٤.٢٩.٢٠٠٧

امبارح اول مرة انام مرتاح
بجد نمت وانا مرتاح اوى
عشان امبارح اتخانقت مع حبيبتى
وسبنا بعض
اول ما سبتها ومشيت
حسيت ان الدنيا كلها راحت منى
ما بقيتش شايف قدامى
يادوب وصلت للبيت وانا بزحف
المهم
رميت نفسى عال السرير وانا بطلع فى الروح
مش قادر مخنوق
مش طايق نفسى
اناحبيبتى خلاص راحت مش هترجع لى تانى
ولا هشوفها ولا هكلمها
مش ممكن ده انا اروح فيها *******
وفجأة
ايه ده؟
يعنى معنى كده مش هكلمها فى التليفون تانى؟
ده كده هوفر بتاع 20 جنية كل يوم
وكمان هوفر من صحتى وتعب قلبى فى كنتى فين ومالكش دعوة
ايه ده ايه ده؟
كمان مش هقابلها؟
يعنى مفيش مطاعم ولا كافيتريات
ولا مؤمن ولا جاد؟
ياااااااه
ده كده عظيم
كمان مفيش ماما عايزة تقابلك وتشوفك
ومافيش قلق ولا خوف من ابن الحلال اللى هييجى ياخدها ويطير
ولا غيرة
ولا شك
ولا تقل
ولا خفة
ياااااااااااااااااااااها
نا فرحان والله فرحان اوى *******
ياااااااااااه على البنى ادم
تبقى راحته قدامه ويدور على تعبه
انا كده خلاص لقيت راحتى ومش هتنازل عنها ابدااااااا
ياه انا كده سلطان زمانى
اما اقوم اعمل كباية شاى
ايه ده؟
التليفون بيرن
ايه ده؟
دى رنة حبيبى
ايوة هو ده اسمه هي دى الرنة
الو
ايوة يا عمرى
لو كنتى صبرتى دقيقة كنت هاكلمك واعتذرلك ياحياتى *******
man2ool

هناك ٢٢ تعليقًا:

غير معرف يقول...

حلوة جدا جدا

Sarah el eskafy يقول...

تشكر ياباشا

Reemo يقول...

جميله يا سوسا
بس انا مش عارفه اسمى ده ايه نفاق
ولا اسميه كذب
ولا خداع
ولاايه بالظبط
انا مش فاهمه هو بيحبها ولا هو مش طايقها
ولا هو بيحبها بس من غير تكاليف :))
بحبك بس من بعيد لبعيد
والله مش عارفه اقول ايه
حلوه بجد يا سوسا
تحياتى

Sarah el eskafy يقول...

ميرسى ياريمو ياقمر

بجد انا كمان محتارة هو بيحبها عشان ايه
وللا يمكن فعلا الفلوس بتغير النفوس
وللا هو ياعينى واقع لشوشته
وللا بخيل
وللا هى ممشياه على العجين مايلخبطوش

مش عارفة!!!!

عمرو غريب يقول...

يا لهوي كل حب طيب ونبي اية الي يجيب الزعل

عمرو غريب يقول...

يا لهوي كل دة حب طيب اة الي يجيب الزعل

حسام مراد يقول...

ههههههههههههه
معلش مش عارف ليه وانا بقراء البوست بالذات بتاعت انه فرحان اوى والله فرحان اقعدت اضحك

طب ازاى
وهو كان هايكلمها ويعتذر
طب ده نسميه ايه

ولا اقولك الف مبروك ليه على العوده

غير معرف يقول...

يااااااااااه...........ضحكت. أناأصلى من مدة ما ضحكتش. جميلة ومتشكر

heba يقول...

حلو يا سوسة اوي التناقض ده
أحلى حاجة فيه انه عايش في الموضوع ده بكل ذاته ومصدق اوي ان في مميزات لكل جانب وعايش فيها بإخلاص
مع ان ده يعتبر شيزوفرينيا بس ما علينا
شكله عايز يريح دماغه وخلاص
لما تكون موجودة جنبه يبقى بيجبها ويستغل المميزات الموجودة في الموضوع ده
ولما تكون مش معاه برده يستغل المميزات الموجودة في الجانب الآخر
حقيقي انا احترت معاه .. هو ده يبقى بيحب ولا مقضيها مزاج ؟ سلام يا جميل

Sarah el eskafy يقول...

عمرو
مش عارفة بصراحة
بس هى غالبا الفلوس بتغير النفوس:))

حسام
الفلوس بتغير النفوس برضه:)))

Anonymous

ده شئ يشرفنى انى انزل بوست يضحكك
اهه عشان ماتنساش الضحك شكله ايه


شريف
المدونة انا ضفتها
معلش اعذرنى مضغوطة جامد من كل اتجاه
مش مركزة فى اى حاجة
وفى مدونات كتير محتاجة اضيفها وازورها وصعب عليا فى الوقت الحالى


شمس
نورتينى ياقمر
بس هى دى تبقى شيزوفرينيا!!
اصلى بفكر اعمل كده فى حاجات كتير فى حياتى عشان اريح دماغى واطلع انا اللى كسبانة؟.

nohamy يقول...

بصراحة
التدوينة دى حلوة
فيه كتير كدة
وده شئ عادي
وبيحصل كتير

Sarah el eskafy يقول...

تهامى

عايزة اعرف عادى ازاى
وايه معنى الاضطرابات دى
بدل انت فاهمها كده
بليييييييز

صبري سراج يقول...

مش بيحبها

بس فرحان بوجوده معاها

حلوة اوي يا سوسة هانم

Sarah el eskafy يقول...

ميرسى ياصبرى باشا على تحليلاتك
هما دول الشباب بجد
مش احنا البنات الخيبانة اللى مش فاهمين حاجة:)))

yasmina يقول...

للاسف هذه هي حال الشباب
وهذه معاملتهم للبنات
تحياتي

Unknown يقول...

أكتر حاجة بيلجألها الناس هي ترييح الدماغ يوجع دماغه ليه ويتعب عشان حد
مابطوله أحسن
ربنا يلطف بينا

غير معرف يقول...

هههههههههههههههه انا مبطلتش ضحك ياسوسه
هيه دى الواقع بجد على فكره عالم كدابه :@

Sarah el eskafy يقول...

ياسمينة

مش كلهم برضه
ماتفقديش الامل

Sarah el eskafy يقول...

fanan fa2eer
اول مرة تشرفنى فى مدونتى وياريت ماتكونش الاخيرة
كلامك صح فى زمن انتشرت فيه السلبية وللا مبالاه
بس برضه زى ما قلت لياسمينةمش عند كله

Sarah el eskafy يقول...

سمسم
برضه ياسمسمتى مش كلهم
يمكن لما ارتبط وللا اتجوز اجى اقولك كلهم:))
بس خلينى دلوقتى متفاءلة بلاش احباط

وبعدين من امتى وانا مش بضحكك يا سمسمتى:))

إيمان صبحي يقول...

حلوه قوي بجد ...وعجبتني اكتر لان حال معظم الشباب كده

بجد انت بنوته زي العسل

Sarah el eskafy يقول...

ميرسى يا ايمى
ربنا يخليكى
والله انتى اللى عسل