١٢.٢٩.٢٠٠٩

كل سنة وانا طيبة ..لازم تقروه لانه يهم كل فرد فى العالم

ممممممممممممم... كانت مفاجأة بالنسبالى لما دخلت النهاردة موقع الفيس بوك اللى ليا فيه 3 اكونتات وده مجاز قانونا حسب القانون الدولى للفيس بوك فرع الاقطاعيين الغلابة اللى زى حالاتى وبفتح واحد من الاكونتات دى اكتشفت ان عيد ميلادى النهاردة .. طبعا انا اذبهليت وتنحت ادام الشاشة شوية قلت الظاهر ان الواحد لسة نايم وبيحلم .. عملت مج شاى وجبت 7 سندوتشات لزوم الفوقان يعنى وقلت اقعد اشوف ايه الموضوع.. لقيت فى ناس بتهنى وناس داخلة ايدها فاضية ومشوفتش تورتاية واحدة على الوول حتى الواحد يحلى بيها بعد الفطار الخفيف ده.. بس فى حاجة غريبة .. لو النهاردة عيد ميلادى يبقى ليه فى بروفايل واحد والاتنين التانيين لا؟!!.. ولو النهاردة عيد ميلادى يبقى ليه الجو برد انا على ما اتذكر ان كان يومها الجو بيبقى حر ورطوبة وشرد؟؟!!.. طب لو النهاردة عيد ميلادى برضه يبقى ليه النهاردة مش طالعله شمس؟؟ انا فاكرة ان فى اليوم ده الشمس بتبقى طالعة مسيحة اى حد يفكر يخرج وهى موجوده.. طب بما ان النهاردة عيد ميلادى ليه التليفزيونات منفضاله وبتحتفل بالكريسماس وبابا نويل؟؟!! انا متعودة ان فى اليوم ده بيجيبوا جمال عبد الناص بافلامه بمسلسلاته بخطاباته بجنازته.. طب وبما ان النهاردة عيد ميلادى ليه الطلبة بتروح المدارس والجامعات وبيتكلموا فى الامتحانات اللى جاية والمراجعات والجو ده انا متعودة ان يوم عيد ميلادى الناس بتحتفل بنتايجها وبتروش ماهى بتبقى اجازة الصيف بقى.. يعنى احنا فى الشتاء طب ايه اللى جاب الصيف فى الشتاء؟ هل ده ليه علاقة بالاحتباس الحرارى اللى بيتكلموا عليه فى التليفزيون والصحافة والكليبات؟ .. طب ليه برضه الناس كلها نزلت شغلها ؟!!انا متعوده انه بيوم اجازة رسمى احتفالا بقدومى هذا العالم النكدى وانى سبب بهجتهم الوحيدة على سطح الارض وفى قلب السما طب انا لازم اخد موقف واتصرف واتخلى عن التفكير المنطقى واتجه للتفكير الاستدلالى واطلع دلائل تثبت ان عيد ميلادى صيفى مش شتوى فتحت البروفايلين التانيين وقلت اشوف عيد ميلادى امتى ماهو برضه الزهايمر مخلاش حاجة للجهابذة اللى زيى بصيت لقيته فى يوليو ايوة هو يوليو ده اللى عملوا فيه الثورة لما عرفوا انى هاجى انا حتى فاكرة انهم اتحايلوا عليا امسك الحكم وانا رفضت تواضعا منى يعنى فتحت البروفايل التالت اللى بيحتفل بعيد ميلادى لقيت ان التاريخ مكتوب هو هون اللى فى الاتنين اخواته.. ايه الجنان ده بقى!!.. اتصلت بواحدة صاحبتى على التليفون سالتها النهاردة ايه قالتلى 29 ديسمبر مارى كريسماس ياسوسة.. طبعا مردتش عليها وقفلت فى وشها اتصلت بخالى اللى فى الداخلية عشان اساله على اللى بيحصل ليكونوا غيروا معاد الثورة ولا حاجة قالى "الحكومة تعمل اللى هى عايزاه ما تتدخليش فى اللى مالكيش فيه احتفلى وانتى ساكتة" وبناء عليه قررت انى احتفل النهاردة بعيد ميلادى وللى هيسالنى بقى عندك كام سنة يا سوسة هرد بكل فخر واقوله انا النهاردة تميت 23 سنة و5 شهور و7 ايام وياريت محدش ييجى ايده فاضية لان واضح ان عشان خالى واصل الحكومة قررت تحتفل بعيد ميلادى مرتين فى السنة كل نص سنة وانا طيبة