6.11.2007

طبعا مش محتاجة اقول ايه الصورة الخارقة دى
وللا اقول
طبعا واضح ان الصورة مش صورة على سايت نت
للاسف الشديد
دى المفروض انها المينى مكتبة بتاعتى
ومش كل اللى فيها ده كتب ثقافية
حاشا لله
دى بعيد عنكوا عصارة تعليم 4 سنين فى اداب مكتبات
بهاريز العلم كلها محطوطة فى المكتبة دى
(باستثناء شكلها المكركب)
بس والله دى كركبة امتحانات وبعدين الكتب كترت عليها ومش لاقيالها مكان
المهم انى مش هاين عليا ابيع عشرة 4 سنين مع الكتب دى
ومش هاين عليا انسى التعب اللى تعبته فيها
والشقى اللى شقيته فيها
والساعات والايام والليالى اللى قعدت افهم اللى محطوط فيها
ربنا يستر ومااصحاش يوم الجمعة الاقى مامتى مولعة فيها عشان زهقت منها
*****************************
ملحوسة:-
طبعا فى حاجات ظاهرة فى الصورة غير الكتب
دى حاجات عادية لزوم غذاء العقل
ماينفعش يكون غذاء عقل بدون غذاء بطن يعنى
ده انا اروح فيها

هناك 19 تعليقًا:

ibn nasser - ابن ناصر يقول...

هههههههه
لو عندك بقي قوة شخصية تزعقي وتنطري محدش يعمل كه ابدا
ههه تحياتي

بنى أدم مع وقف التنفيذ يقول...

بصي بعد الامتحانات .. ارمى الكتب اللى ملاهيش لزمة
مش عارف كل الناس المثقفين كدة
او بتوع المكتبات
امال لو حد قالك رتبي مكتبة 7000 كتاب هتعملي اية

Mohamed Hamdy يقول...

حركه حلوة اوى انك تصورى حاجات من جوة الكوخ .. قصدى الاوضه بتاعتك وتحطيهالنا .. وكويس ان اصلا عندك مكتبه , انا كتب القرايه والروايات وحاجات نجيب محفوظ وكدة بحطها فى صندوق كدة , اما كتب الدراسه برميها فى شنطه تحت السرير بعد كل ترم والحكايه بدات معايا انى كنت كل ترم اخاف انى اسقط فا احتفظ بكتبه وورق كورساته , لكن دايما كنت بنجح , واطلع الترم التانى اعمل نفس الحكايه وهكذا , لحد الترم دة وانا محتفظ بالعادة دى , بس يظهر الترم دة هستخدم الكتب الى شيلتها فى الدور التانى

ياريت الصور الجايه تبقى صور ليكى قبل ساعه من الامتحان , طبعا الصور الرقابه هتعترض عليها لعدم مناسبتها لشباب المكتبيين , لكن هتتسرب على الانترنت عشان نمنع اجيال من ان يحصلها نفس الى حصلك انتى واجيال من الشهداء

إيموشنات بتطلع لسانها وبتضحك بسخريه

بس بوست جامد , احلى حاجه فيه انو شخصى جدا

تحياتى

wahed يقول...

أنا بقي معنديش ولا كتاب من كتب الدراسه الله يرحمهم جميعا

micheal يقول...

ههههههههههههه...كأني بتفرج علي مكتبه بيتنا و الله
تحياتي

sosa يقول...

ابن ناصر
طيب يرضيك ازعقلى يعنى
ناقص تقولى اضربنى
طيب ده يرضى مين يعنى

sosa يقول...

تهامى
انت ازاى تقولى ارمى الكتب والورق ده
اصلا اصلا اصلا اصلا يعنى كل دول مش كتب الكلية هما ماكانوش بينزلوا كتب
دى كلها مراجع
مش بقولك بهاريز العلم مش مصدقنى
دى حتى فيها كتب من التراث
وبعدين ياما رتبنا مكتبات وكتب
عادى جدا
بس كله كوم وانى استغنى عن روحى ده كوم تانى

sosa يقول...

محمد ياحمدى
احنا مااتفقناش نسيح
محدش قالك تجيب سيرة الكوخ دى:@
بس النا بقى عندى كتب وورق ال8 ترم
عندى احساس انى هعيد ال4 سنين:(
وصور قبل الامتحان على فكرة لو نزلتها محدش هيصدقها
لانى ببقى فيها سعيدة جدا كانى خدت الثانوية ب99%
واحتمال بكرة ابقى اتصور بما انه اخر مادة فى حياتى لوووووووووول

sosa يقول...

واحد
يابختك
منور المدونة ويارب ماتكونش اخر زيارة

sosa يقول...

مايكل
عشان تعرف انى بصور من قلب الواقع بذات نفسويته:))
نورتنى

YHYيــوســف الـمصـرى يقول...

يا ترى مصيرهم ايه ؟

عمرو غريب يقول...

والله انتي حسسيستيني ان انتي بتحضري للدكتوراة يل لهوي كل دة مراجع علي العموم ربنا يوفقق وعقبال الدكتوراة

•«ρяoιd»•™ يقول...

ههههههههههههه

ال ميني مكتبه ال

انتي ناويه تفتحي فرع لمكتبة اسكندريه ولا ايه

و بعدين بسكوت ساده

حراااااااااااااااام

مفيش بالشيكولا

:)

تحياتي

sosa يقول...

يوسف
مش هتخلى عنهم ابدا مهما يكون
ده انا اموت من بعدهم

sosa يقول...

عمرو

دى اقل حاجة عندى والله العظيم
وما خفى كان اعظم
ده انا داريت بلاوى:(

sosa يقول...

رامى
انا لسة قايلة لعمرو ان دى اقل حاجة عندى
ولسة ولسة القادم اروع
وبعدين ماله البسكوت السادة محسسنى انه لسة موجود
وبعدين ابو شيكولا خلص
واللى بالكريمة خلص
واللى بالبسكوت برضه خلص
هخترع؟

Sharm يقول...

الكتب احلى حاجة في الدنيا

sosa يقول...

ماهى كتب عن كتب تفرق ياشارم:)

Rana يقول...

ايه يابت ياسوسة ده
انا لما شفتها كانت بنت ناس وكويسة عملتي فيها ايه ولا انت كنت مظبطاها عشان الزيارة والتفتيش وكدة
والبسكوت ده كمان مكانش موجود(والله لوريك)
مع اني مبحبش البسكوت السادة