٤.٢٧.٢٠٠٧

امبارح كنت قاعدة كده قاعدة سلطنة مع نفسى
وانا لما بقعد قعدة سلطنة بتبقى سلطنة من نوع غريب
تلاقونى قاعدة كده ومشغلة 6 او 7 البومات اغانى نصهم مااعرفش مصدرهم
كل مااجى اتسلطن واشغل حد من المطربين العزاز بتوع القرن ال21 وانا نفسى افرفش وانعنش كده
ابص الاقى ان كل الاغانى اللى بتشتغل عندى كلها نكد
فغالبا عشان كده بقت بتطلب معايا نكد
وامبارح بقى كانت طالبة معايا نكد بالثلث
اجيبنى يمين اجيلى شمال
اجيبنى شمال اجيلى يمين
لما غلبتنى بصراحة
الاغانى واحدة
الالحان واحدة
الاصوات تقريبا واحدة
الكلمات واحدة واحدة واحدة
حاجة تعقد اللى مايتعقدش
بس فى عز ما انا قاعدة اجيبنى يمين وشمال كده اشتغلت فجأة اغنية لحسام حبيب
اسمها "امبارح" طلعت حلوة مش عارفة ازاى
وللا انا عارفة وبستهبل
عشان حسام حبيب ده اغانيه رومانسية زيادة عن اللزوم
ومن كتر رومانسيتها بقت بتجيبلى حساسية فى مشاعيرى
من كتر رومانسيتها:(
حتى كلماتها جديدة وخفيفة ولذيذة
والنكد بتاعها مش من النوع المحبط
كانت بتقول
امبارح كان لسة معايا
وبيحلم بيا وبهوايا قلت امشى كان يجرى ورايا
ويقولى ما تستنى شوية امبارح مين بس يشوفه
من شوقه ليا ومن خوفه كان واقف بيدارى كسوفه
مش عارف يتقرب ليا
وحلفلى وقالى انا مشغول
صدقته زى مابيقول
دلوقتى كان ليه صدقته
مع انه ده مكنش يطول
كان خايف لكن طمنته ولا عمرى مرة ماخونته على قلبى وحياتى امنته ونسينى واوام اتغير
مش فارقة اهه حب وعدى
ومحدش بيموت من الوحده
ده لقانا كان يوم واتقضى
وهوانا كان عمره قصير
وحلفلى وقالى انا مشغول
صدقته زى ما بيقول
دلوقتى انا ليه صدقته
مع انه مكنش يطول
ها
ايه رايكوا
بعرف اسمع ولا اغير الذوق
فى كلا الحالتين سواء عجبكوا ذوقى او ماعجبكوش
هحكيلكوا عن اغنية المود اللى جاى بس فى بوست تانى
واوعدكوا انها هتبقى مختلفة

هناك ١٨ تعليقًا:

Masry يقول...

((يمكن بتعرفي تسمعي . بس مبتعرفيش تتكلمي))... رأي شخصي

إبـراهيم ... يقول...

هوا حسام حبيب بيخنق ، وإن كان ليه أوقات أغاني (كويسـة) ف الحقيقة ما سمعتش الأغنية دي قبل كده !
.
.
بـــس جاااايز قووووي برضووو
.
.
تحياااااااتي يا سوسو

nohamy يقول...

لية بتسمعى ناس مجهولة

•«ρяoιd»•™ يقول...

الأغنيه اساساً روعه

و من احلي الأغاني في البوم حسام حبيب الجديد

بجد ذوقك حلو يا سوسا

و مستني اغنية المود اللي جاي

اه قبل ما انسي

احنا اصلاً شعب نكدي

بيموت في الأغاني النكد

تحياتي

حسام مراد يقول...

لا بتعرف تسمعى
وعن حسام حبيب فهوه شغاااااال
وعن الاعنيه فالاغنيه شغااااله ومن احسن ان لم تكن احسن اغنيه فى الشريط هيه وقلبى سألنى عليك
وعن النكد والحوار ده فانتى ارغى
وماتتوصيش عن الشعب المصرى

Sarah el eskafy يقول...

انسان
ميرسى لردك
وبحترم رايك
بس الناس اذواق

ابراهيم
انا معاك ان حسام حبيب بيخنق الرجالة:))
بص الالبوم الاخير بتاعه ده جامد جدا جدا جدا بدون استثناء
وعموما اسمع الاغنية وقولى رايك

Sarah el eskafy يقول...

