعيد ميلادى بقنابل مش بشموع زى البنى ادمين *** نـــــــــــــــــــــــــــــــداء منى الى الارهابيين اللى عاييزن يفجروا المترو بلاش يوم عيد ميلادى وبلاش وانا فى المترو اشمعنى يعنى عيد الثورة ده حتى بقى يوم مفقوس ومكشوف اوى اختاروا يوم غيره حتى علشان ماتتعبوش فى الحزام الامنى اللى بيتفرض عشان انا ماشية فى الشارع مش هيسيبكوا فى حالكوا انا بحذركوا بــــــــــــــــــــــلاش انا بلاش بكرة انسونى سنة واحدة عايزة احتفل بعيد ميلادى ياناس وسط اهلى كده كتير مش هيبقى معتقل فى البيت كمان يوم عيد ميلادى ماهو لازم اركب المترو والخطين يابشر

رسالة من فقاعة

2007-07-18T11:23:00.000-09:00

بلاقى هجوم عجيب عليا مش عارفة ليه

كل شوية الاقى حد يقولى انتى ازاى ما بتكتبيش عن الحدث السياسى اللى حصل فى غزة

او فى لبنان

او فى العراق

او الهجوم اللى حصل فى المنطقة الفلانية فى القاهرة

والمشكلة انه بيبقى هجوم

وبحس احيانا ان اللى بيكلمنى بيبقى نفسه ينط من الشاشة

يطلع يدينى قلمين ويرجع تانى

كده تقريبا هيرتاح والبلاد العربية تتوحد

وحقنا يرجع

ومحدش هينام من غير عشا

والكل هيقبض بالدولار

*****

طب انا عايزة افهم يعنى

هو انا خبيرة سياسية؟

حد قال انى سفيرة عن الوطن العربى؟

حد قال انى فاتحة جمعية خيرية لمتشردى الحرب؟

حد قال انى ماسكة قناه اخبارية بغطى فيها الاحداث السياسة؟

حد قال انى مقتنعة بحاجة اسمها مشكلة سياسية من اصله؟؟؟؟؟؟

*****************

احب اوضح ياحضرات اذا سمحتولى

انا اولا مش سياسية

مش خوف لان الحمد لله لما بحب اتكلم بتكلم

وكل اللى يعرفونى عارفين

لكن ببساطة شديدة

مش غيرى يغلط وانا اتحمل مسئولية غلطه

ثانيا

انا مش هتكلم على شئ ماشفتهوش

ومش هتكلم ولا هناقش ولا هشجب ولا هعترض الا على شئ شفته او كنت فى ارض الواقع على الاقل

زى ما حصل قبل كده فى موضوع جامعة المنوفية

ثالثا

انا اتعلمت مااعتمدش غير على اللى اشوفه بعينى واسمعه بودنى

وكل الى بييجى فى التليفزيونات والفضائيات

متمنتج اكيد حرصا على سلامة العلاقات الدبلوماسية بين الشعوب

رابعا

انا مش هغير شئ لو طلعتلى فتوى او فتوتين فى السياسة

ممكن اللى عايز تغطية سياسية يفتح التليفزيون عندهم ويسمع اللى هو عايزه

او يفتح اى جريدة ويقرا الخبر اللى يريحه

خامسا بقى

المدونة دى مفيهاش حاجة جد

هى محاولة للتنفيش عما بداخلى

يعنى تهييس

محدش يقولى سياااااااااااااااااااااااااااااااااااااااااااااااسة

ذكريات

2007-07-17T07:27:00.000-09:00

مذاكرة وذاكرنا

سهر وسهرنا

تهديد واتهددنا

زعيق واتزعقلنا

ضرب واتضربنا

جرى وجرينا

هدوء واتهدينا

عذاب واتعذبنا

تنطيط واتنططنا

شعبطة واتشعبطنا

***

اصحاب وصاحبنا

اصحاب وفارقنا

اصحاب واتجمعنا

اصحاب واتمصلحنا

(علاقة مصلحة يعنى)

***

ابتدائية وخدناها

اعدادية وعديناها

ثانوية وشربناها

كلية والحمد والفضل لله وحده اللى قدر يخلينا نعديها

***

نجحت

واتخرجت

وبقيت عاطلة بالاوراق الرسمية

وبشهادة الشهود

باركولى بقى عشان عملتها واتخرجت

بعد 15 سنة خدمة فى التعليم المصرى

قدرت اعديه بنجاح وبدون اى كبوات

فعلا التعليم فى مصر بيخرج شخصية برضه

بيخرج ناس تقدر تكافح كل حاجة فى الدنيا

2007-07-15T02:02:00.000-09:00

رجعت تانى

اسفة على قفل المدونة

واسفة على مقاطعة المدونات عموما والتدوين الفترة دى

كان لازم تجديد

حاولت اكسر الملل اللى لقيته

كسرت حتة صغيرة وفى طريقى لكسر الباقى

شكرا لكل اللى سالوا عليا

وكل اللى استغيبونى

انا اهه رجعت تانى

لما اشوف بقى اكمل

ولا...

2007-07-04T08:18:00.000-09:00

المدونة مغلقة

وانا مرفوعة من الخدمة

لحين اشعار اخر

2007-06-22T21:52:00.000-09:00

عمرى فى حياتى ماندمت انى عرفت ناس

او انى فارقت ناس

او انى انجرحت من ناس

مهما كانت صفات الناس دى

ومهما كانت نيتهم سواء خير او شر

بالعكس

ده انا ببقى مديونالهم

لانهم بيكونوا ضافوا لرصيد خبرتى فى الحياه اللى يكفينى انى اكسب قوة تعيشنى لبكرة

وانى اخد مناعة من جراح مشابهة جاية

وانى اعرف اتعامل مع اللى زيهم

ومااخسرش الكويسين اللى اضطرتنى الظروف انى اخسر اللى زيهم

بس بعتبر الجرح والزعل عليهم وعلى الايام اللى ضاعت مع اللى مايستاهلوش

تمن الخبرة دى

منى ليهم

متشكرة جدا

سؤال

2007-06-22T15:08:00.000-09:00

بقالى يومين فى سؤالين عمالين يلفوا ويدوروا فى دماغى ياترى ايه هى احلى حاجة فى الدنيا؟ وايه هى اوحش حاجة فى الدنيا؟ من وجهة نظرى لقيت ان احلى حاجة فى الدنيا باختصار لما تلاقى حد يفهمك ويقف جنبك ويبقى جنبك وقت ما تحتاجه يشيل همك يشاركك دنيتك سواء كان اخ او صديق او حبيب او اخت او اى حد مهما كان صلته بيك واسوأ شئ فى الوجود انك تلاقى نفسك لوحدك من غير كل ده ولا اخ ولا صديق ولا حبيب قاعد عايش لوحدك محدش بيسال فيك محدش بيسال عليك اسوأ شئ فى الوجود اكيد ده بيختلف من وقت للتانى من شخص للتانى من بلد للتانية بس بتفضل الحالة دى مسيطرة على الكل

انا بعشق الجمال ده

2007-06-19T12:07:00.000-09:00

فى احلى من الجمال ده

جونو فى مصر

2007-06-15T11:39:00.000-09:00

لعلك كنت تتابع أخبار إعصار جونو الذي ضرب سواحل سلطنة عمان عبر شاشات التليفزيون وأنت تحمد ربك على أن مصر بعيدة عن مرمى هذا الإعصار المجنون الذي بلغت سرعة الرياح فيه 260 كم في الساعة وتسبب في أن ترتفع أمواج البحر الأحمر إلى أكثر من 12 مترا -حاجة ترعب بصراحة!-، وإذا كنت تحمد الله على أنه جنب بلادنا كل هذا الشر فألاكيد أنك تحمده أيضا لأن الذي سيحدث في مصر لو جاءها إعصار جونو ولاّ حتى ابنه الواد الإعصار الصغير جانا ولاّ بنته العكروتة جينا لن يخطر على بال إنس ولا جان ولا حتى أشدهم خيالا وأكثرهم سوداوية

*******

بادئ ذي بدء علينا أن نعرف أن جونو لما زار عٌمان زيارته العنيفة تلك خلف وراءه 12 قتيلا في أرقام أولية قابلة للزيادة والنقصان، وهو رقم معقول قياسا بعنف الإعصار، ويأتي كنتيجة مباشرة لخطة الطوارئ التي نفذتها السلطنة بدرجة كبيرة من التميز إذ استعدت مبكرا للإعصار ونظمت حملة إعلامية داخلية لتوعية السكان، وحددت المناطق التي ستكون الأكثر تضررا، وعليه قامت بإجلاء أكثر من 20 ألف مواطن من مساكنهم ووفرت لهم أماكن بديلة للإيواء بالإضافة إلى 11 ألف آخرين من العاملين في الموانئ الأكثر عرضة لخطر الإعصار، وقامت الأجهزة المعنية بتجهيز 50 طن من المواد الغذائية تحسبا لتوزيعها على المتضررين، بالإضافة إلى انتشار رجال الشرطة والدفاع المدني في شوارع المحافظات العٌمانية.. أربعة فقط بالمناسبة

*******

اترك لخيالك العنان بقى وتصور ما الذي كان سيحدث لو أن جونو طرق أبواب مصر المحروسة بزينة الرجال والشباب

