٢.٢٣.٢٠٠٧

نقابة اللى حب ولا طالش

نظرت من حولى وجدت هناك امرا غريبا، لقد وجدت انه لا يوجد احد الا وقد انكسر وانجرح من قصة حبه ومعظم الشباب بناتا واولادا درجوا تحت بند (اللى حب ولا طالش) و(اتقلبوا) شر (قلبة) واصبحوا (مقلوبين) كلقب لا رجعة فيه كان هو نتيجة قصة حب ملتهبة او تسلية من احد الطرفين او ان كان وقع تحت علاقة ثلاثية الابعاد التى تسمى (الحب من طرف ثالث) وما اشهرها هذه الايام لكن الا يحق لهؤلاء الـ(مقلوبين) ان تقوم الدولة بحمايتهم فما من شاب(مقلوب) او فتاه (مقلوبة) الا اضاعة فى الوقت وسرحان ليس له نهاية ونسيان الابتسامة وجرح القلب والكرامة ومعايرتها بانها اصبحت مقلوبة بدون ان يكون لها ذنب فى هذه القلبة القوية التى اجتاحتها. لذلك ونيابة عن المقلوبين فى مصر اطلب او اؤمر الحكومة المختصة بانشاء نقابة خاصة بـ ( المقلوبين ) يطلق عليا ( نقابة اللى حب ولا طالش) وتعيين هيئة ادارية لم يتم قلبهم من قبل او على خبرة كبيرة باساليب القلب لحماية المقلوبين فى مصر ومحاولة تقليل هذه النسبة المرتفعة التى وصلت الى 180% وتقوم النقابة باحتواء جميع اللى حبوا وماطالوش على مستوى الجمهورية والاستعانة بسيدة عجوز تجلس مع كل عضو على حده وتعطى له النصائح المعهودة من السيدات الكبار مثل (ماتبكيش على اللى فرغ ماله ابكى على اللى اتوقف حاله) وبهذه النصيحة المباشرة يشعر الالعضو المقلوب بالحرج فى انه لسة (مابارش ولا القطر فاته)من اجل ان يجلس ويبكى على ماذهب انما يقوم بالبحث من جديد على من تعوضه عما مضى لانه لسة (بدارة) والعمر ادامه، ولا مانع من بعض التانيب والمعاتبة فتقول له (ماتبعش رخيص قال ماتتوصيش) وتتبعها بمصمصة شفاتها و(تزغده فى جنبه وتقوله ياما الناس قالولك وانت عاملى فيها فالح اوى) وتوفر ايضا النقابة جو ملائم لهم من حيث تعويض الحبيب المفقود بحبيب اخر يتم رد الاهانة اليه (قلبه) للحصول على نفسية سوية لدى الاعضاء ومن ثم يتم الشفاء، كما يجب تقديم محاضرات فى علم النفس والاجتماع توضح متعة الحياة بدون النصف الاخر فلا يوجد من يطلب هدية فى عيد الحب ولا عيد الميلاد ولا يوجد من يريدك ان تتذكر ميعاد اول مقابلة بينكما بالساعة والدقيقة وانت اصلا عندك زهايمر، وتوفير مشروعات لتضييع الوقت الذى كانوا يمضونه برفقة الحبيب وتعليمهم ان المقابل المادى العائد عليهم من المشروعات احسن مليون مرة من القعدة 6 ساعات على الكورنيش مع الحبيب وتضييع النقود فى اكل الترمس ومص القصب ، وعمل ندوات دورية والاستشهاد بامثلة اخرى لشباب تم قلبهم من قبل ونجحوا فى الخلاص من هذه الازمة وعرض تجاربهم على داتا شو كبيرة لزيادة الوعى وياتى فى النهاية صاحب التجربة لينهى الحلقة بمقولة تلخص كل هذه الدورات (اتجوز الارملة واضحك عليها وخد من فلوسها واصرف عليها) ،اذا تجرا الحبيب السابق وطلب العودة لا يهم فكل الحلول موجوده ويتم وضع برنامج خاص للرد على الحبيب السابق اللذى قلب العضو المقلوب بعنوان (خلى حبيبك على هواه لما ييجى اديله على قفاه) واخر مرحلة بعد ان يعود العضو الى نفسيته الاولى وينسى ماحدث به ويكون قد اكتسب خبرات جديدة فى الحياة يتم عمل لقاءات خاصة بالاعضاء والعضوات ويتم استرجاع كل ما مضى من اجل التنكيد عليهم وتذليلهم بما فعلت معهم النقابة وتدفيعهم مقابل كل هذا. لكن لا يجب على الاعضاء ترك النقابة الا اذا تزوجوا لعمل الاجراءات اللازمة لنقل الوراق الخاصة بكل عضو من نقابة(اللى حب ولا طالش) الى نقابة (المقهورين فى الارض) الخاصة بالمتزوجين والتى سنطالب بانشائها فى حديث اخر. سارة الاسكافى

هناك ١١ تعليقًا:

nohamy يقول...