ياتهامى يا ابنى
انقلتلك قبل كده
انا بسمع اغنية مش بسمع مطرب
والاغنية كلمات والحان وصوت
انما المطرب كشخص ده ولا فى حساباتى

تانى حاجة بقى بشجع الناس المغمورة عشان ربنا يبعتلى اللى يشجعنى ونتالق باذن الله:)))

Sarah el eskafy يقول...

رامى
ميرسى يارافع من معنوياتى
يارب اشوفك زيه يارب
وبعدين النكد ده بيجيلى فى اوقات معينة
بيكون مفيش حاجة تنكد عليا اصلا
لو فى حاجة بتنكد عليا مش بتنكد
مش فاهمة ازاى

حسام
ربنا يكرمك
طبعا لازم تحبه ماهو على اسمك و(شغااااااال) مش كده؟

Ahmed Mohamed El. Sayed يقول...

la yaraait te3'ayary ... le2aaan 7osam 7abeb .. aw 7ama2e aw ... el 3esely aw .. mohamed Nour kolohom nafs el style .. mafesh geded walahi ... we ba3deen embare7 de mosh gamda awe tab ma tesma3e fayrouz .. ( 7abo ba3don ) a7san men el habal eli benesma3o dah .. ( bdw i listen to them bardo ) thanx nd bdw nice Blog .. Ciao

mouhamed mousa يقول...

الاغانى واحدة
الالحان واحدة
الاصوات تقريبا واحدة
الكلمات واحدة واحدة واحدة
حاجة تعقد اللى مايتعقدش
---------
يبقي انتي عمرك ما سمعتي الملك ؟
؟؟؟؟؟؟؟؟؟
ازاي بتقولي كدا
؟؟؟؟؟؟؟؟؟

Reemo يقول...

بصرحه يا ساسو انا مش بحب الاغانى النكد خالص
فى بينى وبينها حساسيه كده
وخاصه بقى اغانى الجيل الجديد بحس انها نكد مركز
وناقص الواحد فيهم يعيط يعنى
مش هاضماهم مش عارفه ليه
ياريت بجد غيرى المود
تحياتى

Sarah el eskafy يقول...

Guevara

ميرسى اوى لتشريفك البويت وردك عليك
بس الاغنية دى كانت ناتج مود كده ببقى فيه كتير
هى اللى علقت معايا من بين منير وعمرو وفيروز
وعلى فكرة انا بسمع كل حاجة
بس كلمتها حلوة وداخلة دماغى اوى

Sarah el eskafy يقول...

mouhamed mousa

احتمال
كلها برضه وجهات نظر
والحمد لله انا زى ماقلت بسمع كل حاجة
وبسمع الملك وبحبه جدا
وبسمع برضهكل اللى طالع جديد فيها ايه

Sarah el eskafy يقول...

ريمو
والله النكد كان غصب عنى
امتحانات بقى ومشاريع تخرج ومقالب دكاترة
وانتى عارفة
غصب عنى لازم تقلب نكد
وبعدين انا خايفة اغير المود بتاعى يعلى شعبان عبد الرحيم يرفع عليا قضية:)))

عمرو غريب يقول...

حسام حبيب صوتة رائع

heba يقول...

ما بلاش النكد يا سوسة أحسن
الواحد الصراحة مش ناقص
انا شايفة ان الأغاني معمولة عشان حاجة تفرفش كده وتطلعه من مود الاكتئاب الطبيعي اللي الواحد بيبقى عايش فيه
بس بصراحة الأغنية كده شكلها خفيفة وحلوة مع اني مسمعتهاش بس كلماتها حلوة
ومستنية المود الجاي هيبقى عامل ازاي

Sarah el eskafy يقول...

عمرو
انت عبقرى ياابنى
من يوم ماشفتك وانا بقول كده
انت فييييييين من زمان
بعد كورسات الاحباط دى

ميرسى ياعمرو
نورتنى

Sarah el eskafy يقول...

والله ياشمس مش بحب النكد ولا بطيقه
بس تقولى ايه
بذاكر مواد غريبة الشكل والنوع والمظهر والمنظر والكينونة
حاجة كده من النوع اللى محتاج شمبليون
يللا
ان شاء الله المرة الجاية هتلاقينى جايبة حاجة جامدة


على فكرة الاغنية خفيفة وماتحسيش انها نكد اصلا