*******

الأكيد أنك -لو كنت تسكن في محافظة ساحلية- كنت ستفتح باب شقتك ذات صباح تتمنى أن يكون لطيفا، لتفاجأ بموجة عنيفة جونووية تلطمك على وجهك وترجعك إلى حجرة النوم من جديد مبلولا مدحورا.. ووسط المياه التي تسربت إلى شقتك ستفتح التليفزيون -عشان تفهم هو فيه إيه- لتجد مذيع لطيف متأنق يقول لك في آخر نشرة الأخبار-وبعد سرد أخبار البورصة والاقتصاد والرياضة!- أما عن حالة الجو فيتوقع أن يهاجم مصر اليوم إعصار عنيف ويرجى من المواطنين البقاء في منازلهم !!! بعدها لما يحصد الإعصار أكثر من ضحية ستجد المسئول الفلاني يخرج عليك في وسائل الإعلام ليؤكد للجميع بأن البلد اتخذت كل الوسائل لمواجهة جونو بس الأمر في الأول وفي الآخر قضاء الله وقدره.. واعترضوا بقى

*******

ولن تجد مسئولا واحد يخرج من جحره ليتفقد الآثار التي خلفها الإعصار في قرى الناس الغلابة الساكنين على السواحل -هو حد يعني اهتم بناس قلعة الكبش اللي بقالهم أكتر من شهرين بيناموا في الهواء الطلق-، وربما تطلق الحكومة حملة دولية لتلقي التبرعات من كل الدول -ماعدا إسرائيل طبعا مواءمة مع الغضب الجماهيري- لمساعدتها في التعامل مع نتائج الإعصار، وستجد أسعار السلع والمنتجات قد ارتفعت إلى عنان السماء ربما لمسافة أكبر من ارتفاع موجات جونو بعدما لجأ التجار إلى تخزينها تحسبا لأي طوارئ قادمة ويموت الناس من البرد ولاّ من الجوع مش فارقة أهي كلها موتة، وستغرق شوارع الجمهورية في المياه التي جلبها الإعصار من البحر وستختلط مياه الشرب بالصرف الصحي –وهو ده اللي بيحصل دلوقت أصلا من غير جونو ولا ديالوه!- وربما تحدث حرائق بسبب سقوط أسلاك الكهرباء على المنازل المزدانة بعشش وقش فوق السطوح، وسيكون المستفيدون الوحيدون من الإعصار هم طلبة المدارس والجامعات الذين سيبقون في منازلهم لأنهم أصلا لا يذهبون إليها

*******

ما سبق ليس تجنيا على الدولة في مصر.. لأننا ربما نكون البلد الوحيد في العالم الذي يفتقد لعلم إدارة الكوارث والأزمات أو هيئات مختصة في ذلك وإذا كان هذا غير صحيح فاذكر لنا بالله عليك كارثة أو أزمة من تلك المبتلاة فيها مصر كل يوم تقريبا وجدت فيها تحركا حكوميا سريعا دائما سيارة الإسعاف تأتي بعد أن يكون المصاب قد رحل إلى الرفيق الأعلى ودائما تأتي سيارة الإطفاء بعد أن تكون النيران قد التهمت المكان ومن فيه ودائما ما تأتي سيارة الشرطة بعد أن يكون الحرامية قد سرقوا البيوت واتعشوا وناموا كمان، وهذا فيما يبدو على اعتبار أن مصر كنانة الله في أرضه ومحمية إن شاء الله من كل شر وحاسد وحسود!، أو على اعتبار أن المصريين مافيش أكتر منهم وإن راح منهم ألف في عبارة ولا 300 في قطار ولا 36 ألف قتيل سنويا في حوادث الطرق ناهيك عن اللي بيقعوا في البلاعات في ظلمات الليل ولا اللي بيكونوا ماشيين جنب عامود عاري السلوك فتلتقطهم التيارات الكهربائية الصاعقة.. فعادي يعني فيه كتير غيرهم أما في عٌمان فكلهم على بعضهم 3 مليون -ربعهم من الأجانب كمان يعني- فلا تجوز التضحية بأحد منهم

*******

وبعد كده يرجع يقول لك إن مصر هي التي علّمت دول الخليج -ومنهم عٌمان- كل حاجة في الدنيا وإن هي العقل والعضلات ولولاها لما عاش سكان الخليج ولا كانوا.. يا أخي جونو

*******

-محمد هشام عبيه-

2007-06-11T05:24:00.000-09:00

طبعا مش محتاجة اقول ايه الصورة الخارقة دى

وللا اقول

طبعا واضح ان الصورة مش صورة على سايت نت

للاسف الشديد

دى المفروض انها المينى مكتبة بتاعتى

ومش كل اللى فيها ده كتب ثقافية

حاشا لله

دى بعيد عنكوا عصارة تعليم 4 سنين فى اداب مكتبات

بهاريز العلم كلها محطوطة فى المكتبة دى

(باستثناء شكلها المكركب)

بس والله دى كركبة امتحانات وبعدين الكتب كترت عليها ومش لاقيالها مكان

المهم انى مش هاين عليا ابيع عشرة 4 سنين مع الكتب دى

ومش هاين عليا انسى التعب اللى تعبته فيها

والشقى اللى شقيته فيها

والساعات والايام والليالى اللى قعدت افهم اللى محطوط فيها

ربنا يستر ومااصحاش يوم الجمعة الاقى مامتى مولعة فيها عشان زهقت منها

*****************************

ملحوسة:-

طبعا فى حاجات ظاهرة فى الصورة غير الكتب

دى حاجات عادية لزوم غذاء العقل

ماينفعش يكون غذاء عقل بدون غذاء بطن يعنى

ده انا اروح فيها

2007-06-06T04:52:00.000-09:00

احم احم

دستووووور على راى منى ذكى

ده اول حوار ليا فى مدونة صبرى سراج

صمت البحر صمتى

واخر حوار ان شاء الله

دى فضايح المفروض

والعاقبة عندكم فى المسرات

2007-05-30T20:42:00.000-09:00

حد يلحقنى بقى عشان هتجنن بجد

انا هفهمكوا الموضوع

اصل امبارح قلت ادخل انام كده على الساعة 8 ونص بالليل

قلت عشان اعرف اصحى بدرى عشان الامتحان

فلما جيت انام طبعا ماينفعش انام بسهولة

ولازم الواحد يراجع نفسه برضه ويحاسب نفسه عمل ايه فى حياته

انا بقى قعدت استرجع شريط حياتى

وذكريات 21 سنة الا شهرونص

فجأة كده بصيت لقيت الساعة 8 الصبح

كل ده وانا عمالة استرجع شريط حياتى ومانمتش

قلت مش مشكلة ابقى اعوضها فى لجنة الامتحان

بس جت فى دماغى سؤال غريب يعنى

هو ليه مفيش ستات بتشتغل فى محلات الدهب

اصل انا مش من النوع اللى بيتعامل مع حد معين فى شرا الدهب

اولا لانى مبقتش احب الدهب

ثانيا وسبب للسبب الاول انى مش بلاقى مقاسى بسهولة

(انتوا عارفين بقى من تخنى مش بعرف الاقى المقاسات)

وخدت بالى بقى ان كل محلات الدهب اللى شفتها فى الوجه القاهرى والوجه المنوفى مافيهمش واحدة بنت او ست بتقف

انا عايزة اعرف ليه ودلوقتى حالا بليز

(مع انى حاسة ان الردود هيبقى فيها ردود مهينة للستات علشان ضعفهم ادام اىحاة لونها اصفر بتلمع

وحاليا ادام اى حاجة بتلمع والسلام بس انا برضه مستنية اسباب)

ودمتم

ادعولى بقى عشان عندى امتحان كمان كام ساعة بالمرة يعنى

اعلان تانى

2007-05-27T12:17:00.000-09:00

مواصفات السيارة المصرية

2007-05-26T00:11:00.000-09:00

النهاردة جار ليا اتوفى بس هو مكنش زى اى جار بالنسبة ليا

هو كان ماضى وذكريات طفولة ولعب وجرى وتنطيط معاه

هو كان بمثابة عم ليا وامه رحمها الله كانت بمثابة جده

النهاردة ربنا اختاره يكون جنبه

انا اتفاجئت بالخبر اول ماصحيت

مش من عادتى انى اعيط على موت حد لانى مؤمنة ان ده قدر كل انسان ودى نهايته

افتكرت انى مش هقدر ابكى لاننا بقالنا سنين مفيش بيننا غير مجرد سلام بعد ما كل واحد دوامة الحياه خدته

