٩.١٠.٢٠٠٧

ارحموا امريكى قوم ذل

موقف وحصل
خلانى احس بمليون رد فعل مع بعض
طبعا معظمهم خنقة ونرفزة وعصبية وشد شعر
مش عارفة هلاحق على الناس شعر منين
اللى حصل بقى يا جماعة الخير ان احنا لينا قرايب فى امريكا
جه اصغر واحد فيهم زيارة بقى
وكنا قاعدين ومبسوطين طبعا اننا اخيرا شوفنا قريبنا ده
لان العلاقات بيننا كانت شبه مقطوعة لحد ما دخل الانترنت ونور حياتنا
وفى قعدة من القعدات العوائلية التى تصيب بحالة التخمة الفكرية
كل الكلام اللى كان بيدور فى وجوده عن الاسعار اللى بقت نار وعن العيشة اللى بقت تزهق
وعن الدخل القومى اللى بيضيع فى المواصلات وعن فلوس المترو اللى مش عارفين بتروح فين
الخ .. الخ.. الخ
ويوم ماعينى الولد الغلبان قال انا مواطن امريكى مصرى
حسيت ان ثورة يوليو قامت من تانى
ازاى تقول انك امريكاوى
انت مواطن مصرى ابوك مصرى وامك مصرية يبقى انت كمان مصرى
وهو غلبان ياعينى اتصدم من منظر الثورة الشعبية اللى قامت عليه
قال لما اقصر المواضيع
قالهم انا مسلم امريكى مصرى
مايعرفش انه جنى على نفسه
قامت الثورة من تانى
وحسسونى كانه عايش طول عمره فى مصر وجه دلوقتى اتنكر منها
ياجماعة
يابشر
الراجل ده جنسيته الاولى امريكاوى
مكتوب فى الباسبور
امريكان سيتيزن
منين جبتوا مصراوى سيتيزن دى
وبعدين هو بعد كلامكوا عن مصر والى بيحصل فيها وكل حسدكوا عليه انه عايش امريكاوى ولا على باله اللى بيحصل هنا
دلوقتى مصر بقى حلوة
وعار اللى يدخل اويقول انه مش مصراوى يعنى
شئ غريب عجيب مريب حقيقى يعنى
ياناس ارحموا امريكى قوم ذل للمصريين
هو معترف انه مصراوى بس دى جنسيته التانية
ليه تعملوا فيه كده
عقدتوه وعقدتونى
حسبى الله ونعم الوكيل

هناك ٧ تعليقات:

Rannon يقول...

سارة ياحبيبتي براحة شوية أعصابك
انتي مقتنعة ان جنسيته الاولى أمريكي
مع ان المفروض ان جنسيته تكون لأهله وطالما ابوه وامه مصريين يبقى هو مصري حاصل على الجنسية الامريكية تقريبا كدة والله اعلم
بس انتي هدي نفسك زكل شي هيتحل ان شاء الله ده كل ئ بالخناق الا الموضوع ده بالاتفاق :D

حسام مراد يقول...

ياااااااااااه حمدلله على السلامه يابنتى انا مقتنعتش برده بفكره مدوناتى مغلقه للابد ههههههه ده ادماااااااااان هههههههه
هو عادى والله بس اللى ثارو دول هما منتظرين من واحد اتولد وعاش فى امريكا يقول ان جنسيته الاولى مصر ليه عشان الوالدين
انا حاطط نفسى مكانه والله كنت هاقول اللى قاله
معلش يعنى انا دلوقتى لو ابويا من اى حته واتولد وعشت فى مصر لو كنت قولت انا مثلا جنسيه ابويا مش كانوا هايثوروا برده
انا شايف ازدواجيه فى مجتمعنا كبيره جدا
وحمدلل ع السلامه
وكل سنه وانتى طيبه
ورمضان كريم

Eric Matt يقول...


حمدالله على السلامة

فعلا الموضوع ده مشكلة بجد

الحمدلله اني مصري

تحياتي لك من ماناساس البلد

غير معرف يقول...

الانتماء لا يفرض .. الانتماء يزرع في الإنسان من صغره .. لما يكبر يلاقي بلده دي أم صالحة بتحبه وتخاف عليه وتديله حقوقه .. الحكاية مش حب عذري .. الحكاية مواطنة .. حقوق وواجبات
لك تحيتي

3ala asm masr يقول...

بالرغم من انتمائى وولائى الكامل لهذا البلد
الا ان انا معاكى تماما
هو يعرف ايه اساسا عن مصر
والاحسن انه ميعرفش
بدل ما يقول انا مسلم امريكانى امريكانى امريكانى
ويجعله عامر

TAREK ELMAHALLAWY يقول...

مش مهمة جنسيته ولا لونه ولا ديانته
المهم الانسان بداخله هو ده المهم
هل هو أنسان في تعمله مع الاخرين ولا لأ

TAREK ELMAHALLAWY يقول...

مش مهمة جنسيته ولا لونه ولا ديانته
المهم الانسان بداخله هو ده المهم
هل هو أنسان في تعمله مع الاخرين ولا لأ