٨.٠٥.٢٠٠٧

انا والمترو والـ.. حسبى الله ونعم الوكيل

احم احم
ربنا يستر علينا
اصل الموضوع بجد صعب
وابتدى يدخل معايا فى منحنى الخطورة الصحية والنفسية وانا واحدة وخايفة على نفسها ومش مستعدة للانتحار الاجبارى ده
طبعا فاكرين موضوع ايه حكاية المترو والعقدة اللى جاتلى بمجرد ماعرفت موضوع التهديدات مع دخولى فى يوميات احتفالى بعيد ميلادى اللى مالهوش ملامح ده
ونظرا لحالة الرعب اللى انتابتنى فى الوقت ده انا قررت ااجل سفرى حبتين لحد ما يفجروا المترو او يولعوا فيه
ما انا اصلى ياجماعة مش عايزة اقاطعهم فى اكل عيشهم واشيلهم ذنبى
اصلى بت جدعة وقلبى على الناس كلها
واللى هيفجروا المترو دول اكيد اصحاب عيال
مايرضينيش انهم يتيتموا بسببى يعنى
بس بعد شوية تفكير عميق انا قلت الاعمار بيد الله والواحد لما يموت شهيد احسن مايموت من الخوف وانا نفسى اموت شهيدة وادخل الجنة
وطز فى اللى هيفجروا المترو وعيالهم هو انا كنت خلفتهم ونسيتهم يعنى
ولا انا ولية امرهم
خدت بعضى ولميت حاجاتى ومحتاجاتى ونطيت فى اول عربية نازلة القاهرة طبعا مع بابا لتفتكروا ان الشجاعة خدت حقها معايا
بس هووووووووووووووووب استنوا
بابا جه عند المترو ولسة هننزل محطة احمد عرابى وقالى استنى ياحلوة
(اول مرة يقولهالى فى حياته على فكرة)
قالى خدى حق التذكرة وطريقك اخضر اصلى مستعجل وهاخد تاكسى
قمت غمزتله غمزاية حلوة كده وقلتله المترو اقربلك
قالى لا اصل لسة عندى كام مشوار
قلت بس بابا شكله متفق مع اللى هيفجروا المترو عليا عشان يهرب من هدية عيد ميلادى اللى مجابهاش
باهباهات اخر زمن
بس الحمد لله جت سليمة
ودعت بابا ونزلت وانا عمالة اقرا قران وادعى ربنا انى اروح سالمة غانمة
(وحصل الحمد لله بالذات موضوع غانمة ده:))
لقيت الناس بتتفتش
قلت يابت كرامتك حاسبى عليها محدش يخطى برجله عليها خدت شنطتى على كتفى واتعنتظت ومشيت شبه الديك الرومى النافش ريشه ولا عبرت لا عسكرى ولا ظابط ونزلت نطيت فى اول مترو قابلنى فى عربية السيدات
ما انا اصلى اخاف اركب فى العربيات المشتركة ليحصل فتنة بين الشباب اللى فى المترو ويحصل مشادات كلامية ومناوشات تؤدى الى فتح الدماغ بالشوز اللى فى رجلى
بس صراحة لقيت المترو شكله يفرح ومنور وفاضى وهواه يرد الروح
وصورته للذكرى الخالدة اصلى مش هشوفه كتير
طبعت روحت البيت حلوة ومزأططة وعشت حياتى
****
تانى يوم كان بابتى عاملى رحلة متروهية تاكساجية لمستشفى العيون
اصل بعيد عنكوا العبقرية خدت حقها معايا شوية وطلعت عينى
فروحت عشان ارجعها تانى
خدت المترو وكان حلو وتمام وقضيت اليوم مع بابتى فى الهوسبيتال وبعد معاناة البحث عن العلاج
مالقتهوش ورجعت