ابتسامة وسلام هما اللى كانوا بيننا فى الفترة الل فاتت كلها

مكنتش اعرف ان عمره قصير

مكنتش اعرف ان ربنا اختاره الا متاخر

كان نفسى اسلم عليك

يمكن دلوقتى وقبل ما يدفنوك تكون حاسس بالناس اللى حواليك وبيحبوك

يمكن ات عملت حاجات غلط فى اخر حياتك

بس برضه هتفضل عمو ماجد اللى كنت بحب العب معاه وانا صغيرة واكلمه من بلكونتنا

ربنا يصبر جدو على فراقك

وربنا يصبر زوجتك واولادك

وربنا يصبر كل اللى بيحبوك

لانك بجد كنت اكبر صدمة لينا كلنا

ولانك من افضل الجيران اللى عمرى ماهقابل زيهم فى حياتى

لرابع مرة بكيت

رحمك الله ياجارى العزيز

وربنا يجعل مثواك الجنة

ويلهم اهلك الصبر

ويغفرلك كل ذنوبك قادر ياكريم

2007-05-17T23:48:00.000-09:00

قارئة الفنجان

جلست و الخوف بعينيها

تتأمل فنجاني المقلوب

قالت يا ولدي لا تحزن فالحب عليك هو المكتوب

الحب عليك هو المكتوب.. يا ولدي

بصرت ونجمت كثيرآ

لكني... لم أقرا أبدا

فنجانا يشبه فنجانك

بصرت ونجمت كثيرا

لكني لم أعرف ابدا

أحزانا تشبه أحزانك *******

مقدورك ان تمضي أبدا

فى بحر الحب بغير قلوع

و تكون حياتك طول العمر

طول العمر كتاب دموع

مقدورك ان تبقى مسجونا

بين الماء وبين النار

فبرغم جميع حرائقه

و برغم جميع سوابقه

و برغم الحزن الساكن فينا ليل.. نهار

و برغم الريح

وبرغم الجو الماطر والاعصار

الحب سيبقى يا ولدى

أحلى الاقدار.. أحلى الاقدار *******

بحياتك يا ولدي امراة

عيناها سبحان المعبود

فمها مرسوم كالعنقود

ضحكتها انغام و ورود

و الشعر الغجري المجنون

يسافر في كل الدنيا

قد تغدو امرأة يا ولدي

يهواها القلب هي الدنيا

لكن سماءك ممطرة

و طريقك مسدود.. مسدود

فحبيبة قلبك ياولدي

نائمة فى قصر مرصود

من يدنو من سور حديقتها

من حاول فك ضفائرها

يا ولدي مفقود.. مفقود.. مفقود

*******

ستفتش عنها يا ولدي

يا ولدي فى كل.. مكان

و ستسأل عنها موج البحر

و تسأل فيروز الشطان

و تجوب بحارآ وبحارآ

و تفيض دموعك انهارا

و سيكبر حزنك حتى يصبح اشجارا

وسترجع يوما يا ولدي

مهزوما مكسور الوجدان

و ستعرف بعد رحيل العمر

بانك كنت تطارد خيط دخان

بأنك كنت تطارد خيط دخان

فحبيبة قلبك ليس لها

أرض أو وطن أو عنوان

ما اصعب أن تهوى امرأة يا ولدي

ليس لها عنوان

اعلان

2007-05-10T23:27:00.000-09:00

مفسحاتى كلاب ..بالليسانس

لعزت السعدنى

ففهمناهــا سليمــان

2007-05-06T13:52:00.000-09:00

من زمان وانا بلاحظ العملية دي

الآيات القرآنية في كل مكان شيء جميل

ولكن أن يكتب سعيد الفكهاني

وفاكهة مما يتخيرون

وعم عبده الفرارجي

ولحم طير مما يشتهون

وسيد بتاع الكشري

كلوا واشربوا هنيئا بما أسلفتم في الأيام الخالية

وعند افتتاح أي محل

إنا فتحنا لك فتحا مبينا

وهاني القهوجي كتب على يافطة القهوة

وسقاهم ربهم شرابا طهورا

مش ناقص بقى غير ييجي بتاع الرقيق يقول

وحور عين كأمثال اللؤلؤ المكنون دي حاجة تخنق بجد ... ********

وانا ماشي في الشارع بقى من يومين فوجئت ان عندنا فيه انتخابات برلمانية في مصر ...

آه والله تخيلوا فيه انتخابات امتى وفين مش عارف بس عادي بتحصل في احسن الدول المهم

فوجئت ان كل واحد بيستخدم الآيات القرآنية على مزاجه

الحاج سليمان البسطاوي كتب في أعلى صورته

ففهمناها سليمان

ولما سألت هما قصدهم ايه بالآية قالولي ان الحاج سليمان ربنا فهمه المسألة السياسية

الله اكبر يا سبحان الله ايه الجمال ده

الأخين أحمد وسيد صالح من مرشحي احدى الدوائر كتبا اعلى صورتهما ايضا

وكان أبوهما صالحا

!!! خير ان شاء الله .. ********

خدت نفسي ورحت ناحية دائرتنا الانتخابية لقيت واحد من اللي مرشحين نفسهم عامل مؤتمر انتخابي

قلت يا واد ياساخر ياغامض خش واستفيد

الحاج مرزوق ابو الحسن

أكبر تاجر مخـد... قصدي اكبر تاجر في السوق شعاره الانتخابي

كله هياكل .. كله هيعيش

قووووول يارب

قمت سألته سؤال بسيط.. انت ايه البرنامج الانتخابي بتاعك يا حاج؟

واعي وناصح من يومي

رد عليا وقال موال

الكل هياكل.. الكل هيعيش.. قول بس يا رب

قلت: يا رب بس انا ما فهمتش برضه انت ناوي على ايه للمنطقة والشباب وبرضه كله هياكل وكله هيعيش وما حدش هيموت من الجوع ؟

قال: المنطقة يا استاذ مش محتاجة مساعدة من حد بالجهود الذاتية احنا هنقدر نعمل كل اللي احنا عايزينه وبلاش نحمل الدولة فوق طاقتها ..

قلت: وهو المنطقة دي يا حاج مش جزء من الدولة برضه لازم تصرف عليه وتنميه

فجأة وبدون سابق انذار يتجهم وجهه

قائلا: انت جاي من عند المنافس بتاعي.. انتوا عايزين مننا ايه.. سيبونا في حالنا .. الناس عايزة تاكل وتعيش .. امسكوا الواد ده وودوه على القسم

العبد لله لأنه لحسن الحظ كان قاعد في الصفوف الخلفية فالبلطجـ ... قصدي الرجالة بتوع الحاج ما لحقونيش لاني خدتها جري وقلت يا فكيك

فوق صورة الحاج لقيت

انا عرضنا الأمانة على السماوات والأرض والجبال فأبين ان يحملنها وأشفقن منها وحملها الإنسان

مش ممكن اللي بيحصل ده .

طب كمل الآية يا حاج كملها وانت تنسحب والله العظيم

انه كان ظلوما جهولا ********

الأستاذ عاطف السيوفي نائبنا الأربع سنوات الماضية اول مرة اشوفه واعرفه في مؤتمره الانتخابي

بيقول: انا بقالي اربع سنين نائب عنكم وما عملتش حاجة بس ادوني فرصتي ؟؟!!!!

يا نهار مالوش ملامح .. اربع سنين وعايز فرصة تانية امال كنت بتعمل ايه في الاربع سنين اللي فاتوا..

اكيد كنت من النائمين في مجلس النوم ...

كتب أعلى صورته

وقل اعملوا فسيرى الله عملكم ورسوله والمؤمنين

طب طبق يا بني آدم ********

والله العظيم اتخنقت

هي الآيات القرآنية لعبة وأداة في يد من لا يطبقها ولا يقرأها ولا يعرف معناها

...أكاد أجزم أن كل من

رشح نفسه لا يملك مصحفا ليضعه في مكتبه..

او في سيارته

ولا حول ولا قوة الا بالله ..

تحولت الآيات القرآنية الى جزء من الدعاية الانتخابية بدلا من اساس للعقيدة

ولا تعليق ******** منقول من

- السـاخر الغـامض -

2007-04-29T13:03:00.000-09:00

امبارح اول مرة انام مرتاح

بجد نمت وانا مرتاح اوى

عشان امبارح اتخانقت مع حبيبتى

وسبنا بعض

اول ما سبتها ومشيت

حسيت ان الدنيا كلها راحت منى

ما بقيتش شايف قدامى

يادوب وصلت للبيت وانا بزحف

المهم

رميت نفسى عال السرير وانا بطلع فى الروح

مش قادر مخنوق

مش طايق نفسى

اناحبيبتى خلاص راحت مش هترجع لى تانى

ولا هشوفها ولا هكلمها

مش ممكن ده انا اروح فيها *******

وفجأة

ايه ده؟

يعنى معنى كده مش هكلمها فى التليفون تانى؟

ده كده هوفر بتاع 20 جنية كل يوم

وكمان هوفر من صحتى وتعب قلبى فى كنتى فين ومالكش دعوة

ايه ده ايه ده؟

كمان مش هقابلها؟

يعنى مفيش مطاعم ولا كافيتريات

ولا مؤمن ولا جاد؟

ياااااااه

ده كده عظيم

كمان مفيش ماما عايزة تقابلك وتشوفك

ومافيش قلق ولا خوف من ابن الحلال اللى هييجى ياخدها ويطير

ولا غيرة

ولا شك

ولا تقل

ولا خفة

ياااااااااااااااااااااها

نا فرحان والله فرحان اوى *******

ياااااااااااه على البنى ادم

تبقى راحته قدامه ويدور على تعبه

انا كده خلاص لقيت راحتى ومش هتنازل عنها ابدااااااا

ياه انا كده سلطان زمانى

اما اقوم اعمل كباية شاى

ايه ده؟

التليفون بيرن

ايه ده؟

دى رنة حبيبى

ايوة هو ده اسمه هي دى الرنة

الو

ايوة يا عمرى

لو كنتى صبرتى دقيقة كنت هاكلمك واعتذرلك ياحياتى *******

man2ool

2007-04-27T20:36:00.000-09:00

امبارح كنت قاعدة كده قاعدة سلطنة مع نفسى

وانا لما بقعد قعدة سلطنة بتبقى سلطنة من نوع غريب

تلاقونى قاعدة كده ومشغلة 6 او 7 البومات اغانى نصهم مااعرفش مصدرهم

كل مااجى اتسلطن واشغل حد من المطربين العزاز بتوع القرن ال21 وانا نفسى افرفش وانعنش كده

