5.06.2007

ففهمناهــا سليمــان

من زمان وانا بلاحظ العملية دي
الآيات القرآنية في كل مكان شيء جميل
ولكن أن يكتب سعيد الفكهاني
وفاكهة مما يتخيرون
وعم عبده الفرارجي
ولحم طير مما يشتهون
وسيد بتاع الكشري
كلوا واشربوا هنيئا بما أسلفتم في الأيام الخالية
وعند افتتاح أي محل
إنا فتحنا لك فتحا مبينا
وهاني القهوجي كتب على يافطة القهوة
وسقاهم ربهم شرابا طهورا
مش ناقص بقى غير ييجي بتاع الرقيق يقول
وحور عين كأمثال اللؤلؤ المكنون دي حاجة تخنق بجد ... ********
وانا ماشي في الشارع بقى من يومين فوجئت ان عندنا فيه انتخابات برلمانية في مصر ...
آه والله تخيلوا فيه انتخابات امتى وفين مش عارف بس عادي بتحصل في احسن الدول المهم
فوجئت ان كل واحد بيستخدم الآيات القرآنية على مزاجه
الحاج سليمان البسطاوي كتب في أعلى صورته
ففهمناها سليمان
ولما سألت هما قصدهم ايه بالآية قالولي ان الحاج سليمان ربنا فهمه المسألة السياسية
الله اكبر يا سبحان الله ايه الجمال ده
الأخين أحمد وسيد صالح من مرشحي احدى الدوائر كتبا اعلى صورتهما ايضا
وكان أبوهما صالحا
!!! خير ان شاء الله .. ********
خدت نفسي ورحت ناحية دائرتنا الانتخابية لقيت واحد من اللي مرشحين نفسهم عامل مؤتمر انتخابي
قلت يا واد ياساخر ياغامض خش واستفيد
الحاج مرزوق ابو الحسن
أكبر تاجر مخـد... قصدي اكبر تاجر في السوق شعاره الانتخابي
كله هياكل .. كله هيعيش
قووووول يارب
قمت سألته سؤال بسيط.. انت ايه البرنامج الانتخابي بتاعك يا حاج؟
واعي وناصح من يومي
رد عليا وقال موال
الكل هياكل.. الكل هيعيش.. قول بس يا رب
قلت: يا رب بس انا ما فهمتش برضه انت ناوي على ايه للمنطقة والشباب وبرضه كله هياكل وكله هيعيش وما حدش هيموت من الجوع ؟
قال: المنطقة يا استاذ مش محتاجة مساعدة من حد بالجهود الذاتية احنا هنقدر نعمل كل اللي احنا عايزينه وبلاش نحمل الدولة فوق طاقتها ..
قلت: وهو المنطقة دي يا حاج مش جزء من الدولة برضه لازم تصرف عليه وتنميه
فجأة وبدون سابق انذار يتجهم وجهه
قائلا: انت جاي من عند المنافس بتاعي.. انتوا عايزين مننا ايه.. سيبونا في حالنا .. الناس عايزة تاكل وتعيش .. امسكوا الواد ده وودوه على القسم
العبد لله لأنه لحسن الحظ كان قاعد في الصفوف الخلفية فالبلطجـ ... قصدي الرجالة بتوع الحاج ما لحقونيش لاني خدتها جري وقلت يا فكيك
فوق صورة الحاج لقيت
انا عرضنا الأمانة على السماوات والأرض والجبال فأبين ان يحملنها وأشفقن منها وحملها الإنسان
مش ممكن اللي بيحصل ده .
طب كمل الآية يا حاج كملها وانت تنسحب والله العظيم
انه كان ظلوما جهولا ********
الأستاذ عاطف السيوفي نائبنا الأربع سنوات الماضية اول مرة اشوفه واعرفه في مؤتمره الانتخابي
بيقول: انا بقالي اربع سنين نائب عنكم وما عملتش حاجة بس ادوني فرصتي ؟؟!!!!
يا نهار مالوش ملامح .. اربع سنين وعايز فرصة تانية امال كنت بتعمل ايه في الاربع سنين اللي فاتوا..
اكيد كنت من النائمين في مجلس النوم ...
كتب أعلى صورته
وقل اعملوا فسيرى الله عملكم ورسوله والمؤمنين
طب طبق يا بني آدم ********
والله العظيم اتخنقت
هي الآيات القرآنية لعبة وأداة في يد من لا يطبقها ولا يقرأها ولا يعرف معناها
...أكاد أجزم أن كل من
رشح نفسه لا يملك مصحفا ليضعه في مكتبه..
او في سيارته
ولا حول ولا قوة الا بالله ..
تحولت الآيات القرآنية الى جزء من الدعاية الانتخابية بدلا من اساس للعقيدة
ولا تعليق ******** منقول من
- السـاخر الغـامض -