صص الحب الفاشلة جزء حياة أى أنسان ناجح

النقابة دى مش هتلاقي أعضاء عشان محدش هيتعرف أنه مقلوب

Sarah el eskafy يقول...

ليه الاحباط ده ياتهامى
انا واثقة انها لو اتعملت على القوانين دى هيطلع من وراها جيل جديد مقبل على الحياة
الحياة الاخرة بقى او الدنيا مش هتفرق كتير
المهم انه هيقبل على حاجة وهيتخلص من التردد فى قراره فى تحديد مصيره

ماشى الطريق يقول...

(:
الأبليكيشن بتتملى فين لو سمحتى

محمد حمدي يقول...

موضوع اكتر من ممتاز يا سوسه

وياريت تبعنيلى قسيمه اشتراك على الميل , ولا اقولك انا اصلا هكون الرجل الثانى فى التنظيم

إستمرى يا سوسه عشان اقول لولادى ان الكاتبه الى بيقروا كتبها انا كنت اعرفها قبل ما اتجوز امهم ... تفتكرى هيصدقو ساعتها ؟

سلام .

Sarah el eskafy يقول...

ماشى الطريق

الابليكيشن هتتملى اول ما ناخد الموافقة
بس انا مش هسيبهم وهفضل وراهم مش هسيبهم لحد ما يجيبوها


محمد
استنى لما ناخد الموافقة برضه وبعدين نبقى نشوف الابليكيشن
ماتقاطعش
وبعدين ليه يعنى ولادك مش ه هيصدقوا
امال مين اللى هيجيب لولادك الحاجات الحلوة ويقعدوا يقولوا تنت سوسة جت وجابت المساسة:)

Radwa يقول...

على فكلامك شبه معقول مش تستعجلى ازكان عملو للراقصين نقابه مش هيعملى للمقلوبين نقابه على الاقل هما اولى

وبعدين بصراحه موضوعك حلو والله بس مش عارفه اقولك ايه المهم ان اللى يرأس النقابه دى انتى قلتى واحده كبيره فى السن او عجوزه من بقى بقى اللى هتعترف انها اكبر واحده فى مصر

دى نقطه تانيه لابد من استثارتها

Sarah el eskafy يقول...

لالالالالالالالالالالا
انا قلت العجوزة دى هتبقى موظفة وهى اللى هتفضل تأنب فى المقلوب لحد ما يقول امين
ميرسى اوى لردك ياسندريللا
شرفتينى
وبتمنى تكونى متابعانى

غير معرف يقول...

مش عارفة ازاي مكنتش متابعة مواضيعك
عبيطة انا ولا هو الزهايمر؟
سارة انت بجد بجد رائعة
اما بقى بالنسبة للنقابة فأنا ياعيني شفت كتير من الحالات دي
بس يمكن مكونش منهم الحمد لله عشان انا واخدة احتياطاتي كويس
عشان كدة بطلب منك اني احل محل الست العجوز اللي بتأنب الضمير
وانت عارفة انا اكيد اكيد هقوم بالدور ده كويس
موضوع رائع فوق الوصف ووصفة جميلة واقتراح هايل بانشاء مثل هذه النقابة
تحياتي

غير معرف يقول...

جميله جدا والاجمل اللى عاجبنى مقوله واللى عندهم زهيمر يارب ياساره تكونى فاهمه اقصد ايه بس متقلقيش هكون اول مشترك وخصوصا انى اخذت على كفايه مرتين يعنى لايزم يتعملى قرص تدريب مقثف على خيبتى وعلى خيبه الامل , اما الامثال فلو كنتى استعنتى بواحده بلدى كانت امثالها هتبقى احلى على راى المثل (حبيبى انت الكل فى الكل بعد الجواز انت جيا يادهل)وكده ياباشا
وياريت بوست عن الاسطوانات المشروخه هيبقى منك زى العسل بس ياريت تستعينى باخر اصدار منها 2007 لانه فيه كام مصطلح لذيذ

الحب المستحيل(ساهر)

Sarah el eskafy يقول...

رنرون
طبعا عبيطة
بس سورى يارنا مش هينفع اديلك دور الست العجوز
يابنتى انتى عندك 20 سنة فين العجز
انا عايزة واحدة خبرتها كبيرة
والناس دول موجودين كتير
انتى ممكن امسكك الشئون المالية عشان ندبح الزباين

Sarah el eskafy يقول...

ساهر
فاهمة فاهمة
خلاص فرجت الناس علينا
وخلاص انت مبقتش اول مشترك فى ناس سبقتك
وبالنسبة للامثال بقى انا مشعايزة واحدة بلدى عشان مجرد امثال
ياابنى انا عايزة واحدة عجوزة عندها خبرة كبيرة بالحياه والدنيا وعاشت وشافت كتير عشان النصيحة تبقى "معتقة" فهمتنى بقى
والاسطوانات المشروخة بقى دى هسيبهالك
انت هتبقى ادرى منى
وورينا الشغل اللى على اصوله بقى