ابص الاقى ان كل الاغانى اللى بتشتغل عندى كلها نكد

فغالبا عشان كده بقت بتطلب معايا نكد

وامبارح بقى كانت طالبة معايا نكد بالثلث

اجيبنى يمين اجيلى شمال

اجيبنى شمال اجيلى يمين

لما غلبتنى بصراحة

الاغانى واحدة

الالحان واحدة

الاصوات تقريبا واحدة

الكلمات واحدة واحدة واحدة

حاجة تعقد اللى مايتعقدش

بس فى عز ما انا قاعدة اجيبنى يمين وشمال كده اشتغلت فجأة اغنية لحسام حبيب

اسمها "امبارح" طلعت حلوة مش عارفة ازاى

وللا انا عارفة وبستهبل

عشان حسام حبيب ده اغانيه رومانسية زيادة عن اللزوم

ومن كتر رومانسيتها بقت بتجيبلى حساسية فى مشاعيرى

من كتر رومانسيتها:(

حتى كلماتها جديدة وخفيفة ولذيذة

والنكد بتاعها مش من النوع المحبط

كانت بتقول

امبارح كان لسة معايا

وبيحلم بيا وبهوايا قلت امشى كان يجرى ورايا

ويقولى ما تستنى شوية امبارح مين بس يشوفه

من شوقه ليا ومن خوفه كان واقف بيدارى كسوفه

مش عارف يتقرب ليا

وحلفلى وقالى انا مشغول

صدقته زى مابيقول

دلوقتى كان ليه صدقته

مع انه ده مكنش يطول

كان خايف لكن طمنته ولا عمرى مرة ماخونته على قلبى وحياتى امنته ونسينى واوام اتغير

مش فارقة اهه حب وعدى

ومحدش بيموت من الوحده

ده لقانا كان يوم واتقضى

وهوانا كان عمره قصير

وحلفلى وقالى انا مشغول

صدقته زى ما بيقول

دلوقتى انا ليه صدقته

مع انه مكنش يطول

ها

ايه رايكوا

بعرف اسمع ولا اغير الذوق

فى كلا الحالتين سواء عجبكوا ذوقى او ماعجبكوش

هحكيلكوا عن اغنية المود اللى جاى بس فى بوست تانى

واوعدكوا انها هتبقى مختلفة

الخوف و الرغبة

2007-04-24T13:34:00.000-09:00

طلب منى زميل انى انشرله البوست ده عندى وانا وعدته انى انزلهوله وانا بوفى بوعدى اهه مستنية ردودكوا ********************** الخوف و الرغبة لن استطيع ان اصف مدى سعادتي عندما اكتشفت اني احب! فقد كان لا يوصف فعلا . ان التغيرات التي احدثها في حياتي لم نكن بالسهلة , ولم تكن لتحدث لولاه. الغريب انه باديء الامر ولحظة معرفتي بذللك تملكني شعوران متناقضان اولهما كان شعورا بالرغبة حيث كان يدفعني الى خلق الاعذار لرؤيتها وشعور اخر بالخوف من لقاءها او الحديث في الوقت نفسه. لم اكن اعلم لم يرافق الحب خوف ورغبة في ذلك الوقت , ربما لان سعاده تلك اللحظات كانت اكبر من اي شيء اخر. لكن انا اعرف ان الانسان يخلق و تخلق معه اشياء نسميها غرائز , منها الرغبة و منها الخوف. ربما لا اسطيع ان ادخل في جزئية الخوف او الرغبة لاضع الخوف او الرغبة في مفهوم يقبل العقل البشري منطقه ويستطيع تحليله. ففكرة ان الانسان يخاف و يرغب هي فكرة مسلم بها ,واي محاولة لدراسة جزئية الخوف او الرغبة ستكون محاولة بائسة لان لان المسلمات تمثل حقائق لا تجزىء. لكن يمكن رؤية الخوف والرغبة في الانسان , العقاب بالنفي او بالسجن هو عقاب اصله حرمان المعاقب من رغبة الوجود مع اخرين. ساتحدث الان عن القرآن وبالذات عن علاقة العبودية بين الله وعباده , فالاية التي تقول }وما خلقت الجن والانس الا ليعبدون{ كافية للدلالة على سبب وجود الجنس البشريز ولكن ما الذي سيدفع الناس الى عبادة الله؟ هما شيئان الخوف من الله و الرغبة في لقاء الله . اعتد ان الذين يتحدثون مع الله بشكل شبه يومي يعرفون ما هو عدد الايات التي تخيفهم من الله وتلك التي تتحدث عن حالهم عندما سيلاقونه. لااعتقد انها صدفة , خلق الله البشر وخوفهم معهم ورغبتهم معهم , ثم اعطاهم الدافع ليخافوا منه ويرغبوا لقاؤه ورؤيته. ثم يقول الله في القران }قل ان كنتم تحبون الله{. نحب الله . الحب هو مزيج المتناقضين الخوف والرغبة , فمتى وصل الخوف من الله حده المطلوب ومتى وصلت الرغبة في رؤيته حدها المطلوب عندها فقط نحب الله. ومتى احببنا الله , اصبح ما دون الله سهلا. حسام

2007-04-16T14:28:00.000-09:00

لو مزعل حد منك

والدتك

والدك

اخوك

اختك

حبيبك

صديقك

جارك

اى حد

وعايز تصالحه

ولا تقلق عندى الحل

ابعتله الرسالة دى وشوف هيحصل ايه بعدها

2007-04-15T14:08:00.000-09:00

مفيش كلمة هتقول اكتر من كده

كل مرة بنطلع الصحف والاخبار صح وبنقول ده بيحصل وبيحصل

المرة دى بقى انا بقولها

اللى مكتوب فى اللينك ده كدب كدب كدب

مهزلة

اقروا اللى مكتوب فى الخبر ده وانا هقول اللى عندى

اولا انا فى اليوم ده انا كنت موجودة فى الجامعة من الساعة 9 صباحا لحد الساعة 3عصرا

ثانيا محصلش اى نوع من انواع المظاهرات

كل ما فى الامر ان كان فى شخص مسئول جاى الجامعة هيدى محاضرة فى قسم علم النفس وللاجراءات الامنية كان لازم يامنوا مجمع الكليات كله فزودوا عدد الامن المركزى والظباط ابتدوا ينتشروا بشكل ملحوظ وشددوا على

الدخول للجامعة وبالتالى كان عدد الطلبة على باب الدخول ضخم جدا جدا فى وقت زى الساعة 9 الصبح ويوم الاحد ده بيبقى معظم المحاضرات شغالة والطلبة كتير جدا

بالنسبة للحفل

حفل الاخوان كان فعلا المفروض يتعمل يوم الاحد وعلشان السيد المسئول حضر اولمادخلت الجامعة ملقتش اى حاجة بتعلن على الحفل كالعادة

ومكنش فى حفلة من اساسه

لما هو مفيش حفلة ومفيش مظاهرات يبقى منين خدوا جهاز كمبيوتر وكاميرا وحصلت مناوشات وفى طالب مصاب

ده غير ان الحياه طول اليوم وردية زى مابيقولوا

ماشفناش مشاكل ماسمعتش اى كلام

لان لما بيحصل اى مشكلة فى الجامعة بتنتشر بسرعة البرق

فازاى افضل 6 ساعات فى الجامعى ومااسمعش اى حاجة من دى ومااشوفش اى قلق

ولو فرضنا ان المظاهرات دى حصلت بعد الساعة 3

فالجامعة اصلا مش مسموح لاى طالب يبقى موجود فيها بعد الساعة 2 بالظبط الا اذا كان ليه محاضرات يعنى بننزل بنلاقى مفيش غير الطلية اللى خلصوا محاضراتهم وراجعين بيوتهم

حاجة اخيرة بقى

حفلات الاخوان انا حضرتها اكتر من مرة

مش بيعملوا فيها اكتر من قراءة قران فى بداية ونهاية الحفل

وبعدين اغانى دينية كل الناس بتسمعها يعنى الرقابة سمحاها مفيهاش حاجة زيادة عن المسموح

وبعدين بيقدموا عروض مسرحية ساخرة قصيرةلاتمس السياسة ولا تسئ للدين الاسلامى

وبس

مع العلم انا مشمن الاخوان ولا حاجة

انا بس انسانة رافضة الظلم

واللى عنده اعتراض يجيبلى دليل انى بتكلم غلط

***********************************

تصحيح بسيط

بالنسبة للمصاب فعلا عرفت دلوقتى ان فى مصاب

بس المصاب ده كان من الاخوان المتعصبين اللى حاول يخرج معترض على الغاء الحفلة

وطبعا مش عايزة اكمل انتوا عارفين الباقى

اتخبط فى الباب ياجماعة بدماغه كذا مرة وهو خارج ياجماعة;)

2007-04-14T10:20:00.000-09:00

قعدت كتير اوى افكر اكتب ايه

ما انا مش هفضل مستكنة كده يعنى

ومش هخصص البلوج للمناسبات والتيجان اللى بتجيلى مش عارفة منين وبطنش

فكرت فى حاجات كتير اوى

بس الزهايمر عمل مفعوله واول مافتحت البلوج

اتبخروا للاسف

بس فى حاجة واحدة اللى مش عايزة تتبخر

مش عارفة هو سؤال

وللا رد فعل

وللا مبدا

وللا موقف

وللا ايه بالظبط

انا نفسى افهم ليه الناس دايما بتحب تظلم

انا مش مثالية للدرجة اللى ممكن اشوف الحياة لونها بمبى ولا الدنيا وردية والدنيا جميلة وهادية

بس ليه الظلم من غير سبب

لا وكمان الظالم بييجى ويعاتب

ممكن يخليه يقول كلام ماقالهوش او يحور فى الكلام ويغيره وييجى يعاتبه ويطلعه عند الناس كلها بيوقع

وبالرغم من ان الناس عارفة انه مظلوم برضه بتيجى عليه

والسبب...