خدت المترو من محطة محمد نجيب كان المترو حلو وايزى وزى الفل زى الصورة اللى فاتت كده قلت حلو كده يابت ده النهاردة كمان هتروحى مزأططة
طلعت عشان ابدل من محطة سى انور بيه السادات فضلت مستنية ييجى تلت ساعة كده
ان ييجى امترو.. ابدااااااااااااااا
استنيت 5 كمان
ان ييجى المترو.. بتاتاااااااااااا
فجأة وبعد انتظار طويل جه سيادة المترو وطبعا كانت مصر كلها راكبة وانا مش عايزة اقول للسادة الرجال الافاضل ان عربية السيدات بتبقى بعيد عنكوا العن مليون مرة من العربيات المشتركة
ونظرا لان الساعة بقت 11 ونص وانا لسة فى الشارع فانا مركبتش المترو ده وقلت تاخير بتاخير استنى اركب واحد نضيف ده مكنش فيه خرم ابرة تطريز ينفع ادخل فيها
استنيت
واستنيت
واستنيت
10 دقايق والمترو التانى جه سبحااااااااان الله الناس مكنتش كتير ساعتها
قمت هووووووووووب نطيت فى اول عربية ووقفت جنب الباب عشان المترو ده الحمد لله لغوا منه التكييفات والمراوح فكان لازم يبقى فى عندى متنفس للهوا ماهو انا مش بطلة سباق نفس ياجماعة
محطة بعد محطة
بصيت لقيت العربية بقت بالشكل ده
طبعا ده قبل ما الموقف يتطور وابقى ان وباب المترو عبارة عن كيان واحد
طبعا مش ده كل اللى حصل
كله كوووووووووووووم واللى الستات بيعملوه كوووووووووووووووووووم
ده الواحدة تبقى داخلة حلوة وعايقة ومتضايقة ومتزوقة ومتبرفنة ومستحمية
بتخرج شكلها زى اللى دايس عليها قطر
من كتر الزحمة وريحة العرق اللى مالية العربية ياسااااااااااااااااااتر بجد كان هيغمن عليا من الريحة وتلاقى الست من دول جاية تلزق فيا
من جمال ريحتها يعنى 11 محطة اغمن عليا فيهم 11 مرة
حراااااااااااااااااااااااااام
طب اعلانات مزيلات العرق اللى مالية الشوارع والارصفة والتى فيهات دى بيعملوها ايه
تعمل ايه شركات التعطير القومية اكتر من كده
مش هاين عليكوا حتى تشتروا ازازة برفان من الراجل اللى بيقف على محطة المترو ب2 جنيه ونص
والله ليهم حق الرجالة يطفشوا مننا
سوأتوا سمعتنا منكوا لله
هى العنوسة جت من شوية
ماهو من اهمال الستات ولا هما عشان اتجوزوا يعنى خلاص ييجوا على البناتيت القطاقيط الغلابة اللى زينا يعنى
يووووووووه خرجونى عن الموضوع
المهم
فى نوع ستات تانى بقى فى عز الزحمة وعز الحاجة للتعاون بين الناس تلاقيهم دخلوا قلعوا الشوزات والشباشب بتاعتهم وقعدوا ومددوا على الاض
وكل اللى فى العربية يخبطوا دماغهم فى اكبر حيطة فى اكبر محطة
ولو قولت لواحدة لو سمحتى بس وسعى شوية مش عارفة اقف تحسسنى انى جيت على حاجة من املاكها
هفففففففففففففففففففففففففففففف
ستات تخنق بصحيح
والله الواحد مبقاش عارف يعمل ايه عشان يعرف يركب مترو
معلش طولت عليكوا
والله اختصرتلكوا ده الرحلة من انور بيه السادات للمطرية طوييييييييييييييييلة
والحمد لله انى كنت جنب الباب