هناك 22 تعليقًا:

حسام مراد يقول...

منقول برده

بس جامده بتاعت
مش ناقص بقى غير ييجي بتاع الرقيق يقول
وحور عين كأمثال اللؤلؤ المكنون
ماتعرفيش فين السوق ده ههههههههه
يلا سلاموووووووووووز

عمرو غريب يقول...

والله بالفعل انتي لفتي نظري لهذة الحكاية والله زعلت اوي للدراجادي المتاجرة بقت بأسم الدين والله بالفعل لهم حق الغرب يزلونا ويعملو فينا اكثر من كدة اذا كان احنا بنستهين لهذة الدرجة بالدين يبقي بقي نزعل لما الغرب يهينو ديننا

sosa يقول...

اعمل ايه يا حسام
بيزى بيزى بيزى بقى انت عارف الامتحانات ربنا يرحمنا منها


عمرو
ميرسى لردك

Mohamed Hamdy يقول...

جميل البوست يا سوسه , وفعلا ملاحظه جميله يستحق عليها الكاتب الأصلى التقدير وإنتى تستحقى التحيه لإنتقاءك المتميز وإسلوبك الجميل فى العرض

تسلم إيدك وفى إنتظار جديدك

sosa يقول...

ميرسى ميرسى
والقادم اجمد
ويستحق المتابعة

بنى أدم مع وقف التنفيذ يقول...

هي دي البلد يا بهية
اقصدي ي سوسو

sosa يقول...

بهية!!!!!

طب ليه كده ياتهامى

هموما ميرسى على ردك
مردودالك ان شاء الله

شيماء الجيزى يقول...

سوسا
انا سمعت الموضوع ده قبل كده فين
تعرفى
عنده حق ميه ميه
بقوا بيستغلوا الآيات القرآنيه اسوأ استغلال
بجد
تحياتى لنقلك البديع

yasmina يقول...

هذا احد اسباب استهانة العالم بنا
اننا نستهين بديننا وبانفسنا
تحياتي للكاتب ولك

صبري سراج يقول...

بقينا نستخدم الدين في الظواهر المتعلقة بمنع الحسد والشر والعين والكلام دا

ونسينا ان كلام ربنا دا هو دستور الحياة كلها

دستور رباني مبيظلمش حد ولا فيه المادة 76

REEMOO يقول...

للأسف يا سوسا ان الناس بقت تستخدم الدين وعلى مزاجها
يعنى جزء من ايه او حديث شريف بس اهو يفيد الغرض يبقى شغال
وممكن اصلا ميكنش ليها علاقه باى حاجه من اللى بيقولوها
بس اهى تقوى وناس بتعرف ربنا وكده يعنى علشان الثقه مطلوبه واكيد مدام بتعرف ربنا الناس هتقولك دول صالحين ومش هيغشو ولا يخلفو وعدهم معانا
اهى تجاره زى ما المجلس برده تجاره
تحياتى ليكى ولكاتب البوست

sosa يقول...

شيماء
ميرسى ياقمر لردك
واعيش وانقلك:))

ياسمينة
عندك حق بجد فى كل حرف
احييكى


صبرى
انت جاى تقولى دستور هنا كمان
مش كفاية اللى فى الكلية ياابنى:((


ريمو
ميرسى ياقمر لردك
وفعلا انتى صح
الدين دلوقتى بقى بيتفسر على مزاج كل واحد
ربنا يرحمنا
اللى احنا فيه ده مش من شوية

شريف يقول...