ان الظالم ده هو اللى معاه

هو اللى بيديهم مع انهم مش محتاجين

بس يمكن عينهم فارغة او ده اكيد عينهم فارغة

طب لما انتوا اصلا مش محتاجين ليه مذلولين ليه وعايزين غيركوا يتذل ليه

وللا يمكن ده طبع

وللا نظام اللى نلحق ناخده منه

الطمع من زمان انا عارفة

بس واضح ان القناعة انتهت

بس لو انتهت من عند الناس كلها انا مش هتنتهى من عندى

ومش هتذل لحد

وهبقى نفسى

والحمد لله انا مش صغيرة ولا عبيطة ولا طايشة عشان اتهور واخد قرار متهور

اللى عايزنى اهلا بيه

واللى ماالزمهوش مايلزمنيش

والمعاملة بالمثل

وشكرا

****************

دى رسالة لحد يارب توصله

ويفهمها مايغيرش الكلام

الحمد لله الكلام موثق

2007-04-08T08:12:00.000-09:00

كل شم نسيم وانتوا طيبين وكل فسيخة وانتوا واكلين وكل رنجاية وانتوا متهنيين وكل بصلاية وانتوا منعنشين وكل لمونة وانتوا فرحانين اتصرفوا بقى الريحة قلبت البلوج كده حد يجيب معطر جو

2007-04-05T15:14:00.000-09:00

الصور مش عاجبانى بس مش مشكلة برضه قمرات المهم الصورة دى من ندوة المدونين اللى مجلة كلمتنا عملتها اتكلمنا فيها كتير مش كتير اوى بس اتكلمنا عن كل حاجة تخص المدونات باختصار وفكرنا فى حاجت كتير اوى اهمها اننا ننشئ جمعية خاصة للمدونين ومين عارف يمكن ربنا يبارك فيها وتبقى نقابة بس مش قبل نقابة اللى حب ولا طالش برضه دى مسالة اولويات ياجماعة وبالنسبة للتفاصيل بقى فهتلاقوها فى مدونة محمد حمدى اصلى مش بحب اعيد وازيد فى الكلام بس بجد اليوم كان اكتر من رائع ابتدى وانتهى على خير على غير العادة وكنت سعيدة جدا جدا جدا بالجو اللى كنا فيه ده ومقلب تهامى اللى مش هنساه صدمنى بجد ميرسى موت ليك ياتهامى (مفيش اموشن متعصب للاسف) وانا بشكر كل اللى جم بجد لانهم عانوا معايا ى اجابة الاستبيان انا عارفة انى زةودتها فى الاسئلة بس المفروض اننا نتعاون من اجل الوصول لنتائج علمية بحثية مكتبية معلوماتية سليمة انا بشكر كل اللى شاركونا الندوة حمدى وشيماء وياسمين واحمد ومحمد ومايكل وماجد ومصطفى فتحى اكيد اللى اشك انه ممكن يعتزل التدوين بجد وبحب اقولهالك كان غيرك اشطر يامصطفى انا حسة ان فى سر واتمنى ان يكون اللى فى دماغى صح

2007-03-31T10:10:00.000-09:00

اهنئكم بميلاد اجمل مولود

واشرف مخلوق

وافضل رسول

من انشق له القمر

وسجد له الشجر

وسلم عليه الحجر

وشكى له الجمل

وهام به قلبى

وكل عام وانتم بخير

2007-03-31T03:49:00.000-09:00

اللى ناوى يحضر ندوة المدونين

ده الموضوع عند منظم الندوة محمد التهامى

اللى هييجى يسيب رد عند اى حد فينا

2007-03-30T01:29:00.000-09:00

الله الله تاج واحد يتمررلى مرتين فى يوم واحد لا ويبقى اول تاج كمان لا تمام بصراحة المحمدين تهامى وحمدى واخدين بالهم منى اوى اه ربنا يستر اللى بعمله فى الناس هيطلع عليا ماشى ماشى ياااااااااااااااااااااااااااااااااااااااااااارب اسم مدونتك؟ فقاعة هواء لماذا اخترته ...ماهى نيتك من اختيار هذا الاسم؟ اولا هو طق فى دماغى كده ثانيا بقى لقيت ان كل حاجة بكتبها بتبقى كل حاجة فيها شبه فقاعة طايرة لوحدها لانى بكتيهم بطريقة غريبة جدا فمش عارفة مين مع مين وامتى وفين وربنا يستر ان شاء الله هل فكرت فى إغلاق المدونه ..والسبب؟ لا مفكرتش بس مفيش حاجة بعيدة عن ربنا صورتك فى المدونه ..رمزيتها؟ لا مش بقصد بيها حاجة معينة بس بحاول احط صور خفيفة ولطيفة وبغيرهم كتير عشان الملل وعشان احس ان فى تجديد حتى لو مانزلتش بوست جديد عشان ماازهقش وماازهقش الناس وبحب اغير الديزاين كمان عشان الشكل لما بيفضل ثابت بيبقى فى ملل وممكن يطفش الناس ويطفشنى انا قبلهم طبيعة كتابتك فى المدونه بشكل عام...سياسه ...قصه...عبث...كلام فاضى؟ والله مش عارفة يمكن كلام فاضى ويمكن كلام عادى انما قصة وسياسة وكلام تافه مفتكرش الا اذا كان فى حد ليه راى تانى يقوله وانا هحترمه لماذا دخلت عالم التدوين من الاساس؟ فى الاول كنت عايزة اعمل تواصل بينى وبين الناس من تانى بعد ما ربنا توفى منتدى مجلة كلمتنا انما بعد كده بقيت بنزل بيه المحاولات الفاشلة فى الكتابة بتاعتى احلى جمله قيلت لك فى وصف مدونتك؟ فى ناس قالتلى رائعة (مجاملة اكيد طبعا) بس ماتمنعش انها بترفع من روحى المعنوية شوية التعليقات بالنسبه لك ..اهميتها؟ اكيد مهمة جدا ولو انقطعت هنقطع انا كمان عن دخول البلوج تانى احلى بوست كتبته ...ضع اللينك ..ثم اذكر لماذا؟ نقابة اللى حب ولا طالش عمل رد فعل حلو اوى عند ناس كتير بثق فى رايها ومش بتجامل حسيت انى ممكن انفع فى حاجة افضل مدونه قرأتها ؟ مدونات احمد مختار التلاتة لو بس يتابعها هتبقى اجمد مدونات ادبية افضل بوست قرأته ..يمكن اختيار اكثر من لينك؟ اخر قصة لـ محمد حمدى اللى اسمها N.D.E حد قل ادبه فى التعليق..ايه رد فعلك؟ لا الحمد لله لسة بس انا فى الانتظار عشان ساعتها هنسيه اسمه وتاريخ ميلاده كله باذن الله

اسوأ مدونه ؟ بالرغم من انى مشروعى عليهم بس ماعملتهمش حصر وماينفعش يبقى فى حصر غير حصر صورى عشان كده هقولك ان كل مدونة بتتغاضى عن اى الحدود الدينية والاخلاقية فهى من رايى اسوا اسوأ المدونات اللى مايحافظش على دينه واخلاقه واخلاق المجتمع وحياء كتير من البشر ممكن تدخل البلوج قاصد او بالصدفة فهو مايستاهلش يكون انسان وبنى ادم ده غير انه بيسوء اسم مجتمع جديد بيظهروبما انهم بيقولوا على المدونين طبقة من المثقفين مع ان اتضحلى عكس ذلك نسبيا فالمفروض المثقف يحافظ مش يفرط

اسوأ بوست اسوأ مدون؟ الاسوأ دى ماافتكرهاش لسبب بسيط وانى ممكن اقيم البوست من عنوانه واللى مش بيعجبنى او اللى مش بيشدنى بهمله مش بفكر اكمله ومااعتقدش ان فى حاجة اسمها اسوأ مدون بس فى حاجة اسمها اسوأ اسلوب فى التدوين لان اكيد كل واحد بيبقى عايز يوصل حاجة او يوصل هو لحاجة فده فى حد ذاته هدف مايستحقش عليه كلمة الاسوأ تدى التاج دة لمين ؟ مممممممممممممممممم مش هديه لحد اعتقد انه بقى عند الجميع دلوقتى