هناك ١٣ تعليقًا:

أُكتب بالرصاص يقول...

ممكن احطها عندي في حصاد المدونات


بصراحة

موضوع الريحة ...


يقرف قوي

مش الموضوع
..اقصد الريحة

فعلا ..
الناس خلاص مباقهاش عندها اي احساس بالمسئولية

يا سلااااام
المترو .. وعربية الستات ، والريحة

فكرتيني بالذي مضا

غير معرف يقول...

خنقة تفوت ولا حد يموت
طيب انتي حصلك كدة من مرة واحدة ركبتي فيها المترو وشكلك كدة مش حتكرريها كتير طيب اية رايك بقي في اللي بيركبوا المتروا كل يوم وتتخيلي حالتهم النفسية اية بعد ماينزلوا منة واللي بينعكس علي بيوتهم واهاليهم

بجد الحياة تخنق بس يا سيدي اديكي صورتي المتروا في حالة نادرة مش حتشوفيها غير يوم اجازة الله يكون في عون الجميع
سلام يا جميل

Sarah el eskafy يقول...

اكتب بالرصاص

اتفضل طبعا
حطها مكان ماتحب
وياريت توزع معاها مزيل عرق


بس هو ايه اللى فكرتك بيه بالظبط؟؟؟؟؟؟؟؟؟؟؟؟

Sarah el eskafy يقول...

سيجو

على فكرة انا شبه مقيمة فى القاهرة
لان انا شبينية قاهرية
والصيف اللى فات كنت بركب الخطين 4 مرات يوميا
فى جميع الاوقات
بس كنت جبت اخرى بقى المرة دى
ماهو اصل كله الا عيد ميلادى
لازم يكون عيد ميلاد على حق

بس عادى عادى
بركبه اكتر مابركب مواصلات فى بلدنا
نحن من الشعب:))

nohamy يقول...

طب انا بركب من السادات الى المرج
اعمل اية بقي

قولى الحمد الله

Sarah el eskafy يقول...

الحمد لله

أُكتب بالرصاص يقول...

المترو .. وعربية الستات ، والريحة

بسمه عبدالباسط يقول...

والله موضوع عبقرى ما أنى ما ركبتش المترو قبل كده لأنى مش من مصر بس بجد أنا بقيت خايفة أجى عندكم من اللى هيحصل ليا
بس بجد طريقتك فى كتابة الموضوع حلوة قوى وعجبتنى جدا
وكمان الصور معبرة جدا عن الموقف اللى أنتى كنتى فيه بس عايزة أعرف عرفتى تصورى أزاى فى الزحمة دى ومحدش خد باله أنك بتصورى بيتهيألى لو كانوا خدوا بالهم كانوا قطعوكى
تحياتى لكى

micheal يقول...

امتي بقي ربنا يتوب علي الواحد من ركوب المترو و قرفه
تحياتي

Sarah el eskafy يقول...

بسبس
ميرسى ياجميل
بس ماتخافيش من المترو
لسة مابقاش متوحش للدرجة
ابقى اركبيه بس فى غير اوقات خروج ودخول الموظفين
وانتى هتلاقيه حلو وزى الفل كمان

الصور اللى صورتها دى الاولى كانت عادى محدش كان مركز
التانية بقى وما ادراكوا ما التانية
كان تقريبا فى 2 ستات تحتى وانا واقفة
فكان مستوى نظرى مرتفع شوية
وخدت الموبايل ولقطتها خلسة (حلوة خلسة) والحمد لله مااتقفتش والا كان زمانى انا وارضية المترو جزء لا يتجزأ من بعض

Sarah el eskafy يقول...

مايكل
اهه ارحم من زنقة الميكروباصات
وعتبة عتبة رمسيس
وتعالى يا باشا اركب كله فاضى ورا
وتكتشف ان اللى الحاجة الوحيدة اللى فاضية هى دماغ السواق

3ala asm masr يقول...

بما ان انا مش من القاهره فانا ركبت المترو ده مرتين او تلاته بس ومن وقتها حولت من الكليه خالص اساسا
ورجعت بلدى
من خرج من داره اتقل مقداره
ولا انتى ايه رايك

غير معرف يقول...

مع انى من القاهره بس مش بشوف المترو ده غير مره او مرتين فى السنه وفعلا بيبقى فى منتهى الفظاعه الله يكون فى عون اللى بيركبوه على طول حقيقى