هايل سوسا
بوست فى محاله
لان فعلا كل واحد عاوز يمش على اللى هوة شايف صح وبس
وملوش دعوة بالدين او بلاخلاق
على العموم
بوستك هايل اوى سوسا

بس انا ليا طلبين
اولهم

تغيرى اسم سوسا دة علاشان وحشن او تعرفينا اسمك الحقيقى اية
والتانى انة انتى تعبرينى ولو مرة واحدة احس فيها ان انتى فعلا بتقرى التعلقيات بتعتى وابقى ضفينى عندك ياستى من باب الشفقة
دة انتى لو دخالتى عندى هتسوفة انا عامل فى اسمك اية

ولكى تحياتى

حزيــــــــــــــــــن يقول...

دمك خفيف انا قريتلك قبل كده ؟
بس البوست اللى تحت دا جامد جدا ابقى زورنى
هو انت صاحب مدونت نوهامى؟

عبد العزيز تاعب يقول...

جهل مطبقوانا اصدق كل ماقرأت
في شارعنا كهربائي سيارات كتب علي لافتة دكانه
والله متم نوره ولو كره الكافرون
الحاج صلاح الكهربائي

sosa يقول...

شريف
اسفة على التاخير فى الرد بس انا رديت قبل كده بس مش عارفة الرد راح فين
باين المدونة بتاعتى دى مسكونة

ميرسى لردك
بالنسبة لاول طلب
فانا مش هقدر اغير سوسة لانه خلاص بقى ماركة مسجلة
بس مش عارفة انت فاهم معناه ايه بصراحة
واسمى الحقيقى ياسيدى سارة
طلبك التانى بقى
انا والله بقرا وبتابع كل التعليقات اللى بتيجى وبرد عليها
وبدخل مدونتك ومتابعاها والله
بس اعذرنى الدراسة عاملالى قلق بقى وانا فى اخر سنة ومطحونة من سنتين مش بعرف التفت ورايا وبرد على قد مااقدر بس ادعيلى اخلص الاسبوعين اللى فاضلين دول على خير

sosa يقول...

حزين
كفاك الله شر الحزن
ميرسى اوى على المجاملة الجميلة دى
وميرسى لتعليقك اوى
ويشرفنى انه مايكونش اخر كومنت
بس مش انا صاحبة مدونة نوهامى
لان صاحبها اسمه محمد التهامى
انما انا اسمى سارة الاسكافى
الفرق شاسع على مااظن!!!

sosa يقول...

الاستاذ عبد العزيز تاعب
بجد انا سعيدة جداااااااااااااااااا بالكومنت بتاع حضرتك
وان حضرتك شرفت المدونة
ميرسى لردك جدا
وربنا يهدى الجميع
ياريت فعلا مايكونش اخر كومنت

ماجد ابراهيم يقول...

مقال رائع
شكرا لكاتبه وشكرا لكى يا سارة
وعايز أستئذن فى نقله
لانى هاستغله بشكل مختلف
مع توضيح المصدر طبعا
بس ياريت اعرف اسم كاتب المقال

تعليقى بقى على الموضوع ان الناس اللى بتستعمل القرآن فى غير مواضعه دى هاتعمل ايه يوم الحساب لما تتسأل عن كل صغيرة وكبيرة
هايقولوا كنا مش عارفين قيمته ولا بنلعب

المشكلة أننا بننسى يوم الحساب رغم انه جى .. جى .. مين يقدر يهرب منه

sosa يقول...

ميرسى اوى على تعليقك ياماجد
وطبعا تقدر تنقله
وصاحبه هو اللى موجود فى اخر البوست
(الساحر الغامض)
لانى واخداه من جروب على النت مش ملك حد اعرفه

غير معرف يقول...

الساخر الغامض مر من هنا

شكر لك سارة

غير معرف يقول...

فكرتيني بايام زمااااااان
ما كتبتش بقالي كتير وان شاء الله هكتب جديد
شكرا ليكي بجد

الساخر الغامض تاني
ghaiboba@hotmail.com