المصريين والخياال العلمى

2007-03-25T06:57:00.000-09:00

منذ زمن ليس ببعيد كان الناس يعرفون ان المقصود بقصص الخيال العلمى هى حرب الكواكب وحروب الفضاء والسفر الى العوالم الاخرى و الافلام التى تدور و التخيلات الموضوعة من المؤلفين للعالم بعد مرور مئات الاعوام او من الممكن ان تتحدث قصص الخيال العلمى عن الكوارث الارضية والطبيعية والبيئية او الحالات المرضية النادرة و الشخصيات الخارقة مثل سوبر مان والرجل العنكبوت بالطبع كل هذه الامثلة لاتوجد الا فى العالم الغربى باستثناء بعض المحاولات الادبية المصرية مثل سلاسل الخيال العلمى المنتشرة فى الاسواق المصرية كل هذه الاشياء هى المعنى المتعارف عليه بين الناس لكنها اصبحت قديمة ومستهلكة رغم كل التطور الذى يحدث فيها على الاقل بالنسبة لى . واكتشفت ماهو الخيال العلمى الحقيقى عندما جاء بعض الاجانب لزيارة مصر وتمت بيننا بعض المناقشات فوجدت ان الشعب المصرى هو شعب من الخيال حقا ليس ذلك فقط بس انه اوجد العديد من انواع الخيال العلمى، فهناك قصص طوابير الحصول على طوابير العيش وفكرة اختراع غواصات لتعبر من بين ارجل الناس المتزاحمين امام افرن العيش للحصول على رغيف ومن المفترض ان تتحول هذه الفكرة الى فيلما سينيمائيا ضخما لولا عدم وجود فرن فاضى للتصوير فيه. وهناك قصص اسفلت الحكومة والزيارات الوزارية والرئاسية المفاجئة للمحافظات والهيئات التى تنتشر فى البلد كلها قبل موعد الزيارة باسبوعين او اكثر لاتخاذ الاذونات لصرف اسفلت الحكومة وللعلم فان انواع الاسفلت انواع مختلفة لكل منصب نوع خاص به وبمجرد انتهاء الزيارة المفاجئة ومشاهدة نظرات الدهشة والاستغراب على وجه المزورين يتم تسييح الزفت والاسفلت مرة اخرى لوضعه فى الخزانه لحين زيارة مفاجئة اخرى. كما ان القصص الخيالية للحصول على المعاشات او استخراج مستخرج رسمى من الهيئات الحكومية وعلاقتها بازمة السكر والشاى فى البلد فقد تم رفع تسعيرة السكر من اجل توفير سكر افضل للموظفين المجهدين المخلصين فى عملهم فهم لايستطيعوا امضاء ورقة عادية الا بعد شرب ما لايقل عن 17 كوب شاى و2 قهوة و6 حلبة و9 سحلب كلهم سكر زيادة – زيادة اوى- مما سبب الازمة اما الشاى فقد تصرفت المصانع فى توفير نشارة الخشب والملوخية الناشفة لتورفير شاى كافى. ولن تجد خيالا اكثر من ذلك حينا تكون المرتبات اقل بكثيرا من المصروفات الشخصية لاقل فرد وبالرغم من ذلك فالرضا والابتسامة لايفارقونه وغالبا الضحك الهستيرى من حنية قلب الدولة عليه لتوفير سرير خاص له فى مستشفى العباسية للامراض العقلية ، نظرا لضيق الوقت لن نتحدث عن الانواع الاخرى مثل قصص الحصول على الوظائف وقصص اشارات المرور وقصص تنظيم الاسرة وقصص الاخذ بالثأر وقصص الزواج السهل الميسر وقصص التلعيم الجيد وقرارات وزير التعليم وقصص الفواكه والخضروات الخالية من الكيماويات ...الخ الخ الخ ، لكن مختصر القول ان الانسان المصرى ماهو الا موسوعة متنقلة للخيال العلمى وفرصة لتنشيط السياحة لاننا اول من جدد افكار الخيال العلمى واول من يطور هذه الخيالات بسرعة الصاروخ اسرع من افلام هوليوود. سارة الاسكافى

2007-03-16T01:48:00.000-09:00

عايز تريح اعصابك؟؟

ادخل هنا

فلسفة الحب

2007-03-10T17:02:00.000-09:00

When a boy tells a girl "I LOVE U", that means

L = Lessa badry awy 3ala elgawaz. لسه بدري قوي على الجواز

O = Obviously i have no money. صدقيني مافيش فلوس

V = Villa mesh momken. إنسي الفيلا دي خالص

E = Enty 3abita to believe me. أنتي عبيطة عشان تصدقيني

غدا

2007-03-10T04:14:00.002-09:00

على فكرة بس انا بحب انوه

ان اللى مكتوب ده كان نتيجة ضغط عصبى ونفسى ليله امتحان اللغة العربية السنة اللى فاتت

والحمد لله ماعدتش السنة

بس عملت حادثة تاني يوم قبل الامتحان بربع ساعة

عشان كده انا بحبها موووووووووووووووووووت من كتر ذكرياتى معاها

غدا...

غدا الامتحان..

والويل كل الويل عندما اهان

فقد قالوا فى الامثال

عند الامتحان..

يكرم المرء او يهان

وانا الان استعد للامتحان

والاهانة اتية

عاجلة ام اجلة

ماذا سيحدث اذن

عند مواجهتى بورقة الاسئلة..؟

ساسطر فيها افكارى الخاوية

واظهر فيها نظرياتى الباهرة

ساصنع فيها مستقبل مشرق

واحقق حلما كان يراودنى

من زمن الازمنة

صعب اليوم وانا اعرف

لكن عندى شجاعة مغرية

او برود وهو الاكثر من الاجوبة

والان تحققت احلامى

واعددت احلامى المقبلة

وجاءت النتيجة مبهرة

اننى ساعيد للمرة الثانية سارة الاسكافى

2007-03-07T15:43:00.000-09:00

النهاردة نجحت الحمد لله عديت فى مواد مكنتش متوقعة انى اعديها ولا بعد 10 سنين المفروض اكون فرحانة ومبسوطة بس مش عارفة انا ليهه احساسى العكس تماما مش فاهمة ده من تاثير الصدمة ولا حالة نفسية ولا عدم رضا ولا ايه بالظبط وللا يمكن اكون حسة بالذنب لان المفروض كنت اجيب اكتر من المقبول لولا الزهايمر اللى بيفرمت دماغى اول باول وضيعنى فى الامتحانات انا هتجنن للمرة ال7986 تعبت:(

2007-03-01T07:56:00.000-09:00

كل الافلام العربية بتنتهى دايما بموت عنصر الشر فى الفيلم يااما يموت يااما يتسجن وقبل ما يدخل القفص يبص للبطل والبطلة ويبصلهم وعلى وشه كل ملامح الاحساس بالذنب ويقولهم "سامحونى انا غلطت فى حقكوا بس خلاص انا توبت لله سامحونى سامحونى "ويدخل فى وصلة عياط وشحتفة ويسحبه العسكرى من دراعه ويدخله جوة الزنزانه او عربية الترحيلات وينتهى الفيلم بجواز البطل والبطلة وفجأة تطلع الصورة ملغوشة عشان يكتبوا كلمة النهاية. انا بقى بقالى سنين طويلة نفسى اشوف كلمة النهاية مكتوبة على دور برد باخده، على طول عندى برد ومش بيروح طب ده ايه سببه مش فاهمة مش ممكن الجو ملخبط طول السنة عشان البرد ده ماياخدش منى اجازة غير مرتين تلاتة غالبا بيكون تعب فيهم من شغله فبيقررياخد فترة راحة منى لمده اسبوع وللا حاجة وبينى وبينكوا ببقى مفتقداه فى الفترة دى بشكل رهيب لانه خلاص بقى جزء منى وممكن لو اتاخرعليا شوية وللا حاجة اصحابى بيقلقوا عليه وبيفضلوا يسالونى عنه كتير حاولت اقنعه يجيب موبايل وانا اللى هشحنله بس عشان يطمنى عليه رفض وقالى ما تتدخليش فى حياتى بالرغم من انه متدخل فى حياتى بشكل جذرى انا جربت جميع الادوية اللى يها علاقة بالانفلونزا من قريب ومن بعيد من اول ما سمعوا عن الادوية فى مصر الفرعونية لحد اخر موديل نزل امبارح وبرضه ماجابش اى نتيجة عمرى ماشفت حب بالشكل ده من غير البرد ده حسة انى ممكن اضيع مش عارفة لو سابنى هعمل ايه هو اللى بيخططلى حياتى وهو اللى بيوافق او يرفض مواعيدى وهو اللى بيتحكم حتى فى الهدوم اللى بلبسها لو عشت طول عمرى ادول فى صديق بالشكل ده عمرى ما هلاقى لو خدت راى حد مثلا من اصحابى على حاجة نفسى اعملها وطلبت رايه فى الموضوع وكانت الحاجة دى غلط ممكن مايرضاشيقولى يااما بقى خايف على شعورى يااما خايف اقوله ماتتدخلش فى حياتى الشخصية بس هو البرد مفيش غيره اللى بيدينى قراره وبيفرضه عليا كمان وبلاقى نفسى قايمة الصبح نفسى اطلع رحلة للمقابر يمكن ارتاح من ديكتاتوريته اللى خلاص مع الوقت فهمتها واتعودت عليها ومبقتش قادرة استغنى عنها

نفسى الاقى دكتور يفهمنى ويعرف ان البرد بتاعى مالوش حل من الحلول الطبيعية اللى بيقدمها للمرضى الطبيعيين اللى البرد بتاعهم مش بياخد اكتر من 4 ايام ويوم ما يفترى عليهم يبقى اسبوع ياجماعة انا اكتشفت ان شخصيتى بقت ضعيفة ادام البرد كده مده صلاحيتى انتهت خلاص بسبب تسلطه عليا انا هرفع عليه قضية خلع

