2.12.2007

الحب زي الكيميا

هو الحب حاجة زي الكيميا.. حاجة كدة بتحصل متعرفلهاش تفسير الحب هو إنك تحب إنسان معين لذاته مش لأي حاجة تانية هو إنك تشوف حبيبك أجمل واحد في الدنيا.. أحلى من كل البشر الحب هو إنك تخاف عليه الحب هو إن هو يخاف عليك أكتر ما بتخاف على نفسك الحب هو إنه يوحشك و هو جنبك هو إن حبيبك يبقى مالي عينيك هو إنك تحافظ على كرامة اللي بتحبه وتحط صورته دايما أصاد عينيك الحب هو إنك تبقى عايز تتغير و تكون أحسن عشانه هو.. لما تبقى ضحكة حبيبك و سعادته عندك أهم من أي حاجة تانية الحب هو مكالمة تلفون تجيلك في عز مانت مشغول و متضايق و تنسيك تعب الدنيا الحب هو حد بيقولك كل سنة وانت طيب ليلة عيد ميلادك هو لما تحس انك قادر تواجه اي مشكلة مادام الشخص ده واقف جنبك الحب لما تبقى عايز تشوف حبيبك احسن واحد في الدنيا الحب لما حبيبك ياخد بايدك و يقربك من ربنا الحب لما تحس بالامان وانك ماسك الدنيا كلها بايدك الحب لما تدي للي بتحبه من غير ما يسال الحب هو انك تغفر لحبيبك هو انك تسامح الحب لما تفهم حبيبك من نظرة عينيه.. الحب هو انك تقابل توأم روحك الحب لما تحس بحبيبك من غير ما يتكلم حتى وهو بعيد عنك الحب لما متعرفش مين بيحب التاني أكتر الحب لما تحب واحد بيحبك

هناك 10 تعليقات:

fnan_geology يقول...

ايه الحب ده كله
بجد بوست جميل وكله حب فى حب
ربنا يديم المحبه
واحساس رائع بجد

وحلى جمله بجد عجبيتنى

الحب لما تحب واحد بيحبك

وسلااااااااااااااااام

sosa يقول...

مع ان البوست مش بتاعى
ونقلاه طبعا
بس عجبتنى معانيه جدا
ميرسى ليك يافنان جدا
ومش محتاجة اقولك ان الحب مش لازم يكون بنت وولد

The Eagles يقول...

الحب كلامات لا يستطيع ان يصفها بشر حتى ولو اجتمع كل البشر على وصفها لن يستطيعوا انا يصفول منها حتى ولو جزء صغير
بس انتى بجد لمستى في الحب حاجات كتييييييييييييييير
وكلامك جميل جداااا
ادعوكى لقراءة الليل الدافىء عندى ويا رب تعجبك


والسلام.........

sosa يقول...

ميرسى اوى على ردك عليا
بس كملحوظة ان البوست ده منقول مش من كلامى
ويشرفنى انى اجى مدونتك فى القريب العاجل باذن الله

saher يقول...

بجد زوقك عالى جدا فى الكتابه وده اللى حسيتى من البوست, لانه عبر عن حاجه كنت بتمناها ومازلت بتمناها انى ارتبط بانسانه فيها نفس الشروط اللى مكتوبه وكان الحب هو اللى بيتكلم والاجمل انك عبرتى عن حاجه من داخلنا يعنى صعب اى حد يشفها لكن الانسان الحساس هو اللى يقدر يعبر عنها مرسى جدا

sosa يقول...

ساهر ميرسى لردك اوى
بس للاسف الموضوع مش من تاليفى
ده منقول بس عجبنى

Rana يقول...

ميرسي يا سوسة
عارفة على ايه
على انك عرفتيني الني مش بحب وتنقريبا مش هحب
حب ايه اللي انت جاية تقولي عليه
دماغك ياقمر
الحب في الله هو أجمل معاني الحب
سلااااااموز

sosa يقول...

ماشى ياست المعقدة
يارب اشوف فيكى يوم

عروسة النيل يقول...

يا نهار أبيض
البوست ده بقيت أشوفه في كل حتة هههه
بالمناسبة انا إللي كتبت الكلام ده
و اول مرة اتنشر كانت بتاريخ 1 أغسطس 2004 و كنت بعتاها لاحد الجروبات
و رجعت افتكرتها تاني السنة دي في عيد الحب و بعتها لنفس الجروب و من لجروب طارق فاروق و منها لقيت الكلام ده مبعوت في خمسميت حتة هههه

(أنا كنت داخلة عشان استطلاع الرأي إللي كنتي قلتي عليه)ا

sosa يقول...

الحمد لله انى لقيت صاحبته
انا مش مصدقة نفسى
عشان الكل فاكر انى انا اللى كاتباه عشان منزلاه عندى
بس بجد كلامك رائع ويستحق الكثير

بالنسبة للاستبيان ياريت تبعتيلى ميلك عشان ابعتلك عليه الاستبيان