٥.٢٦.٢٠٠٧

النهاردة جار ليا اتوفى بس هو مكنش زى اى جار بالنسبة ليا
هو كان ماضى وذكريات طفولة ولعب وجرى وتنطيط معاه
هو كان بمثابة عم ليا وامه رحمها الله كانت بمثابة جده
النهاردة ربنا اختاره يكون جنبه
انا اتفاجئت بالخبر اول ماصحيت
مش من عادتى انى اعيط على موت حد لانى مؤمنة ان ده قدر كل انسان ودى نهايته
افتكرت انى مش هقدر ابكى لاننا بقالنا سنين مفيش بيننا غير مجرد سلام بعد ما كل واحد دوامة الحياه خدته
ابتسامة وسلام هما اللى كانوا بيننا فى الفترة الل فاتت كلها
مكنتش اعرف ان عمره قصير
مكنتش اعرف ان ربنا اختاره الا متاخر
كان نفسى اسلم عليك
يمكن دلوقتى وقبل ما يدفنوك تكون حاسس بالناس اللى حواليك وبيحبوك
يمكن ات عملت حاجات غلط فى اخر حياتك
بس برضه هتفضل عمو ماجد اللى كنت بحب العب معاه وانا صغيرة واكلمه من بلكونتنا
ربنا يصبر جدو على فراقك
وربنا يصبر زوجتك واولادك
وربنا يصبر كل اللى بيحبوك
لانك بجد كنت اكبر صدمة لينا كلنا
ولانك من افضل الجيران اللى عمرى ماهقابل زيهم فى حياتى
لرابع مرة بكيت
رحمك الله ياجارى العزيز
وربنا يجعل مثواك الجنة
ويلهم اهلك الصبر
ويغفرلك كل ذنوبك قادر ياكريم

هناك ١٠ تعليقات:

Reemo يقول...

ان لله وانا اليه راجعون
ربنا يرحمه يا رب ويسكنه فسيح جناته
البقاء لله يا سوسا

YHYيــوســف الـمصـرى يقول...

البقاءلله
انا برضه توفى جار ليا من فترة ومكنش بينا علاقة قوية غير السلام فقط ولكن حزنت جدا لوفاته وبكيت عندما سمعت الخبر
الله ما ارحم موتانا
تحياتى والبقاء لله

مشربية يقول...

روح جميلة منك يا سارة و احساس يجعل الحجر يتكلم البقاء الله يا سارة
اصعب حاجة في الدنيا انك تكون بتحب حد بجد و مش عارف توصلة الاحساس دة احساس الحب كا ابن لة او قريب او حبيب او اي صلة حب مش لازم نوعها
الف شكر يا سارة

nohamy يقول...

القاء لله

محمد حمدي يقول...

البقاء لله ربنا يصبرك ويصبر اهله ويصبر اى حد فقد شخص عزيز عليه

Sarah el eskafy يقول...

ريمو
يوسف
العسكرى
تهامى
محمد
بجد مش عارفة اقولكوا ايه
ميرسى اوى ليكوا
وربنا يرحم امواتنا جميعا يارب

micheal يقول...

ربنا يرحمه و يصبر أهله
تحياتي لكي و لمشاعرك الرقيقه

Sarah el eskafy يقول...

ميرسى اوى يامايكل
وربنا يرحم الجميع

عمرو غريب يقول...

ربنا يرحمة و يسكنة فسيح جناتة

Sarah el eskafy يقول...

ميرسى اوى ياعمرو