بس ياخوفى يطلع عندى نوع نادر من البر مش بينتهى غير بانتهاء المريض:(

نقابة اللى حب ولا طالش

2007-02-23T10:39:00.000-09:00

نظرت من حولى وجدت هناك امرا غريبا، لقد وجدت انه لا يوجد احد الا وقد انكسر وانجرح من قصة حبه ومعظم الشباب بناتا واولادا درجوا تحت بند (اللى حب ولا طالش) و(اتقلبوا) شر (قلبة) واصبحوا (مقلوبين) كلقب لا رجعة فيه كان هو نتيجة قصة حب ملتهبة او تسلية من احد الطرفين او ان كان وقع تحت علاقة ثلاثية الابعاد التى تسمى (الحب من طرف ثالث) وما اشهرها هذه الايام لكن الا يحق لهؤلاء الـ(مقلوبين) ان تقوم الدولة بحمايتهم فما من شاب(مقلوب) او فتاه (مقلوبة) الا اضاعة فى الوقت وسرحان ليس له نهاية ونسيان الابتسامة وجرح القلب والكرامة ومعايرتها بانها اصبحت مقلوبة بدون ان يكون لها ذنب فى هذه القلبة القوية التى اجتاحتها. لذلك ونيابة عن المقلوبين فى مصر اطلب او اؤمر الحكومة المختصة بانشاء نقابة خاصة بـ ( المقلوبين ) يطلق عليا ( نقابة اللى حب ولا طالش) وتعيين هيئة ادارية لم يتم قلبهم من قبل او على خبرة كبيرة باساليب القلب لحماية المقلوبين فى مصر ومحاولة تقليل هذه النسبة المرتفعة التى وصلت الى 180% وتقوم النقابة باحتواء جميع اللى حبوا وماطالوش على مستوى الجمهورية والاستعانة بسيدة عجوز تجلس مع كل عضو على حده وتعطى له النصائح المعهودة من السيدات الكبار مثل (ماتبكيش على اللى فرغ ماله ابكى على اللى اتوقف حاله) وبهذه النصيحة المباشرة يشعر الالعضو المقلوب بالحرج فى انه لسة (مابارش ولا القطر فاته)من اجل ان يجلس ويبكى على ماذهب انما يقوم بالبحث من جديد على من تعوضه عما مضى لانه لسة (بدارة) والعمر ادامه، ولا مانع من بعض التانيب والمعاتبة فتقول له (ماتبعش رخيص قال ماتتوصيش) وتتبعها بمصمصة شفاتها و(تزغده فى جنبه وتقوله ياما الناس قالولك وانت عاملى فيها فالح اوى) وتوفر ايضا النقابة جو ملائم لهم من حيث تعويض الحبيب المفقود بحبيب اخر يتم رد الاهانة اليه (قلبه) للحصول على نفسية سوية لدى الاعضاء ومن ثم يتم الشفاء، كما يجب تقديم محاضرات فى علم النفس والاجتماع توضح متعة الحياة بدون النصف الاخر فلا يوجد من يطلب هدية فى عيد الحب ولا عيد الميلاد ولا يوجد من يريدك ان تتذكر ميعاد اول مقابلة بينكما بالساعة والدقيقة وانت اصلا عندك زهايمر، وتوفير مشروعات لتضييع الوقت الذى كانوا يمضونه برفقة الحبيب وتعليمهم ان المقابل المادى العائد عليهم من المشروعات احسن مليون مرة من القعدة 6 ساعات على الكورنيش مع الحبيب وتضييع النقود فى اكل الترمس ومص القصب ، وعمل ندوات دورية والاستشهاد بامثلة اخرى لشباب تم قلبهم من قبل ونجحوا فى الخلاص من هذه الازمة وعرض تجاربهم على داتا شو كبيرة لزيادة الوعى وياتى فى النهاية صاحب التجربة لينهى الحلقة بمقولة تلخص كل هذه الدورات (اتجوز الارملة واضحك عليها وخد من فلوسها واصرف عليها) ،اذا تجرا الحبيب السابق وطلب العودة لا يهم فكل الحلول موجوده ويتم وضع برنامج خاص للرد على الحبيب السابق اللذى قلب العضو المقلوب بعنوان (خلى حبيبك على هواه لما ييجى اديله على قفاه) واخر مرحلة بعد ان يعود العضو الى نفسيته الاولى وينسى ماحدث به ويكون قد اكتسب خبرات جديدة فى الحياة يتم عمل لقاءات خاصة بالاعضاء والعضوات ويتم استرجاع كل ما مضى من اجل التنكيد عليهم وتذليلهم بما فعلت معهم النقابة وتدفيعهم مقابل كل هذا. لكن لا يجب على الاعضاء ترك النقابة الا اذا تزوجوا لعمل الاجراءات اللازمة لنقل الوراق الخاصة بكل عضو من نقابة(اللى حب ولا طالش) الى نقابة (المقهورين فى الارض) الخاصة بالمتزوجين والتى سنطالب بانشائها فى حديث اخر. سارة الاسكافى

الحداد فى الاعلام المصرى

2007-02-21T09:56:00.000-09:00

ذات مرة كنت اجلس بجانب الريموت كنترول الخاص بجهاز التليفزيون الذى لم احاول الاقتراب منه منذ فترة كبيرة حتى اقتربت ان انسى شاشته الفضية حيث نصحنى الدكتور منذ شهر ان امتنع عن مشاهدته حفاظا على ضغط الدم والقاولون العصبى بعد تدهور حالتهم اثر مشاهدتى لبعض الكليبات والبرامج الحديثة. اخذت الريموت وقمت بفتح التليفزيون وبعد تقليب بعض القنوات فيها رأيت مذيعة فى احدى القنوات الارضية ترتدى ملابسا سوداء ضيقة بها تحتوى على ازرارا واشياء لامعة مع مكياج كامل بالوان صارخة ظننت ان اليوم هو احد الاعياد القومية والقناة تحتفل به الا اننى قد فوجئت بالخبر الذى تذيعه وهى تنظرالى الكاميرا بنظرة حزن عميقة جدا... اعزائى المشاهدين..يؤسفنا ان نخبركم بأنه قد انتقل الى رحمة الله تعالى الملك المعظم المبجل اللى مفيش زيه –تسقط دمعة عفوية جدااااااااا من المذيعة- الملك الذى لم يقهر من ولم يتنحنح ولم تستطيع اى ثورات ان تقيله من منصبه- وتسقط دمعة اخرى- ملك دولة خسرونيان الشقيقة – تدخل المذيعة فى وصلة بكاء وشحتفة- وسيشيع جثمانه الطاهر من الزاوية التى تقع تحت منزله القديم الى مقابر الفقراء اليوم قبل اذان المغرب حتى يلحق المشيعون دفنه والصلاة عليه مع صلاة المغرب اقتداء بالراحل المغفور له صاحب مدرسة "لا تضيع وقتك فى الهباءات"-تدخل المذيعة فى وصلة شحتفة اخرى من اجل زيادة الاجر-والشعب المصرى ينعى الشعب الخسرونيانى فى وفاة ملكه ويدعى له بالصبر والسلوان على ما ابتلاه الله من انشقاقات فى الاسرة الحاكمة واولياء العهد ال6 لمعرفة من الاحق بالسلطة ومشكلة تقسيم الورث... انتهى الخبر يدخل فاصل اعلانى بسيط مدته 44 دقيقة وتاتى نفس المذيعة بابتسامة واسعة وبانشكاح غير مسبوق لتقول.. والان مشاهدينا الاعزاء تشاهدون برنامج (اغانى وكليبات) للاتصال والمشاركة يرجى الاتصال على رقم 9999 من اى موبايل و09999999 من اى تليفون ارضى لمشاهدة ماتطلبون من احدث الاغانى والكليبات ...وتنهى الخبر بنفس الابتسامة العريضة. ولم ادرى بالدنيا من حولى ثانية الا وانا فى المستشفى واهلى من حولى يحمدون الله على نجاتى من انفجار قاولونى المفاجئ . سارة الاسكافى

الحب زي الكيميا

2007-02-12T16:35:00.000-09:00

هو الحب حاجة زي الكيميا.. حاجة كدة بتحصل متعرفلهاش تفسير الحب هو إنك تحب إنسان معين لذاته مش لأي حاجة تانية هو إنك تشوف حبيبك أجمل واحد في الدنيا.. أحلى من كل البشر الحب هو إنك تخاف عليه الحب هو إن هو يخاف عليك أكتر ما بتخاف على نفسك الحب هو إنه يوحشك و هو جنبك هو إن حبيبك يبقى مالي عينيك هو إنك تحافظ على كرامة اللي بتحبه وتحط صورته دايما أصاد عينيك الحب هو إنك تبقى عايز تتغير و تكون أحسن عشانه هو.. لما تبقى ضحكة حبيبك و سعادته عندك أهم من أي حاجة تانية الحب هو مكالمة تلفون تجيلك في عز مانت مشغول و متضايق و تنسيك تعب الدنيا الحب هو حد بيقولك كل سنة وانت طيب ليلة عيد ميلادك هو لما تحس انك قادر تواجه اي مشكلة مادام الشخص ده واقف جنبك الحب لما تبقى عايز تشوف حبيبك احسن واحد في الدنيا الحب لما حبيبك ياخد بايدك و يقربك من ربنا الحب لما تحس بالامان وانك ماسك الدنيا كلها بايدك الحب لما تدي للي بتحبه من غير ما يسال الحب هو انك تغفر لحبيبك هو انك تسامح الحب لما تفهم حبيبك من نظرة عينيه.. الحب هو انك تقابل توأم روحك الحب لما تحس بحبيبك من غير ما يتكلم حتى وهو بعيد عنك الحب لما متعرفش مين بيحب التاني أكتر الحب لما تحب واحد بيحبك

