4.15.2007

مفيش كلمة هتقول اكتر من كده
كل مرة بنطلع الصحف والاخبار صح وبنقول ده بيحصل وبيحصل
المرة دى بقى انا بقولها
اللى مكتوب فى اللينك ده كدب كدب كدب
اقروا اللى مكتوب فى الخبر ده وانا هقول اللى عندى
اولا انا فى اليوم ده انا كنت موجودة فى الجامعة من الساعة 9 صباحا لحد الساعة 3عصرا
ثانيا محصلش اى نوع من انواع المظاهرات
كل ما فى الامر ان كان فى شخص مسئول جاى الجامعة هيدى محاضرة فى قسم علم النفس وللاجراءات الامنية كان لازم يامنوا مجمع الكليات كله فزودوا عدد الامن المركزى والظباط ابتدوا ينتشروا بشكل ملحوظ وشددوا على
الدخول للجامعة وبالتالى كان عدد الطلبة على باب الدخول ضخم جدا جدا فى وقت زى الساعة 9 الصبح ويوم الاحد ده بيبقى معظم المحاضرات شغالة والطلبة كتير جدا
بالنسبة للحفل
حفل الاخوان كان فعلا المفروض يتعمل يوم الاحد وعلشان السيد المسئول حضر اولمادخلت الجامعة ملقتش اى حاجة بتعلن على الحفل كالعادة
ومكنش فى حفلة من اساسه
لما هو مفيش حفلة ومفيش مظاهرات يبقى منين خدوا جهاز كمبيوتر وكاميرا وحصلت مناوشات وفى طالب مصاب
ده غير ان الحياه طول اليوم وردية زى مابيقولوا
ماشفناش مشاكل ماسمعتش اى كلام
لان لما بيحصل اى مشكلة فى الجامعة بتنتشر بسرعة البرق
فازاى افضل 6 ساعات فى الجامعى ومااسمعش اى حاجة من دى ومااشوفش اى قلق
ولو فرضنا ان المظاهرات دى حصلت بعد الساعة 3
فالجامعة اصلا مش مسموح لاى طالب يبقى موجود فيها بعد الساعة 2 بالظبط الا اذا كان ليه محاضرات يعنى بننزل بنلاقى مفيش غير الطلية اللى خلصوا محاضراتهم وراجعين بيوتهم
حاجة اخيرة بقى
حفلات الاخوان انا حضرتها اكتر من مرة
مش بيعملوا فيها اكتر من قراءة قران فى بداية ونهاية الحفل
وبعدين اغانى دينية كل الناس بتسمعها يعنى الرقابة سمحاها مفيهاش حاجة زيادة عن المسموح
وبعدين بيقدموا عروض مسرحية ساخرة قصيرةلاتمس السياسة ولا تسئ للدين الاسلامى
وبس
مع العلم انا مشمن الاخوان ولا حاجة
انا بس انسانة رافضة الظلم
واللى عنده اعتراض يجيبلى دليل انى بتكلم غلط
***********************************
تصحيح بسيط
بالنسبة للمصاب فعلا عرفت دلوقتى ان فى مصاب
بس المصاب ده كان من الاخوان المتعصبين اللى حاول يخرج معترض على الغاء الحفلة
وطبعا مش عايزة اكمل انتوا عارفين الباقى
اتخبط فى الباب ياجماعة بدماغه كذا مرة وهو خارج ياجماعة;)

هناك 11 تعليقًا:

shams يقول...

مفيش دليل يا سارة أكبر من واحدة زيك شاهد عيان شافت اللي حصل وحكته بالضبط

هم عايزينا نصدق اللي بيقولوه علشان مفيش حد بيكدبهم ولا بيرد عليهم ويقول لأ محصلش .. أحييك على جرأتك وشجاعتك

سلام وخلي بالك من نفسك

sosa يقول...

ربنا اللى بيستر
ميرسى ياشمس

حسام مراد يقول...

امال هما هايقولوا ايه
وكمان بيقولك واحد اتصاب هههههههه
على كده كان فى مناوشات جامده اوى
يلا سلام
وخلى بالك من نفسك
سلام

sosa يقول...

حسام انا عدلت البوست عشان فى حاجةعرفتها
كده الحمد لله الامور كلها وضحت
اشوف وشكوا بخير بقى:(

بنى أدم مع وقف التنفيذ يقول...

انتى مدونة شاطرة ..برافو عليكي انك كشفتى الحقيقة
بس عاوز اعرف مصراوي يكدب لية
ياريت حد من مصراوي يرد او يعتذر

sosa يقول...

انا فى الخدمة
المفروض كانوا يتاكدوا انى مش هناك قبل مايفبركوا حاجة زى دى
وقريبا نوافيكم باخر الاخبار

محمد الهنداوى يقول...

الفكره مش مصراوى بيكدب او لا
الصحفى او المراسل بيسمع كلمه وما بيكلفش خاطره يتأكد منها
وده الطبيعى الايام دى
المهم اخبار الباب اللى الطالب اتخبط فيه ايه؟
احسن يطالبوه يصلحه كمان
حسبنا الله ونعم الوكيل

محمد الهنداوى يقول...

بخصوص الاستبيان اللى على موقعك حاولت املاه بس لما نزلته ملف الوورد مش بيفتح
شوفى حل

sosa يقول...

محمد الهنداوى
المشكلة مش فى ان الصحفى ماكلفش خاطره واتاكد
انا نفسى اعرف الحكاية دى انتشرت ازاى
عشان انا جالى تليفونات كتير اوى بتتاكد من حكاية القنابل اللى اتفجرت فى الجامعة واللى هشوف الموضوع ده بعدين ويمكن يطلع ان كان فى اتنين صحاب بيفتحوا ازازتين حاجة ساقعة وللا حاجة

وموضوع الباب ده واضح بقول غصب عنه (غصب عنه)

وبالنسبة بقى لموضوع الاستبيان ممكن تبعتلى ميلك وانا ابعتلك الاستبيان عليه بدل هو معموله عمل كده ومش بيرضى يفتح

الدمعه يقول...

بجد انتي هايله وبحييكي على شجعتك وجرئتك بس انتي صح
لازم لو انتي شايفه حاجه غلط تقولي ربنا معاكي يا جميل ويقويكي ودايما كدة تظهري الحق
بارك الله فيكي

sosa يقول...

ميرسى ياجميل على ردك واهتمامك
مستنياكى فى بقية المواضيع