3.01.2007

كل الافلام العربية بتنتهى دايما بموت عنصر الشر فى الفيلم يااما يموت يااما يتسجن وقبل ما يدخل القفص يبص للبطل والبطلة ويبصلهم وعلى وشه كل ملامح الاحساس بالذنب ويقولهم "سامحونى انا غلطت فى حقكوا بس خلاص انا توبت لله سامحونى سامحونى "ويدخل فى وصلة عياط وشحتفة ويسحبه العسكرى من دراعه ويدخله جوة الزنزانه او عربية الترحيلات وينتهى الفيلم بجواز البطل والبطلة وفجأة تطلع الصورة ملغوشة عشان يكتبوا كلمة النهاية. انا بقى بقالى سنين طويلة نفسى اشوف كلمة النهاية مكتوبة على دور برد باخده، على طول عندى برد ومش بيروح طب ده ايه سببه مش فاهمة مش ممكن الجو ملخبط طول السنة عشان البرد ده ماياخدش منى اجازة غير مرتين تلاتة غالبا بيكون تعب فيهم من شغله فبيقررياخد فترة راحة منى لمده اسبوع وللا حاجة وبينى وبينكوا ببقى مفتقداه فى الفترة دى بشكل رهيب لانه خلاص بقى جزء منى وممكن لو اتاخرعليا شوية وللا حاجة اصحابى بيقلقوا عليه وبيفضلوا يسالونى عنه كتير حاولت اقنعه يجيب موبايل وانا اللى هشحنله بس عشان يطمنى عليه رفض وقالى ما تتدخليش فى حياتى بالرغم من انه متدخل فى حياتى بشكل جذرى انا جربت جميع الادوية اللى يها علاقة بالانفلونزا من قريب ومن بعيد من اول ما سمعوا عن الادوية فى مصر الفرعونية لحد اخر موديل نزل امبارح وبرضه ماجابش اى نتيجة عمرى ماشفت حب بالشكل ده من غير البرد ده حسة انى ممكن اضيع مش عارفة لو سابنى هعمل ايه هو اللى بيخططلى حياتى وهو اللى بيوافق او يرفض مواعيدى وهو اللى بيتحكم حتى فى الهدوم اللى بلبسها لو عشت طول عمرى ادول فى صديق بالشكل ده عمرى ما هلاقى لو خدت راى حد مثلا من اصحابى على حاجة نفسى اعملها وطلبت رايه فى الموضوع وكانت الحاجة دى غلط ممكن مايرضاشيقولى يااما بقى خايف على شعورى يااما خايف اقوله ماتتدخلش فى حياتى الشخصية بس هو البرد مفيش غيره اللى بيدينى قراره وبيفرضه عليا كمان وبلاقى نفسى قايمة الصبح نفسى اطلع رحلة للمقابر يمكن ارتاح من ديكتاتوريته اللى خلاص مع الوقت فهمتها واتعودت عليها ومبقتش قادرة استغنى عنها
نفسى الاقى دكتور يفهمنى ويعرف ان البرد بتاعى مالوش حل من الحلول الطبيعية اللى بيقدمها للمرضى الطبيعيين اللى البرد بتاعهم مش بياخد اكتر من 4 ايام ويوم ما يفترى عليهم يبقى اسبوع ياجماعة انا اكتشفت ان شخصيتى بقت ضعيفة ادام البرد كده مده صلاحيتى انتهت خلاص بسبب تسلطه عليا انا هرفع عليه قضية خلع
بس ياخوفى يطلع عندى نوع نادر من البر مش بينتهى غير بانتهاء المريض:(

هناك 10 تعليقات:

Mohamed Hamdy يقول...

جميل موضوعك يا سوسه , كمان اللغه الى مستعملاها جميله ... بسيطه وخفيفه ...

أما عن البرد الى عندك أنا إحترت فيه الصراحه .. بيجيلك 7 برد فى اليوم أو حاجه زى كدة ...

لكن متخافيش .. أكيد فى يوم من الأيام هيظهر علاج للمرض الى عندك دة

مع حبى

sosa يقول...

ماهو حد يتصرف ويشوفلى حل فى اللى بيحصلى ده
وبعدين بدل ما تدخل وتكتب كلمتين
اكتبلى دوا جديد

وللا تفتكر احضر الدكتوراه فى البرد احسن؟

غير معرف يقول...

ربنا معكى
شاركينا الحلم على
www.maktoobblog.com/impossiple_man

sosa يقول...

ميرسى يااكرم على دعوتك
وان شاء الله هزور مدونتك فى اقرب فرصة

Ranaٌ يقول...

هايلة هايلة هايلة
انا كدة اقتنعت انك بتكتبي ساخر راااااااائع
بجد فظيعة
كرهتيني البرد وحسستيني انه فيا مش فيكي
سوستي الجميلة..اوعي تبطلي كتابة
واوعي تنسي اني او حد قالك اكتبي
بت ياسوسة انت قليلة الاصل ومش عشرية بقى البرد يحبك وانت تكرفيه؟ ده حتى عيب ومش من حقوق المرض على صاحبه
جمييييييييل يا سوستي
الى الامام دائما
تحياتي

sosa يقول...

ايه يابنتى الكلام ده
احبطتينى حرام عليكى
ساخر ايه اللى بكتبه
دى مجرد تخاريف بعيد عنك
ومش هنسى انك اول واحدة خلتنى اكتب
ومش هنسى كمان ان مختار اول واحد شجعنى بجد على الكتابة وبيطلع جنانى(وش بيطلع لسانه)


بالنسبة للبرد بقى الحمد لله انا بقيت احسن كتيييييييييير
شكله زعل ولم مناديله وساب البيت
يارب مايرجع تانى

sahr يقول...

برضه البرد هو اللى مش عايز يسيبك انتى ياساره مش عارف اقولك ايه
بجد عمرى ماكلمتك الا وعند برد متجوزيه وتريحى نفسه وهو العشره متهنش وانت اخدتوا على بعض بس اهم حاجه يبعد عن المرض التانى انتى عرفاه طبعا

الحب المستحل
ساهر

sosa يقول...

حسبى الله ونعم الوكيل

خمسة فضفضة يقول...

السلام عليكم
الف سلامه عليك من البرد ، اكيد ده سببه ضعف مناعه ، حاولي تاخدي حاجه تقويها شويه
وان شاء الله البرد ها يسيبك بالتلاته

sosa يقول...

فضفضة
الله يسلمك يارب
بس انا عايزة اقولك انه بقاله سنين مش بيفارقنى
والدكاترة تعبوا معايا
وجربت جميع ادوية البرد ومش نافعة
طب اعمل ايه تانى