2007-02-12T10:46:00.000-09:00

كان يا مكان في قديم الزمان.. ومن سالف عصر الشخييير.. ولذيذ الطعام والمنااااااام كان هناك في ربوعنا السعيدة.. من بلاد السُّباتِ واللامسؤولية .. أربعة أشخاص هم * كل شخـص * * شخص مـــا * * أي شخــــص * * لا أحــــــــد * وكانت هناك أربعة أهداف لا بد من إنجازها في بلادنا السعيدة و طُلِبَ من كل شخـص أنْ يُنْجزَها أخونا كل شخـص كان متأكداً أن شخص مـا سَيُنْجزها !!! وأي شخـص كان يستطيع أن ينجزها لكن لا أحــد أنجزها !!! شخص مـا غضب لذلك... لأنها كانت أهداف على عاتق كل شخـص !! كل شخـص ظن أن أي شخـص يستطيع أن ينجزها ولكن لا أحــد أدرك أن كل شخـص لن ينجزها و انتهى الأمر بأن كـل شخص ألقى اللوم على شخص مـا .. عندما لا أحـد أنجز ما كان يستطيع أي شـخص أن ينجزه وتوته توته خلصت الحتوتة.. ******** وصلتني هذه القصة من البريد، وباعتباري شخــص ما يحس بالمسؤولية، قمت بنقلها لكم، وذلك بعد التعديل والتغير،وارجوا أن تضموا صوتي لصوتكم، فنرفع دعوانا لأمير البلاد بالحكم على هؤلاء الأشخاص الأربعة بالموت شنقا ، فبذلك تزدهر بلادنا على سواعد رجال الأمة الأحرار ********

مافيناش من زعل

2007-02-03T06:03:00.000-09:00

زمان فى عصر الابيض والاسود كان الحبيب يثبت حبه لمحبوبته بطرق عرفتها وقدمتها الافلام المصرية كأن ياتى لها تحت الشرفة ويلقى لها بالورود وكان من الممكن ان يتكرر هذا كل يوم حتى تشعر بحبه ومدى تضحيته من اجلها

و اذا عرف والدها او اخيها بالامر ليكون النهاية اما القتل او الزواج بالاكراه،

أو ياتى للغناء اذا استنفذ ما يملكه من اموال فى الورود التى يلقيها اليها يوميا

ولا يجب ان ننسى قول الفنان الكبير محمد عبد المطلب الذى يعد من اكبر الشواهد لحالة الحب الملتهبة هذه حينما قال

""ساكن فى حى السيدة وحبيبى ساكن فى الحسين..وعشان انول كل الرضا يوماتى اروحله مرتين. وفى الربع الاخير من القرن العشرين فى عصر الالوان والفيديو بدأت الناس بالانشغال والاهتمام بالاعمال اكثر من الحب والرومانسية بالرغم من انه كان عصر انفتاحى اكثر من عصر الابيض والاسود بتاع زمان

فاصبح وقت العمل متساو تقريبا مع وقت الحب بالنسبة للمحبين الذين كانوا يتفانون فى العمل من اجل الحصول على مايكفى للزواج بمن يحبونهم وكانت الهدايا فى هذا الزمن بسيطة ترمز للحب الصادق ولا اتذكر شاهد لهذا العصر. اما منذ نهاية القرن العشرين وفى يوم 14 فبراير تحديدا يتحول العالم من عصر الالوان الى العصر الاحمر هذا اللون الذى طالما ارتبط بالثورات والحروب والدماء والشهادة تحول بقدرة الله الى رمز الحب الاوحد

فمن يرى الشباب وقد ارتدوا اللون الاحمر ظنوا فى بداية الامر ان الحكومة قد امرت باعدام كل شباب البلد او بركان ثائر يلقى بحممه فى جميع انحاء مصر حينما يلاحظ ايضا ان الكافيتريات والمحلات والسنترالات حتى الصيدليات قد انقلبت الوانها الى اللون الاحمر

الا اذاكان يحمل نية طيبه لظن انه عيد الاحتفال بالشهداء .الا انه يفهم الامر حينما يرى مايحمله كل فرد منهم من هدايا مغلفة باغلفة حمراء ايضا وبعض الجليتور اساس (الرومانسية المروشنه) نسبة الى شباب مصر (الروش) فيعرف انه فى عيد الحب او الفالنتين داى ذلك اليوم الذى لم يعلم احد حتى الان كيف دخل مصر؟.

فالكل يعرف ان الحب لايحتاج لا زمان ولا مكان معين للتعبير عنه بهدية او بكلام الا انه من الواضح ان الشباب الروش لا يعترف بهذا المبدا فى هذا العصر نظرا لما تمر به البلد من ازمات فمثلما طلب الشعب توفير وظائف لحل مشكلة البطالة قام الشباب بتوفير مشاعرهم وحبهم ليوم الحب وكأن باقى السنة اجازة لا يصلح فيها تبادل الهدايا اوالتعبير عن المشاعر. شئ آخر لفت نظرى هو ان اللون الاحمر ارتبط بالنادى الاهلى ولذلك يكره الجمهور الزملكاوى هذا اللون بشدة لدرجة انى ارى بعض المتعصبن من جماهير الزمالك قد الغى من حياته اللون الاحمر فى كل شئ حتى ان يكتب بقلم لونه احمر. وفى نفس الوقت اختلفت الاراء حول الاحتفال بعيد الحب اذن... فالحل الوحيد للقضاء على هذا العيد هو ان نلفت نظر كل مشجعى نادى الزمالك المبجل ان اللون الاحمر وصمة عار فى تاريخ اخلاصهم لناديهم الحبيب وبالتالى فالاحتفال بالفالنتين خيانة شرعية لنادى الزمالك

وبذلك نقلل المحتفلين بهذا العيد. سارة الاسكافى

الموضوع ده اول موضوع يتنشرلى فى مجلة كلمتنا

وكان السبب فى نشرها وكتابتها من الاول هو العبقرى احمد مختار

شكرا جزيلا ليك يااحمد

ويارب ماتكونش اتخنقت وجبت اخرك منى لسة

2007-01-30T03:10:00.000-09:00

جرت أحداث هذه القصة في بلدة صغيرة قرب مدينة موسكو الروسية حتى ولو بدت أحداث هذه القصة كقصص الخيال لكنها حقيقية هذا رجل كان واقفا على جانب الطريق ينتظر أن توصله سيارة عابرة فهو يريد الذهاب للبلدة المجاورة في ليلة شديدة الظلام في وسط العاصفة الليل مر ببطء ولم تمر أي سيارة عابرة مرت ساعات وساعات وهو واقف كانت العاصفة شديدة والليل حالك لم يكن يستطيع أن يرى مكان قدميه أخيرا وبعد طول انتظارمرت سيارة تسير ببطء كأنها شبح شبابيكها سوداءخرجت من خلف الظلام وبلا أضواء مرت ببطء متجهة إليه حتى توقفت أمامه ركب الرجل داخل السيارة وأغلق الباب فجأة شاهد ما لم يتوقعه أبدا لا يوجد سائق لهذه السيارة السيارة بدأت تتحرك ببطء مرة أخرى بدأ الرعب يدب في قلب الرجل وبدأت السيارة تسرع قليلا اقتربت السيارة من منعطف خطير جدا الرجل بدا يدعو ربه من اجل البقاء على قيد الحياة لا محالة السيارة سوف تخرج عن الطريق وسوف يواجه الموت فجاه قبل المنعطف بقليل دخلت يد من النافذة وأمسكت الدركسيون وقادت السيارة عبر المنعطف بأمان أصبح الرجل فرحا مع بقاء الخوف والرهبة في داخل قلبه الرجل أصبح يرى اليد تدخل من النافذة عدة مرات كلما وصلوا إلى احد المنعطفات وأخيراقرر الرجل الهروب من السيارة ففتح باب السيارة وقفز منها ولاذ بالفرار ذهب إلى اقرب بلدة وكان مبتلا وفزعا ذهب إلى احد البارات وبدأ يخبر قصته المخيفة والمرعبة للجميع بعدما تأكدوا من هيئته انه غير مخمور أو ناقص العقل وكان الجميع ينصت للقصة في أثناء ذلك وبعد حوالي نصف ساعة دخل رجلان إلى نفس البار وعندما شاهدا الشخص المرعوب قال احدهما للآخر مش هوّ ده الأهبل اللي ركب العربية واحنا بنزقّها!؟؟ ********* منقولة

2007-01-27T07:58:00.000-09:00

حاجة مضايقانى اوى وشاغلة تفكيرى بقالى فترة من اول مازميلتى اتخطبت المشكلة مش فى الخطوبة ولا اتخطبت لمين المشكلة بعد الخطوبة الحياة ازاى هو يوكل اهله يدوروله على عروسة حلوة وبنت ناس

هما يلاقوا العروسة وينزل يتفق على كل حاجة ويخطبها ويسافر كل ده فى اسبوع واحد سنة وللا اتنين ويرجع يتجوزوا وياخدها ويسافر طب انا نفسى افهم امتى هيحصل بينهم التواصل امتى هيتناقشوا امتى هيتكلموا ويتفاهموا على تفاصيل حياتهم امتى هيحصل بينهم التفاهم ويفهموا طباع بعض من الاخر ليه فترة الخطوبة دى بدل اصلا مش هيشوفوا بعض الا وهو راجع يتجوز او لو نزل فى النص يومين اجازة

ده اللى بيفضلوا سنين مخطوبين وقبلها كامن سنة بيحبوا بعض ممكن فى الاخر ينفصلوا لانهم ماقدروش يفهموا بعض

يبقى ازاى هنحكم على واحد من مكالمات تليفون سريعة وللا حتى نت وللا مقابلة واحدة وقعدة جنبه فى كوشة

وللا هو طمع فى مركز ومال وخلاص هى دى تبقى جوازة؟

sarah